Jirimías
Israer shuar Seúnnum waketratin etserkamu
31 Uunt Yus chichaak “Nu tsawantinkia ashí Israer weanmaya̱ shuar ainia nuna Yusri̱ átatjai. Tura nisha Winia péprur ártatui.” 2 Uunt Yus chichaak “Israer shuar puya̱numia̱ uwemprarma nuka ayampratniun e̱a̱inia ásar atsú nuṉkanam waitnennararmai” tíniuiti. 3 Kame yáunchuk Uunt Yuska wíniaka wantintiurkamai tura chichartak “Winia aneṉkrattair náṉkatkachua nuja̱i̱ tuke aneemjame tuma asan Winia waitneṉkratairnaka iniaṉnatkachuitjiame. 4 Wats iistá, Israerá nuwa̱ch áishmaṉja̱i̱ tsaniṉcha núnisan áminkia ataksha iwiarkattajme túran ataksha je̱a̱mkattajme. Túramka shakapja̱i̱ iwiarmampram warainiak jantsemáiniana nui̱ amesha pachinkiattame. 5 Tura Samarianam ayantánmanum takakmasam uwa ataksha araktatme. Kame arakmaaka arakmakar nuna nere̱ja̱i̱ warasartatui. 6 Tura tsawant jeamtai Eprain nuṉkanam naint írunmanum jintia íistin awajsarma untsumainiak ‘Seúnnum ii Yusri̱ Uunt Yus weariartai’ tiártatui.”
7 Warí, Uunt Yus chichaak “Jakup enentáimtusrum warakrum ti shiir enentáimsatarum. Tura uunt nuṉka mátsatkamu uuntri̱ asarum warakrum kakantra untsumkatarum. Tura Yusa naari̱ shiir awajeakrum ‘Uunt Yusá ame pépruram Israer shuar juákaru uwemtikrarta’ tákuram paant ántumtikiatarum. 8 Wats nekaata, nuṉká arakaani̱ matsatutirmincha ikiankattajrume tura nuṉka náṉkatramunam matsatrum nuya̱ncha irurtatjarme. Nuiṉkia kusurúsha, shutuapsha tura nuwa̱ ajamtincha nuyá̱ takusárusha páchitra ártatui. Kame ti untsurí ju̱i̱ṉkia káunkartatui. 9 Kame útkiar káunkarmataisha atsaṉkrartatjai. Nuya̱ṉka péṉker wainiainiakun entsa írunmanumaani̱ ewekásartatjai. Tura jintiasha péṉker pakamkamu asamtai peṉké tukumkachartatui. Warí Wikia Israera Aparí̱niaitjiai. Tura Epraincha Winia uchir iwia̱i̱ri̱nchukait.
10 Maa, ashí nuṉkanmaya̱ shuartiram Uunt Yusa chichame̱ antukrum nayantsanam ayamach yajá matsatáinia nusha ju̱ nékamtikiatarum. ‘Uunt Yus Israer shuaran yajá tsakiṉmakarmia nuna ataksha irurartatui. Tura murikiu wáinin ni murikrí̱n irur wainia tímiatrus wáinkiartatui.’ 11 Warí niji̱a̱i̱ naṉkaamas kakaram armia nuya̱ṉka Uunt Yúskechuk Jakup shuarnaka akikmatak uwemtikraruit. 12 Kame káunkar Seun naintia tsakari̱n Yusa náari̱n shiir awajsártatui. Warí Uunt Yusa péṉkeri̱n yurumkan tura umutairi̱ yamarman nuyá̱ asuitin núnisaṉ murikji̱a̱i̱ waaká uchirí̱ncha tseke káutkartatui. Tuma asa aja entsa tuke ukatmá urukuit nuja̱i̱ métek átatui. Túmainiak atakka peṉké wáitsachartatui. 13 Nuya̱ṉka nuwa̱ natsach áishmaṉja̱i̱ tsaniṉcha ainia nuka áishmaṉ natsach tura uunt ainia nuímiak warainiak jantsemáwartatui. Warí kúntuts enentáimmiari̱ya̱ṉka shiir enentáimtikrartatjai. Tura najaimiainianak atsaṉkraran péṉker enentáimtikrartatjai. 14 Nuyá̱ Yúsnan pujurniunka naṉkaamas suíniakun ti péṉker ejematkiarartatjai. Núnisaṉ Winia shuaruka Winia péṉkerun wainiainiak ti ejemakar nútsurartatui” tawai Uunt Yus.
