Jirimías
Israer shuar Ejiptunam pujuinian Jirimías ujamu
44 Ashí Israer shuar Ejiptu nuṉkanam Mikturnum Tápnisnum Mímpisnum tura Pátrusnum matsamármia núnan Jirimíasai̱ chícham tarimiania nuka chicharuk 2 “Ashí Akupin Uunt Yus Israera Yusri̱ chichaak ‘Jerusaréṉnum tura Jutanam pepru írunna nui̱ ashí yajauchin itiariarmajna nuka atumsha wáinkiaitrume. Nekaata, yamaiya̱ ju̱i̱sha tuke emeskamu ásarmatai nu nuṉkanmaṉka aentsush matsatainiatsui. 3 Yajauchin túruiniak Wíniaka akajtukarmayi. Warí, kuṉkuinian áestuiniak chíkich yusan nisha nékainiachiat tura atumsha nekaachman núnisaṉ atumí aparí̱sha nekaacharman enentáimtusarmiayi. 4 Wikia yaunchu tura iniaitsuk ashí winia takartin Yúsnan etserniun atumín chichartamuk “Ju̱ yajauchin Wi muí̱jiamu iyajna nuka túrawairap” túramprume turamarat tusan tuke akuptínjiarme. 5 Túrasha átumka antutcha antukchamarme antsu atumí yajauchiri̱ṉkia iniaitsuk antsu nékashtai̱ yus ainia nu kuṉkuin áestuamarme. 6 Túmakrumin Wi suir kaje̱ntkamusha naṉkatukai túran Jutanam pepru írunna nuna tura Jerusaréṉnum paasa jintia írunna nunasha kajerkaran kéerkaitjiai. Tuma ásar emesnakar yamái ana núnisar aya jú̱nik juákaruiti.
7 Tura yamaikia Ashí Akupin Uunt Yus Israera Yusri̱ chichaak “¿Urukamtai atumkesha timiá yajauchisha awajmamprum Jutanmaṉka áishmaṉsha nuwa̱sha uchi muntsúakusha emesnakartincha? Túmakrumsha chikichkisha iwiaaku juáktimpiash. 8 ¿Urukamtai Ejiptunam matsamsarmesha atumí uwejé̱ja̱i̱ najankarum yúsaiti tusarum chíkich yus kuṉkuin áestakrum akajtukmarum? ¿Túrunarum átumka ashí amunkarum yumiṉkramu núnisrumek ashí aents uunt nuṉka mátsatkamunmaya̱ wishiktai̱ ártincha? 9 Kame atumí aparí̱ yajauchiri̱ṉkia nuyá̱ Jutanmaya̱ úunt akupniu tura ni nuwé̱ yajauchiri̱sha núnisrumek atumí yajauchiri̱sha ántsaṉ atumí nuwé̱ Jutanam tura Jerusaréṉka paasa jinti̱n yajauchin túrawarma ¿nuka kajinmátkimkiarum? 10 Átumka yamaiya̱ tímiaja̱i̱sha péejchachikia ajascharme. Ashamprutcha ashamprukcharme túmakrum Wi akupkámusha tura umikrum chichaman atumíin tura atumí aparí̱i̱n ikiusmaj nuja̱i̱ wekasachu asarum umitcha umikchaitrume”’ tímiayi.
11 Tuma asa Ashí Akupin Uunt Yus Israera Yusri̱ chichaak ‘Nekaata, Wi atumniaka yapíattajrume yajauch awajsattsan tura Jutanka emeskattajai. 12 Tura Jutanmaya̱ juákaru Ejiptunam matsamsatai tusar ní wakerusar ashinkiarma nunasha ashí amukártatjai Ejiptunmaṉ. Kame puya̱ja̱i̱ mantamná tura tsukái kají̱ ajainiak uchichinmaya̱ṉ juárkiṉ uuntcha amú amú ajasártatui. Túrunarum átumka aents pachisar yumiṉtai tura yumiṉkramua ántsarmek iisar ashamtai núnisrumek wishiktai̱ ajastatrume. 13 Núnisnak Jerusaréṉnumia̱n asutiáwarmajna nútiksarnak Ejiptunam pujuiniana nunasha mesetja̱i̱ tsukaja̱i̱ tura suṉkurja̱i̱ Wikia asutiáwartatjai. 14 Tura Jutanmaya̱ wárumchik juákaru Ejiptunam pujustai tusar ashinkiarma nuya̱ṉka yaaksha pisarchattawai. Núnisaṉ Jutanam waketki̱ pujustinniaka ti wakeruiniayataṉ tujintkiartatui. Warí, chikichkisha iwiaakuka juákchattawai. Kame, peṉké waketkichartatui antsu wárumchik pisarárua nuke waketkiartatui’ tawai” tímiayi.
15 Nuyá̱ ni nuwé̱ najankamu yusan kuṉkuinian áestuinian aents nékarmia nuka tura ashí nuwa̱ nui̱ matsamármia nusha tí untsurí iruntraru núnisaraṉ ashí shuar nui̱ Ejiptu nuṉkanam Pátrusnum matsamármia nu Jirimíasan aya̱k chichainiak 16 “Uunt Yusa naari̱ pachisam iin chícham ujakratkamna nuka áminkia peṉké antukchartatji. 17 Antsu ii wene̱ya̱ chichakma jiinia nuke nekaska túrawartatji. Nayaimpinmaya̱ nuwa̱ úunt akupin kuṉkuin áestakur umutai̱ áiniana nusha ukatáiniakur ii túrutairi̱ tura ii úuntri̱sha núnisaṉ ii úunt akupniuri̱sha ántsan pepru uuntri̱ túrin armia nútiksarik iisha Jutanam pepru írunna nui̱ṉkia tura Jerusaréṉka paasa jinti̱ncha túrawartatji. Warí nu túrakur ti taramkar nukap yurumár ejemararar péṉker pujusármaji tura yajauchikia peṉké wainkiacharmaji. 18 Kame nayaimpinmaya̱ nuwa̱ úunt akupin kuṉkuin áestuatin tura umutai̱ áiniana nusha ukatratin iniaisarmaj nui̱ ashí tátramsaruitji núnisrik mesetja̱i̱ tura tsukaja̱i̱ amú amusmaitji” tiármiayi. 19 Tura nuwa̱ chichainiak “Kame nayaimpinmaya̱ nuwa̱ úunt akupin kuṉkuin áestakur ukat wéarmiaj nuka ¿ii áishri̱ṉkia nékainiatsa̱i̱ṉkik paṉ najanainiakur ni yapí̱ najatkarar ú̱mkarik ukat wéarmiaji?” tiármiayi.
