Jirimías
“Jutanmaya̱ shuaran wait ané anentú pimpirkijme” tawai Uunt Yus
15 15:1-6 Nuiṉkia Uunt Yus turutmiai “Muisais Samuirja̱i̱ Israer shuar waitnentrarai tusa seatainiakuisha Winia wakantruka jú̱ aentsja̱i̱ṉ pujuscharainti. Wi pujamunmaya̱ ji̱i̱ki̱ aju̱i̱tiá tura ininmainiakuisha ¿tui̱ṉ wéartaji? turamainiakui jú̱nisam tiartá. Jákatin wea nuka jákatniun wéarti tura mesetnum wéartin tusa anetkámu ainia nuka mesetnum wéarti. Nuyá̱ tsukanam wétin tusa anetkámu ainia nuka tsukanam wéarti tura achirtin tusa anetkámu ainia nuka achintratniunam wéarti tu ái̱kiarta. Kuatru yajauchiji̱a̱i̱ túratin anetkámu awai. Mesetcha ya̱wa̱sha nanamtincha yajasmasha yuáwar emeskartatui. Ashí uunt nuṉka mátsatka ainia nui̱ Manasés Jutanmaya̱ úunt akupin Jerusaréṉnum túrama nuja̱i̱ natsanmai̱ ártatui. Maa Jerusaréṉká amincha ¿yaki waitnentramprat? Ámeka Winia ikiurkímiame. Tura asakmin uwejrun iwiaintiukan emeskattajme. Warí wait ané anentú pimpirkijme” tawai Uunt Yus.
7 15:7-9 Winia shuaruka ashí emeskaram uchirtichu juákarash ni jinti̱ya̱ṉka Winí̱ peṉké waketkicharuiti. Núnisaṉ waje̱sha ti untsurí nayantsanam naikim írunna nunasha naṉkaamas ajasármai. Túrasha nunasha ni nemasri̱ íktusan iniaisartatjai tawai Uunt Yus.
Jirimías kúntuts nekapeak étserma
10 Tsej ju̱sha, winia nukuru, aya mánitniak pujurin aishmaṉ tura ashí nuṉkanmaya̱ shuarja̱i̱ kajernáin aentsua núnin takursaitme. Kame ikiamtanash ikiamsachu tura ikiattanash ikiattsachu áiniawai túrasha ashí shuar yumiṉkruiniawai. 11 Maa Uunt Yusá núnis atí. Kame itiurchat ámanum tura kúntuts pujamunmasha péṉker pujusárat tusan winia nemasrun Amiin chichamprukchaitkiuisha antsu nuiṉkia tuíniana núnisaṉ atí. 12 Kame araki̱a̱ jiru áiniana namincha jiru tura yaṉkú jiruncha ¿yaki tsuriṉminiait? 13 Nuiṉkia ame tunaarumiin ame kuítrum tura ashí kuit áiniana nu émamkesar ikiusma ashí ame nuṉkemíin írunna núnaka peṉké antraṉ atantrarti tusan íktusan iniaisattajai. 14 Túran yajá ámeka nékashtai̱ nuṉkanam ame nemasrumi iniatairi̱ awajsattajme. Warí, winia suíruka jiya núnis keekái tura atumíin kéektatui. 15 Maa Uunt Yusá Ámeka nékame. Wíniaka enentáimtursam waitnentrurta túram winia apapétainia nuyá̱ yapajmiátrukta. Antsu Ame suir kaje̱ntkamu nu arant ajakui junaki̱j. Warí, Ámin enentáimtakun natsanmai̱ wishikmai ajajna nuka Ámeka nékame. 16 Ame chichammin wainkiamjai túran yua núnikmajai. Ame chichammeka winia shiir enentáimtikrawai antsu enentái̱rui̱ṉkia waraajai. Warí, Ashí Akupin Uunt Yusá Ame náarmin wikia untsukmaitjiai. 17 Tura pujutnasha pujuschaitjiai núnisnak warainia núja̱i̱sha iruntrancha waraschaitjiai. Antsu wikia Ame uwejmíinkia wíchik pujajai. Warí, kajerú ajamai awajtúsuitme. 18 ¿Urukamtai wikia tuke najaimiasnaksha pujaj tura winia tsupimiamur tsuárchamnia nusha urukamtai péṉkerka ajatsu? Maa ¿nuiṉkia éntsaka pájatana núniniaitiatmekek éntsaka atsá núnin átatam wíji̱a̱i̱ṉkia?
Uunt Yus Jirimíasan ai̱kma
19 Tuma asamtai Uunt Yus chichaak “Winí̱ ame wáketkumni̱ṉkia Wisha núnisnak awaiṉkitiajme túram Winí̱i̱ eem wajastatme. Kame yajauchinmaya̱ṉka aya tí shiirmachia nuke akankámka antsu nui̱ṉkia Winia chichampru iniaṉkain átatme. Nekaska ni amiin waketrarti antsu ámeka niṉkia waketrukiaraip. 20 Kame yaṉkú jiruja̱i̱ wénuk wénuimiua nútiksan ju̱ aentsnum áminkia apujsattajme. Ámiji̱a̱i̱ mánaikiartatui túrasha nupettamkachartatui. Warí, ámin uwemtikran aṉkant awajsattsan Wi ámiji̱a̱i̱ṉkia pujuttajai” tíniuiti Uunt Yus. 21 Yajauch shuar ainia nuya̱ṉka aṉkant awajsan yajauch awajkartin netse shuar ainia nuya̱ṉka ata̱i̱ttiajme.