Jirimías

Jirimías Jetaríasja̱i̱ juakma

40 Kame úunt akupniu wainniu kapitiántri̱ Napusaratán aentsun Jerusaréṉnumia̱n tura Jutanmaya̱ncha achir Papirúnianam yarumuk Ramanmaya̱ akuprámia nui̱ Jirimíaska jiruja̱i̱ jiṉkiamu pujan Uunt Yusa chichame̱ tarimiayi. 2 Nuya̱ṉka úunt akupniu wainniu kapitiántri̱ Jirimíasan péṉker enentáimturmiayi tura chicharuk “Uunt Yus ame Yúsrum ju̱ nuṉka emesnaktinniaka etserkamiayi. 3 Tuma asa Uunt Yusak jú̱tikiayi. Tura ni chichame̱nka ashí umikiai. Warí átumka tunáa túrakrum ni chichame̱nka peṉké anturkachuitrume. Tuma asarum átumka jú̱nikiurme. 4 Túrasha ju̱ nekaata, jiruja̱i̱ uwejmíin jiṉkiamuitmena nuya̱ntka yamái aṉkant awajeajme. Tura Papirúnianam wiji̱a̱i̱ winitin wakerakmeka páchitsuk winitiá. Túrunawakminkia wi áminkia wainkiattajme. Antsu Papirúnianam wiji̱a̱i̱ winitin nakitiakmeka iniaisata. Túrasha ashí nuṉkanam íimsata aṉkantaiti. Tura ame tui̱ pujustin wakeram nui̱ wetá” tímiayi. 5 Tútaisha Jirimíaska wakettsuk pujakui nuya̱ṉka chicharuk “Papirúnianmaya̱ úunt akupin Jutanam pepru írunna nui̱ akupkat tusa Sapana uchirí̱ Ajikman uchirí̱n Jetaríasan anaik ikiukniua nui̱ waketkitia. Tura péprunam pujusta núja̱i̱nchuka ame tui̱ wétin wakeram nui̱ pujusta” tímiayi. Tura úunt akupniu wainniu kapitiántri̱ yurumkancha tura ántar súsatniuncha sura péṉker wetá tinia akupkámiayi. 6 Nuyá̱ Jirimíaska Ajikma uchirí̱ Jetaríasai̱ Míspanam wémiayi tura péprunam aents juákaru matsamia nui̱ nisha pujusmiayi.

Jetarías Jutá nuṉka uuntri̱ awajsamu

7 Tura ashí suntara uuntri̱ péprunam ayamach pujuarmia nusha núnisaṉ suntarí̱sha Papirúnianmaya̱ úunt akupniuka áishmaṉnasha nuwa̱ncha tura uchincha núnisaṉ peṉké kuítrincha Papirúnianam yaruakcharma juákaru matsatainiam wáinkiarat tusa Ajikma uchirí̱ Jetaríasan nuṉka uuntri̱ awajás ikiukniuiti táman antukarmiayi. 8 Kame Míspanam Jetaríasai̱ wéarmia nuka ju̱ ármiayi, Netaníasa uchirí̱ Ismaer tura Karea uchirí̱ Jujanán Junatánja̱i̱ nuyá̱ Tanjumítia uchirí̱ Serayás núnisaṉ Netujanmaya̱ Epái uchirí̱ armia nusha ántsaṉ Máakanmaya̱ aentsu uchirí̱ Jasanías. Ju̱ shuar ni suntari̱ji̱a̱i̱ Jetaríasai̱ ashinkiarmiayi. 9 Nuya̱ṉka Sapana uchirí̱ Ajikma uchirí̱n Jetarías nekas tajai tusa nincha tura áishmaṉ niji̱a̱i̱ pujuarmia nuna chicharainiak “Kartíu aents ainia nu umirkatin ashamkairap. Ju̱ nuṉkanam pujustarum túrarum Papirúnianmaya̱ úunt akupin umirkatarum túmakrumka péṉker matsamsattarme. 10 Tura ju̱ nekaata Kartíu aents iiní̱ kaunenakui yaiṉkiartaj tusan wikia Míspanam pujajai. Antsu átumka winiu achikrum tura yuraṉ esatái̱ neren ainia nusha júukrum núnisrumek asuitisha achikrum atumí ichiṉnarin yarakrum átum pepru ata̱i̱niaitrumna nui̱ṉ matsamsatarum” Jetarías timiayi. 11 Núnisaraṉ ashí Jutanmaya̱ aentska Amunka tura Etuman uchirí̱ matsatainiamunam Muápnum pujuarmia nusha tura ashí nuṉkanam matsamármia nusha Papirúnianmaya̱ úunt akupin wárumchik aentsnak Jutanmaṉka ikiukiarai tura nú aentsun wáinkiarat tusa Sapana uchirí̱ Ajikma uchirí̱n Jetaríasan uuntri̱ awajás ikiukní̱ táman antukarmiayi. 12 Túrunamtai Jutanmaya̱ aentska ashí nuṉkanam tsakiṉmakma matsamármia nuka ashí waketrar káunkarmiayi. Tura Jutá nuṉkanam Jetaríasai̱ Míspanam ashinkiarmiayi. Túrawar winiuncha tura yuraṉ esatái̱ neren áiniana núnaka tí nukap júukarmiayi.

Jetarías maamu

13 Tura Karea uchirí̱ Jujanán tura ashí suntara uuntri̱ nuṉká matsamin armia nu Jetaríasai̱ Míspanam wéarmiayi. 14 Túrawar chicharainiak “Ámin mantamat tusa Amun aentsu úunt akupniuri̱ Páaris Netaníasa uchirí̱ Ismaeran ¿akupka nu nékamek?” tímiayi. Túrasha Ajikma uchirí̱ Jetaríaska “nekasapi” túrutua tuuka enentáimprachmiayi. 15 Nuya̱ṉka Míspanam Karea uchirí̱ Jujanán Jetaríasan ú̱san chicharuk “Wi werin Netaníasa uchirí̱ Ismaernaka maan ikiutaj tsaṉkatrukta. Túrasha núnaka yaaksha nekashtatui. ¿Urukamtaik mantamatⁱ? túrutmawarmatai̱ṉka ámin Jutanmaya̱ shuar irunturmararainia nuka pisakártatui. Túrunawar Jutanmaya̱ juákartatna nuka tsakiṉmakar ashí amuukartui” tímiayi. 16 Tura Ajikma uchirí̱ Jetarías Karea uchirí̱ Jujanánan chicharuk “Ismaeran mátaj támena nuka túrawaip. Warí Ismaerna ame támena nuka wáitiaiti” tu ai̱k iniaisámiayi.