20 Nuya̱ṉka Jirimías ashí áishmaṉnasha nuwa̱ncha aimiainiak tu chicharmia nuna ashí aentsun chicharainiak 21 “Kame Jutanam pepru írunna nui̱ tura Jerusaréṉka paasa jinti̱ncha kuṉkuin áestuar umutai̱ áiniana nusha ukatáiniakur atumsha tura atumí úuntri̱sha núnisaṉ atumí úunt akupniuri̱sha ántsaṉ atumí pépruri̱ úuntri̱sha núnisaraṉ ashí nuṉkanmaya̱ aents túriarmia núnaka ¿Uunt Yuska peṉkeash kajinmatkin núja̱i̱ṉchuka áyatkisha enentáimtsuatska? 22 Warí, yajauch tura mui̱jmiai̱ áiniana nu átum túramarmena nuna nú arant katsunkí̱ wétinian Uunt Yuska peṉké tujintkiamai. Tuma asa atumí nuṉke̱ṉka aya jú̱nik juak ashammai ajas tura yajauch yumiṉkramu asa yamái urukuit núnis áentsri̱ncha ajasuíti. 23 Kuṉkuin chíkich áestakrum Uunt Yus akajkarum yajauch túraitrume. Túrakrum Uunt Yusa chichame̱sha umirkachuitrume. Núnisrumek Ni akupkámuri̱ umiktin chichamja̱i̱sha wekasachuitrume. Ántsarmek Ni chichame̱sha nuyá̱ etserkamuri̱sha umirkachuitrume. Tuma asa átum umikchamunam yamái jú̱ tsawant itiurchat wáintrumna ju̱ka tarutrámniuitrume” tímiayi Jirimías.
24 Nu arantcha Jirimíaska ashí aentsun tura ashí nuwa̱n chicharainiak “Jutanmaya̱ shuar Ejiptunam matsatrumna nútiram Uunt Yusa chichame̱ ashí antuktarum. 25 Ashí Akupin Uunt Yus Israera Yusri̱ chichaak ‘Atumsha tura atumí nuwe̱sha atumí wene̱ja̱i̱ṉ chichakmarme tura atumí uwejé̱ja̱i̱ṉ umíakrum chichakrum “Ii chichakuitjinia nuka táamtsuk umíakur nayaimpinmaya̱ nuwa̱ úunt akupniuka kuṉkuin áestuar umutai̱ áiniana nusha ukatrartatji” tárume. Tusarum ii tájinia nuka nekas umikiartatji tau asarum nekas túrarme’ tímiayi. 26 Tuma asarum Jutanmaya̱ shuar Ejiptu matsatrumna nútiram Uunt Yusa chichame̱ ashí antuktarum ‘Ju̱ nekaatarum’ tawai Uunt Yus ‘Wi, Winia naar ti uunta nuna pachisan nekas túrattajai tákun ashí Ejiptunmaṉka Winia náarnaka atakka peṉké páchichu ártatui. Kame Jutanmaya̱ aentska yaaksha “Ii uuntri̱ Uunt Yuska iwiaakui” turutchartatui tawai’ tímiayi. 27 ‘Ju̱sha nekaata. Kame niṉkia Wi wainiainiajai túrasha péṉker árat tusancha antsu emeskartajtsan. Jutanmaya̱ shuar Ejiptunam ashí matsatáinia nuka chikichkisha juáka̱i̱ṉ tusar mesetja̱i̱ tura tsukaja̱i̱ amú amú awajnásartatui. 28 Kame puya̱ja̱i̱ mácharma pisaráru wárumchik juákarua nuka Ejiptunmaya̱ Jutanam waketrar kaunkartatui. Antsu nui̱ṉkia Jutanmaya̱ shuar juákuru Ejiptunam matsamsatai tusar waya̱warua nuka Winia chichampruash núja̱i̱ṉchuka ni chichame̱ya̱sh uminkiat nuna nekaawartatui. 29 Kame ju̱ja̱i̱ paant átatui’ tawai Uunt Yus ‘Ju̱ nuṉkanmaṉ asutiátajrume nuja̱i̱ Wi atumín tájarmena nuka nekas uminkiattana nuka paant nekaattarme.’ 30 Uunt Yus jú̱nis tíniuiti ‘Ju̱ nekaatarum, Jutanmaya̱ úunt akupniun Setekíasan Papirúnianmaya̱ úunt akupin Napukutunusúra uwejé̱e̱n íktusmiajai. Nútiksanak yamaikia ni nemasri̱ mátaj tusar ni iwiaakmari̱n e̱a̱tainiana nui̱ Ejiptunmaya̱ úunt akupin Parauṉ Úprancha ni nemasri̱ uwejé̱n íktusan iniaiyajai’ Uunt Yus tíniuiti” tímiayi.