Isayas
Samaria nuṉka emeskamunam kúntuts enentáimtamu
28 Eprainniumia̱ shuar nampen ásar waantu enentáimtumamuja̱i̱ tawaspa etseṉkrakua ímiatrus enentáimtumak tura kuku̱j shíirmachitiat kaana núniniaitiat waantu enentáimtumainiana nuka núnisaṉ núkap takakainiak páantin enentáimtumainiana nusha tura winiú nampen ásar nékachu ajasáruka aneararti.* 2 Wats iisiana, Uunt Yus akupkámu ti kakarma nu micha kákeamusha núnis tura nase ashí emesmasha núnisaṉ yumi yutuk ama̱a̱rak nuṉkan amúana íimmianun akuptúktatui. 3 Tura Eprainniumia̱ shuar nampen ásar waantu enentáimtumatairi̱ tawaspa ímiatrus enentáimtutairi̱ṉkia naja̱trartatui. 4 Kame kuku̱j shíirmachitiat kaana núnin áiniawai. Núnisaṉ núkap takakainiak páantin enentáimtumaka esatratsa̱i̱ṉ yaaksha araka neré̱ tsamakun wainiak ti yaya̱k wárik yúana nútiknawartatui.
Uunt Yus ni shuari̱n yaya̱mu
5 Tura nu tsawantinkia Ni shuari̱ juákaru ainia nuna páantin tawaspáa núnis tura tí peṉker iwiarmamka áinis Ashí Akupin Uunt Yusa nu ajastatui. 6 Núnisaṉ sumamtikin ainia nuna nekatairi̱ṉkia tura pepru wá̱i̱ti̱a̱i̱ri̱n ni nemasri̱ waya̱a̱wara̱i̱ṉ tusar ayampruinia nuna kakarmari̱sha Yusak átatui.
Jutanmaya̱ shuarnasha chichareamu
7 Tura Yúsnan takarniusha núnisaṉ Yúsnan etserniusha ímiaja̱i̱k wainji tuinia nusha awartiun nampeku ásar ántar tuíniawai. Tura winiú nampekar nekasa nuna chichainiachu ásar ti awajir chichainiawai. Ántsaṉ mai̱ énentaim ajainiak péṉker sumamtikiainiatsui. 8 Warí ashí ekentrar yurumtai̱ ainia nui̱ṉkia imiakma ti yajauch mui̱jmiai̱ irunainiawai tuma asa aṉká péṉkerka peṉké atsawai. 9 Nuyá̱ chichainiak “Nekatai̱sha ¿yanak unuiniarat tura ju̱ chichamsha yanak antumtikiat muntsú tsurakúnash núja̱i̱nchuka yama tsurainia nunash? 10 Warí akupkámu chicham ataksha akupkámu chichamak nuyá̱ emka ujakma tura atak ujakma, ishichik nui̱, ishichik ai̱ jintintiamash” tu chichainiawai. 11 Warí nekas Yus jú̱ aentsun unuushím tura chíkich chichamja̱i̱ chicharkartatui. 12 Kame nin chicharainiak “Ju̱i̱ti ayamtai̱ṉkia. Tuma asamtai pimpikiaru ayamprarat susatarum. Ju̱i̱ṉkia ayamtai̱ núṉkaiti” tuíniamaitiat nisha antukcharmiayi. 13 Tuma ásarmatai Uunt Yus jú̱nis chicharkartatui “Akupkámu chicham ataksha akupkámu chichamak nuyá̱ emka ujakma tura atak ujakma, ishichik nui̱, ishichik ai̱” túrunaṉka wéenak tuntupem iniarartatui tura emesramu nuyá̱ wáitkiasma tura sepunam eṉkenáwartatui.
