Anenaitiai̱ Kanta
8 ¡Maa ame winia umarua núnisam
winia nukuru muntsurí̱ muntsúam tsakaruitkiumniṉkia
a̱a̱ wekaamin wainkian amincha meje̱a̱smataisha yajauchikia turutcharainti.
2 Wikia nukur unuitiu wemia nú je̱a̱nam jukin awayá̱waintjiame.
Kranaturun nere̱n yumiri̱n takurkutak áaraintjiame.
3 Winia muukrun ni menaari̱ji̱a̱i̱ awantrus
tura untsuuri̱ji̱a̱i̱ṉkia miniakrakka máakeapi aintia.”
Aishri̱ Jerusaréṉnumia̱ nuwa̱ natsachin tiarma
4 “Jerusaréṉnumia̱ nuwa̱ch natsatirmin ‘nekas umiktatjai’ tákurminkia ju̱na seajrume.
Nekas aneṉkratma tsawantri̱ jeamam wáurmamtikiairap
tura aneṉkrattairi̱ ishintiátrairap.”
Áishmaṉ nua̱ri̱n tama
5 “¿Yait kampuntin atsunumaani̱
ni aneamuri̱n átutka waakna ausha?”
“Mansana numi wakenmari̱n ishintiármajme.
Nui̱ ame nuku jatema najaimiak takurmasmiayi.
Nua̱rí̱ ni áishri̱n tama
6 Asakatniua áitkiasmek ame enentáimin winia péerkata.
Kunturmincha sakarchamnia anujtúkta.
Warí aneṉkrattaiṉkia jákatniua áintsaṉ ti kakarmaiti.
Tura akasmaktiṉkia jatainium pujustinia áintsaṉ ti najamaiti.
Ni jíri̱ṉkia ti kakaram tsué̱raiti.
7 Nayantsa entsari̱sha aneṉkratmanka peṉké ikiajniákchamniaiti
tura entsasha kiákmamtikiasha emeṉkákchattawai.
Tura shuar ashí warirí̱n ni je̱e̱n írunna nuja̱i̱ aneṉkrattai yapaji̱ásha peṉké ántar ainti.”
Nuwá̱ umái̱ kantamáiniamu
8 “Ii kai̱ chikichik uchich muntsursachu awai.
¿Ju̱na seatmainiakrincha warí tíintjik?
9 Nisha wénukaitkiuiṉkia nui̱ ekenir jiru kuitji̱a̱i̱ uunt je̱a̱ je̱a̱maraintji.
Tura wáititkiuiṉkia sétur numiji̱a̱i̱ iwiarkaintji.”
Nua̱rí̱ chíkich ainia nunasha tama
10 “Wikia wénukaitjiai tura winia muntsurka je̱a̱ tsakatskatniua núnin áiniawai.
Tuma asan aneamur íismaka wampu enentáin aṉkant átini̱n wainkia núniniaitjiai.
11 Paaramúnnum Saramúṉ uwa ajan takakuk téntak íinian apujsarmiayi.
Nisha péṉker neremtikiar nere̱n júurkar surukar
mir jirú kuítian aṉkant aṉkant itiatin ármiayi.
12 Uwa ajarka winia nuka wíniakete.
Maa Saramúṉka mir kuitkia áminiu ártí.
Tura tusiantuka ajan wáiniunu ártí.”
Aishri̱ nua̱ri̱n tama
13 “Maa ámeka ajanam pujuwitme.
Tsaniakmarmeka ame chichammin ántuiniawai.
Winiasha antumtikrusta.”
Nua̱rí̱ áishri̱n tama
14 “Maa, aneamuru, wárik winitiá.
Kuṉkuin naintnium ainia nui̱ japa
tura japa yamatskam tseke winiana núnisam juiktá.”