Eprain waketramu
15 Núnisaṉ Uunt Yus jú̱nis tawai “Kúntuts enentáimsar wáitiakur jakamnia utma Ramá peprunam ántuwawai. Núnaka Rakir uchirí̱n enentáimtus uutui. Kame uchirí̱n enentáimtus uutu asa atsaṉturara̱i̱ṉ tusasha peṉké nakitiawai. Warí uchirí̱ṉkia jákaruiti.” 16 Túrasha Uunt Yus chichaak “Rakirá úttsuk katsuntram itiatkata tura nea̱jkirmesha u̱ju̱jrata. Warí ame túramurminkia akikma átatme. Tuma asamtai ame uchirmeka ni nemasri̱ nuṉke̱ya̱ṉka waketkiar káunkartatui. 17 Núnisaṉ áminiu ukunam wainkiattamna nu nákasta. Kame ame uchirmesha ní nuṉke̱ni̱ṉ waketrar káunkartatui. Wi Uunt Yus asan nekas tájame” tímiayi. 18 “Tura Eprainkia kúntuts enentáimias jakamnia nekapeak chichartak ‘Waaka áishmaṉ yupiram jiṉkiachma asutiá awajtúkmame. Warí winia Yúsruka Uunt Yuska amekchakaitiam. Tuma asam amek awaṉtuktia amiini̱ṉ waketkitjiai. 19 Warí amiiya̱ kanakí̱ wekasan ti enentáimpramjai. Tura enentáimpran wi awajiamurun nekaaman kúntuts enentáimkiun makurún awatmiajai. Túran natsa asan peṉké netse túramajna nuja̱i̱ iniatsá̱ntran wishiknármajai’ úteawai. 20 Antsu nui̱kia ¿Eprainkia Winia aneamur tura ti shiir enentáimtamu uchirchakait? Warí kajerkan nin áujmatkunka nuna núkap enentáimtiniaitjiai. Tuma asan nin enentáimtakui̱ṉkia enentái̱r pútir awajtiniaiti. Tura Eprainnaka nekas waitnentrattajai” tawai Uunt Yus.
21 “Maaj, nuwa̱ natsach áishmaṉja̱i̱ tsaniṉcha Israerá, jintia nekaarum kaya apujra ikiutarum. Túrarum jintia péṉker nekaatarum nuke atumí pépruri̱i̱n waketramniuram. 22 Maaj, ántichu nuwa̱chí aya wekaikiní̱ ajawitmena aushá ¿urutáik sértiniaitiam? Kame imiá nusháa nuna Uunt Yus ju̱ nuṉkanam iniakmastatui. Nuwa̱ áishmaṉkan téntaktatui. Nuwa̱ yama anajmanairua núnis Israer ni Yusri̱n enentáimtustatui”* tawai Uunt Yus. 23 Nuyá̱ Ashí Akupin Uunt Yus Israera Yusri̱ jú̱nis tawai “Yajá yaruakma ataksha ikiankam Jutanam tura pepru nui̱ írunmanum matsamsarum nui̱sha tuke chichaakrum ‘Maa nekasa nuja̱i̱ métek túrutai̱ Yusa naintri̱ Uunt Yus shiir awajtámsati’ títiatrume. 24 Kame arakmausha tura murikiun yarumkiní̱ ajá ainia nusha Jutanam ashí pepru irunainia nui̱ iruntrar matsamsartatui. 25 Kame enentáiniam kakarmachu tura pimpiráru ainia nunasha Wi ikiaká̱rjai” Uunt Yus tímiayi. 26 Tumá pujusan mesekramkin shintiarmajai. Tura mash iimsamsha wi mesekrampramuka íi ajatauyi tímiayi Jirimías.
