Jirimías
Jirimías Jutanam tuke matsastarum tama
42 Ashí suntara uuntri̱ Karea uchirí̱ Jujanán tura Usayása uchirí̱ Jasanías* núnisaṉ ashí aents ékechinmaya̱ juarki̱ úuntaimiak iruntrarmiayi. 2 Tura Yúsnan etserniun Jirimíasan chicharainiak “Waitneasam Uunt Yus ame Yúsrum ii ishichik juákaru ájinia ju̱ seakrattia. Yáunchuka ti untsuríyaji túmaitiatar yamaikia ishichik juákarji. Ame wáinmena jú̱ketji. 3 Tura iikia itiur wétiniaitiaji tura warí itiurkatniuitiaji Uunt Yus ame Yúsrum seatkartitia” tiármiayi.
4 Tutai Jirimías aya̱k “Antukjai. Átum tárumna nútiksanak atumí Uunt Yusri̱n seattiajrume. Uunt Yus turuttiatna núnaka ú̱rtsuk ímiatrusnak paant ujaktatjarme” tímiayi. 5 42:5-6 Nuyá̱ Jirimíasan chicharainiak “Imiá nekas Uunt Yus iin ujaktinian akuptámkamajnia núnaka umirkacharuitkiurnisha péṉkeraitkiuisha tura itiurchataitkiuisha ashí takamtsuk umireachkurni̱ṉkia Uunt Yus imiá nekas asa tura yapajcha asa iin iirmasartai. Iikia péṉker pujustaji tusar imiá nekas ii Uunt Yusri̱ tana nuke umirkattaji” tiármiayi.
7 Tias tsawant amúamunam Uunt Yusa chichame̱ Jirimíasan tarimiayi. 8 Tura Karea uchirí̱ Jujanán tura ashí suntara uuntri̱ niji̱a̱i̱ pujuarmia nuna nuyá̱ ashí aents ékechinmaya̱ úuntaimiak untsukarmiayi. 9 Tura chicharuk “Uunt Yus Israera Yusri̱ átum Winia nin seat tusarum akupkámarmena nu jú̱nis tawai. 10 ‘Ju̱ nuṉkanam tuke matsamsartatji tí nekas tákurminkia atumín yajauch túraitjiarmena nuna atak enentáimprattajai. Kame ipiampátnasha ipiampártatjarme tura emestanka emesrashtatjarme. Araamua núnisrum átatrume túrasha ju̱ nuṉkanmaya̱ṉka tsuriṉchattajrume. 11 Kame Papirúnianmaya̱ úunt akupniuka ashamarmena nu ashamkairap. Wi atumí uwemtikrattsan atumji̱a̱i̱ pujajai túran ni uweje̱ya̱ aṉkant awajsattajrume’ tawai Uunt Yus. 12 ‘Atumniaka núnisnak waitnentrattajrume. Nisha atumín waitnentramprarat tusan atumí nuṉke̱ni̱ṉ awaṉtamkiartatui. 13 Tura átum chichaakrum “Ju̱ nuṉkanmaṉka pujuschartatji.” Uunt Yusa chichame̱ atumí Yusri̱ umirtsuk chichaakrumni̱ṉkia 14 “Atsá antsu Ejiptu nuṉkanam wétatji. Warí aiṉkia mesetcha tura kachu umpuamusha atsuttawai yurumkaja̱i̱sha tsukamashtatji tura nui̱ matsamsartai tusarum wéakrumni̱ṉkia” 15 nuiṉkia Jutanam juákaru árumna nu Uunt Yusa chichame̱ antuktarum. Ashí Akupin Uunt Yus Israera Yusri̱ jú̱nis tawai. Átum Ejiptu nuṉkanam wetái tákurmeka nui̱ pujustai tusarum wetarum. 16 Tura Ejiptu nuṉkanam meset ashamarumna nuka ímianaisha mesetka átatui. Núnisaṉ tsukasha Ejiptunmasha amaintiámkartatui tura átumka nui̱ṉki kajiṉtatrume. 17 Ashí shuar nui̱ matsamsatai tusar Ejiptunam wétinian wakeriarma nuka mesetja̱i̱ tsukaja̱i̱ tura suṉkurja̱i̱ jákartatui. Núja̱i̱ṉkia iwiaakuka juákchartatui tura Wi ti yajauchin nin itiariártatjana nuiṉkia yáakesh ú̱mkatniuka atsuttawai’ tawai Uunt Yus” Jirimías tímiayi.
18 Jirimías tuke chichaak “Ashí Akupin Uunt Yus Israera Yusri̱ chichartamuk ‘Ejiptunam pujustai tusarum wéakrumni̱ṉkia Winia suir kajetáirja̱i̱ Jerusaréṉnum matsatainian itiurkarmaj nútiksanak Winia kajetáirun atumín ukatrattajrume. Tura yumiṉkramu asarum kajertai̱ nuyá̱ yajauch chichartai̱ tura natsan awajtai̱ átatrume. Nuyá̱ atakka jú̱ nuṉkaka apajá̱srumsha peṉké íischattarme’ tawai. 19 Maa Uunt Yus Jutanam juákaru árumna nútirmin jú̱nis túramprume ‘Ejiptunmaṉka wérap.’ Péṉker nekaatarum. Yamái atumín paant tájarme. 20 Warí, atumek anaṉmamprume. Kame átumka atumí Yusri̱n Uunt Yusai̱ akuptúkmarme tura chichaakrum ‘Ii Yusri̱ Uunt Yus seatkrattia. Tura Uunt Yus ii Yusri̱ ashí turamtiatna nuka iin nekamtikiartuatame. Túrawakmin iikia umikiar nuka túrattaji’ tímiarme. 21 Tura yamái ujakjarme túrasha Uunt Yus atumí Yusri̱ chichame̱sha peṉké anturkachuitrume tura ujakárta tusa akuptúkmiania nusha umirkachuitrume. 22 Antsu yamaikia ti nekas nekaatarum. Nu nuṉkanam werí matsamsatai tárumna nuiṉkia mesetja̱i̱ tsukaja̱i̱ suṉkurja̱i̱ kajiṉtatrume” Jirimías tímiayi.