14 Tuma asamtai Jerusaréṉnumia̱ shuara uuntri̱ wishikkiartin árumna nu Uunt Yusa chichame̱ antuktarum. 15 Warí átum chichaakrum “Iikia jatai̱ji̱a̱i̱ tura jaka matsamtai̱ji̱a̱i̱ chícham najanaitji tura ii wáitsatniuri̱ nújaṉ paṉkaki̱ winiana tímiatrus winiaksha iinkia itiurtámkashtatji. Warí ii ú̱mkatniuka ii anaṉmamuri̱ṉkiti tura íi waitri̱ni̱ṉ úmkaitji” tárume. 16 Tuma asamtai Uunt Yus chichaak “Nekapsamu kayan Seúnnum ápujeajai. Kame je̱á̱ ajapéri̱ kaya tí shiirmach kayasha tuke apujtuamuiti. Tura nuna nekas enentáimta nuka natsa̱rcharti.* 17 Tura sumamtikiatniunka je̱a̱mkur nekapmatai̱ yáraṉkea ánis tura péṉker túratniunka je̱a̱mkur yakiri̱ métek nekapmatai̱ya̱ núnis ikiustatjai. Tura anaṉma ejamtairi̱nkia micha emesturtatui nuyá̱ ú̱mtairi̱ncha entsa ama̱a̱rak amurtatui. 18 Tura átum jákatniuja̱i̱ chícham najanamiarmena nuka peṉké ántar átatui. Núnisaṉ jaka matsamtai̱ji̱a̱i̱ chícham najanaitrumna nusha peṉké ántar ajastatui. Tura atumí wáitsatniuri̱ nújaṉ paṉkaki̱ winiana tímiatrus winiak atumniaka chanunmattarme. 19 Tura kashí kashini̱ṉ tsawai̱sha nuyá̱ káshisha naṉkatamainiakka tuke juramiartatui. Nui̱ṉkia nu tsuumai̱ chícham étserma ántakrum aya kuraittiarme” tímiayi. 20 Kame peak sútarchiniam nakuenkar tepesminkiait. Tura tarach waṉkarmachuja̱i̱ péṉker esekmarar kanarchamnia núnis átatui. 21 Nuyá̱ Uunt Yus Pirasím nainnium tura Kapauna pakari̱n kajek warí itiurkamia núnis kajektatui. Kame aents enentáimchamu takatan nekaachminia nuna túrataj tusa juárkittiawai. 22 Antsu yamaikia wishikiartuki̱ weerap nu arant kaki jiṉkiatmáwa̱i̱rum. Ashí Akupin Uunt Yusa nu ashí nuṉkanmaya̱ aentsnaka emeskaran amuktiniaitjiai tusar chícham najanamun antukuitjiai.
23 Émamkesrum winia chichamur antuktarum. Antú antut ajasrum wi títiatjarmena nusha péṉker antuktarum. 24 ¿Kame arakmausha arakmattsa nuṉkan pukuí tsair ju̱yu̱mak ajá ajakua aya kintiama? 25 Nuṉká iwiarak pakamá ¿antsu nui̱ṉkia enertun naṉkimiak nuyá̱ kuminiunka atsaamar tríkiuncha táurar naka awajsámunam chumpía sewatanka aratniua nui̱ arak yantamenka sentenun aratsuk? 26 Ní Yusri̱ṉ unuiniawai tura péṉkera nunasha Niṉki jintintiui. 27 Kame enertuka trikiu pakatái̱ji̱a̱i̱ pákashtainti tura kareta nawé̱ téter iniaṉkatchatainti kuminiusha. Antsu enertuka numiji̱a̱i̱ awattainti tura kuminiuka numi puyaachi̱ji̱a̱i̱ pakatainti. 28 Nekasaiti, araka jiṉkiái nekeakrisha iniaṉnatsuk nekeka pujurchatainti ántsarik pákakrisha paka pákakuar ki̱i̱ṉki̱ ajashtainti. Antsu kareta nawe̱ téter iniaṉkatkimkia nere̱n saepe̱ya̱ akanui túrasha tsayatsui. 29 Núnisaṉ jintinkiartutairi̱ṉkia tí peṉker tura nekaatairi̱sha ti shiir uunt áiniana ju̱ka Ashí Akupin Úunt Yusai̱ya̱ winiawai.