Yus aentsja̱i̱ yamaram chicham najanamu nekas umiktin
27 “Núnisaṉ tsawant jeamtai Wi Uunt Yus asan Israer nuṉkanam tura Jutanmasha shuarnaka nuyá̱ taṉkuncha ti ipiampárartatjai. 28 Kame tsuriaran tsai̱ tsai̱ tura emeskaran nekaachmin mui̱jmiai̱ yajauch awajsartajtsan émamkesaran iisarmaj tímiatrusarnak Israer shuaran iwiartukan je̱a̱mprukartaj tusan émamkesaran íisartatjai” tawai Uunt Yus. 29 “Núnisrumek nu tsawantinkia ‘Ni aparí̱nkia uwa churuinian yúawarua núnis wáitiainiakui uchirí̱ṉkia nai̱ tsuwararua núnisar wáitiainiawai’ títinkia atakka peṉké tichattarme. 30 Antsu aentska aṉkant aṉkant ní yajauchiri̱ji̱a̱i̱ṉ jákartatui. Ashí aents úwan churuinian yuinia nútiksaṉ ímia niṉki nai̱ tsuwararmatai wáitsartatui. 31 Tura tsawant jeamtai Israer shuarja̱i̱ tura ashí Jutá shuarja̱i̱ yamaram chichaman Wi najanattajai. 32 Kame Ejiptunam matsatainian eṉkesaran ji̱i̱rartaj tusan ni úuntri̱ji̱a̱i̱ chichaman najanamiaj nuna Wikia ni uuntri̱ ai̱ṉ Winia umirtuiniachu ásar chícham najanamun peṉké ántar awajsarmia núninchaiti” tawai Uunt Yus. 33 “Kame nu tsawant naṉkaamasmatai Israer shuarja̱i̱ chichaman najanattajna nuka ju̱i̱ti” tawai Uunt Yus. “Wi akupkámunka ni nekatairi̱nkia ikiursaran ni enentái̱nkia áatrartatjai. Tura Wikia ni Yusri̱ átatjai núnisaṉ nisha Wi shuar ártatui. 34 Nuya̱ṉka yaaksha ni shuari̱nkia yachi̱nkisha ‘Uunt Yus nékamek’ tusaṉka jintintiáshtatui. Warí peṉké uchichinmaya̱ṉ juárkin úuntaimiak ashí nekarawartatui” tawai Uunt Yus. “Warí ni yajauch túrukmari̱n Wi ashí tsaṉkuraran núnaka atakka peṉké enentáimtuschattajai.”*
35 Kame Uunt Yus ju̱nasha tíniuiti. Tsawái̱ tsáapin ajat tusa etsa̱n tura kashi tsáapin ajatniunka nantuja̱i̱ yaan ikiusarua nu núnisaṉ nayantsan umuchir tampari̱n uu awajmamtikna nuna náari̱nkia Ashí Akupin Úunt Yusaiti. 36 Tura Uunt Yus ju̱nasha tawai “Kame etsa̱sha nantusha yaasha nuyá̱ nayantsasha nu akupkámun umikcharmataiṉkia aya nuiṉ Israer shuarka uunt nuṉka mátsatkamu ajasárua nuka Wini̱ya̱ṉka tuke meṉkakarainti. 37 Núnisrumek yakisha nayaimp mash nekapmartin jeawakrumni̱ṉkia ántsarmek initcha nuṉka nájankur tui̱ juárkimiuit nusha ashí nekakaakrumni̱ṉkia antsu nuiṉkia ashí ni túrawarmanum Israer shuarnaka Wiki utsaṉkan iniaisaraintjiai. 38 Wats nekaatarum Uunt Yus ju̱nasha tawai. Tsawant jeattana nuiṉkia Ananér kumpinnium juárkimiuk Tsukin waiti tutaiya̱ tímianai Uunt Yusna pepru je̱a̱mnaktatui. 39 Tura nekapmatai̱ yaraṉka Kaarep náinniumaani̱ nákak wétatui nuya̱ṉka Jerusaréṉnum Kúa írutkamua nuní̱ ipijiáktatui. 40 Tura jákaru núnisaṉ yuṉkunim paka tutainiam je̱á̱ chaiki̱ paka áiniana nuyá̱ juárkimiuk Kitrun ashintsa tímianai núnisaṉ etsa̱ tatainmaani̱sha tsukintiaani̱ Kawái waiti tutaiya̱ tímianaisha ashí nú nuṉka Uunt Yusna akantúkma átatui. Nuya̱ṉka atakka tsuriarchamu tura emestasha peṉké emeskachma átatui” tawai Uunt Yus.