Jirimías

Jirimías Setekíasan ujakma

34 Napukutunusúr Papirúnianmaya̱ úunt akupin ashí ni suntari̱ji̱a̱i̱ tura ashí nuṉka Napukutunusúran umirin armia nuja̱i̱ tura nu arantcha ashí niisháa niisháa mátsatkamunmaya̱ aents Jerusaréṉkan núnisaṉ pepru ayatka téntak matsamármia nu mánit wéarmiayi. Nuya̱ṉka Uunt Yusa chichame̱ Jirimíasan tarimiayi. 2 “Wi Uunt Yus Israera Yusri̱ asan akupeajme. Setekías Jutanmaya̱ úunt akupin werim ujakum ‘Uunt Yus jú̱nis túramui timi ikiuta. Nekaata Wi ju̱ péprun ekemakat tusan Papirúnianmaya̱ úunt akupniui̱ íktusan iniaiyajai. 3 Ámeka ni uwejé̱ya̱ṉka ú̱mkashtatme antsu ti nekas achintkiattame túrutma ni uwejé̱n súamuitme tura ame jí̱miji̱a̱i̱ Papirúnianmaya̱ úunt akupniu ji̱ wainkiattame tura yapí̱a áujtamsattawai nuyá̱ Papirúnianam waya̱ttame’ titiá. 4 Túmaitiat Setekíasa ámeka Jutanmaya̱ úunt akupniu ju̱ ashí antukta. Warí Uunt Yus jú̱nis túramui ‘Mesetnumka jákashtatme. 5 Antsu aṉkant pujusam jakattame. Yaunchu ame úuntrum jákarmatai ekemátkarma núnis amincha jakakmin kuṉkuinian ekemátramkartatui. Tura aents e̱a̱nmak chichartamainiak “Maa uuntru” turamartatui.’ Wikia nuna chichakuitjiai” tawai Uunt Yus.

6 Yúsnan etserin Jirimías Jutanmaya̱ úunt akupniun Setekíasan ashí ju̱ chichaman Jerusaréṉnum ujakmiayi. 7 Papirúnianmaya̱ úunt akupniu suntari̱ Jerusaréṉkan tura Jutá pepru juákaru armia nuna Rákisja̱i̱ Asekan jatekármiayi. Jutanam aya ju̱ pépruka péṉker wenuimiu ásar juákarmiayi.

Israer shuar iniatai̱ aṉkant tuke súsachma

8 Uunt Yusa chichame̱ Jirimíasan tarimiayi. Kame Jerusaréṉnumia̱ aentsu úunt akupniuri̱ Setekías ashí Israer shuarja̱i̱ aṉkant awajnástin chichaman najanawarmiayi. 9 Túrawar aṉkant aṉkant ashí Israer shuar ni takamtiktairi̱n áishmaṉnasha tura nuwa̱ncha Israer shuarnaka íniakur wáitkiatai̱nmaya̱ṉka aṉkant akupnákarti tusa chícham najanamun Setekías etserkamiayi. 10 Tura aṉkant awajnástin chícham najanamun ashí Israera úuntri̱sha núnisaṉ ashí shuar pachinkiarmia nusha antukar uminiak ni takamtiktairi̱n nuwa̱ncha áishmaṉnasha aṉkant akupkarmiayi. 11 Nuna túrawariat awake enentáimprar ni takarniúri̱ nuwa̱ncha áishmaṉnasha Israer shuar armia nuna ataksha awakear ikiankar iniatai̱ awajsar takamtikiarmiayi.

12 Nuya̱ṉka Uunt Yusa chichame̱n Jirimías étseruk 13 Israer shuara Uunt Yusri̱ chichaak “Ejiptu nuṉkanam íniakur wait ajá pujuinian ji̱i̱raran atumí we̱a̱trí̱ji̱a̱i̱ chichaman nájankun jú̱nisan najanamiajai. Tura nin chicharainiakun 14 ‘Israer shuarnumia̱ iniatai̱ pujuinia nuka sais uwí takamtiksarum tura siati uwitinkia atumíya̱ aṉkant akupkatarum. Túrasha atumí we̱a̱trí̱ṉkia nuna antukaruitiatcha peṉké umikcharuiti. 15 Nuyá̱ Winí̱ waketkirum Winia naar pachisar Winia Shiir Awajtai̱ Je̱e̱rui̱ tu anaikiamua nu Wi íimmianum atum shuar iniatai̱ pujuinia nu aṉkant awajsartai tama chícham najanamarmena nuka nekas péṉker túramarme. 16 Túrayatrum íksarmek Wini̱ya̱ kanakrum arantúrtsuk yajauch chichartukrum chícham najanamarum nusha iniaisarum aṉkant aṉkant atumí iniatairi̱ áishmaṉnasha nuwa̱ncha nuna wakeruiniakui aṉkant akupkáyatrum ataksha awaiṉkirum iniatai̱ awajsarum takamtiksamarme.’

17 Núja̱i̱ṉkia Wi Uunt Yus asan tájarme. ‘Átum aṉkant aṉkant atumí yachi̱sha tura írutramuri̱sha iniatai̱ram matsatainia nu nekas aṉkant akupkachu asarum aṉkant awajsatin chicham najanamu umirtukchaitrume. Túrachu asakrumin Wikia íksanak atumín aṉkant akupáiniakun mesetja̱i̱sha, suṉkurja̱i̱sha tsukaja̱i̱sha ashí nuṉkanmaya̱ akupeamu ainia nunasha peṉké tsuumaiji̱a̱i̱ kúntuts pujusuk tusan tsaṉkatkattajrume. 18 Ju̱ shuar Wi íimmianum chichaman najanawar nekas umiktatji tiáruitiat umikcharunka waakan máwar jímiapetek nakakar ajapén wekasarmia nunasha 19 tura Jutanmaya̱ núnisaṉ Jerusaréṉnumia̱ shuara úuntri̱n ashí ni takarniúri̱miak nuyá̱ Yúsnan pujurin tura ashí nuṉkanmaya̱ aents waaka máwar jímiapetek nakakar ajapén wekasaruncha 20 ni nemasrí̱ peṉké waitnenkartichu ainia nu nú aentsun amukarti tusan íktusartatjai. Nuna túramtai ni aya̱shí̱ṉkia yakiya̱ nanamtin núnisaṉ nuṉkaya̱ yajasma yukartin ainia nu yuáwartatui. 21 Tura Jutá shuara akupniúri̱n Setekíasnaka ashí suntari̱miak núnisaṉ maṉkartin ainia nunasha ni nemasrí̱i̱n íktusartatjai. Núnisan Papirúnianmaya̱ akupniu suntarí̱i̱n mesetan iniaisarmia nui̱ surukartatjai. 22 Pai, yamaikia mesetan iniaisarma nu suntarnaka ju̱ péprunam wi atak taartí tusan akupkáttajai. Tura mánaikiar utsantua jiji̱a̱i̱ ekemákartatui. Tura Jutá nuṉkanmaya̱ pepru írunna nuna emeskan pujuschamnia awajsartatjai.’ Wi Uunt Yus asan tajai” tímiayi.