Jirimías
Papirúnia wáitkiasma átatna nu
51 Tura Uunt Yus chichaak “Papirúnianmaya̱n Kartíu aentsun emeskartinian akupkartatjai. 2 Nuyá̱ Papirúnia aentsnaka ni nemasri̱ káutak trikiu tsatsamman mayai̱ kakaram umpuí ashí utsaṉ tsakiṉmana áitkias tsakiṉmakartatui. Warí wáitniastin tsawantinkia untsurí nuṉkanmaya̱ nemasri̱ káutkar téntakartatui. 3 Tura tíshimkiuja̱i̱ mánintiram iwiarnartarum nuyá̱ mesetnum entsatai̱ jiru entsartarum. Tura Papirúnianmaya̱ nátsaka waitnentsuk suntari̱miak ashí amuktárum. 4 Núnisaṉ Kartíu aentsu nuṉke̱nka jákarusha tura ijiumu jáiniasha jintiá tepetar ajartatui. 5 Kame Jutanam tura Israer shuara nuṉke̱n peṉké tunaarincha Yus iisam ti tunáa ai̱ṉ Ashí Akupin Uunt Yusri̱ya nu peṉké iniaisacharuitjiai” tawai Uunt Yus. 6 Tuma asamtai yamaikia Papirúnianmaya̱ṉka pisartarum. Tura atumsha Uunt Yus ni tunaari̱n asutiáwartatna nui̱ jáka̱i̱rum ni túrawarmania nuja̱i̱ métek yapajmiátkattana nú tsawant jeayi. 7 Núnisaṉ Papirúniaka ashí nuṉkanmaya̱ aentsun ánampeak kuri piniṉkrua ánis winia uwejrui̱ pujumai. Kame ashí nuṉkanmaya̱ aentsun nú wíniun árar wáurmamtikiarmai. 8 Túrasha ti wárichik Papirúniaka yumpunar tsai̱ tsai̱nia ajasmai. Yamaikia ni e̱a̱rtarum tura tsuak itiartiarum ni najaimiamuri̱ tsuámarminiaitkiuṉka tsuámarainti. 9 Kame Papirúniaka tsuakri̱sha peṉké tujintkiaitji. Ikiukir ju̱ya̱ṉka aṉkant aṉkant ii nuṉke̱ni̱ṉ waketrartai. Warí ni tunaari̱kia piak nayaimpiniam jeastatuk ajasái. Túruna ni asutniátniuri̱ jeayi. 10 Ju̱ka nekasa nuja̱i̱ Uunt Yus seamajnia nuna paant iniakturmasji. Yamaikia Uunt Yus ii Yusri̱ túrana nu Seúnnum etserutai winitiárum tiártatui. 11 Yamaikia naṉki atsakkarum tantarumji̱a̱i̱ iwiarnaktarum. Kame Uunt Yus yajauch chicharkur ni je̱e̱ emeskamunam yapajmiák Papirúnian amuktaj tusa arakaani̱ Mitia nuṉkanam matsatainia nuna akupniúri̱ enentái̱n chicharsarai. 12 Warí Uunt Yus Papirúnianmaya̱ aents nuní̱ amuktinian yaunchu iwiaraiti. Pai, yamaikia mesetan émtin untsurí juurum jintiá akirtukrum tura jintiá iincha awajtúsrum Papirúnia wenuke̱ téntaktarum. 13 Maaj, untsurí entsa írunmanum ajapén pujusam ti kuítrinniuitiatam yamaikia amukatniuram jeayi. 14 Jú̱naka Ashí Akupin Uuntri̱ Uunt Yusri̱ nekas umiktatjai tusa chichaak “Ame nemasrum nupettamkat tusan manchia núnis untsurí aentsun akuptúrtatjame tura nupetkaji tusar kakaram kantamáwartatui” tímiayi.
Yus kantamprutai̱
15 Tura Uunt Yus ni kakarmari̱ji̱a̱i̱ nuṉkan najanamiayi. Núnisaṉ ni nekatairi̱ji̱a̱i̱ nuṉká irunainia nuna tura enentáimtairi̱ji̱a̱i̱ nayaimpiniam irunainia nunasha najankamiayi. 16 Tura Ni chichaakuinkia yumisha nayaimpiniam téter ajainiatsuk nuyá̱ yuraṉmincha nuṉka náṉkatramunmaya̱n yakí̱ iwiachukait. Núnisaṉ yumincha peemja̱i̱ cháarpiji̱a̱i̱ yútumtikchakait tura mayaincha ikiusua nuya̱n akupchakait. 17 Ashí aents ni enentáimsachmaja̱i̱ṉ peṉké nékachu ajáu áiniawai. Kame ya ántar yusan yúsaiti tusa najanainia nuka niṉki anaṉmamainiawai. Nu najanamu ainia nusha iwiaakchaitiat ti anaṉkartin áiniawai. 18 Nuka peṉké ántrar wishikmai najankamu ásar asutniátin tsawantin amuukartatui. 19 Antsu Jakupu Yusri̱ṉkia aushaiti. Niṉkia ashí irunainia nuna najankaiti. Kame ni shuar átinian Israer shuaran anaikiaiti. Tura ni náari̱nkia Ashí Akupin Uunt Yusa nuiti.
Uunt Yus Papirúniaja̱i̱ asutkiartutai̱
20 “Ámeka Papirúnia mesetnum mánaitiairua núnisaitme. Ámiji̱a̱i̱ ashí nuṉkanmaya̱ akupniúrtiuk emeskan amuktatjai. 21 Tura ámiji̱a̱i̱ṉ kawaincha nui̱ eketainia nunasha tura káruncha ewekámniuri̱miak amuktatjai. 22 Nuyá̱ ámiji̱a̱i̱ṉ ashí áishmaṉnasha, nuwa̱ncha, úuntchincha, uchincha, tura áishmaṉ nuwa̱ natsa ainia nunasha mash amuktatjai. 23 Núnisnak ámiji̱a̱i̱ṉ muriknasha ashí wainniurtiuk tura waakaja̱i̱ nuṉká taur takakmauncha waakartiuk tura uunt anairamu áiniancha mash amuktatjai.
Papirúnia asutkiari̱
24 Tuma asamtai Papirúnianam Kartíu aents pujuinia nuna Seúnnum ti yajauch túrawarma nuja̱i̱ métek atumsha íimprumni̱ṉ asutiáwartatjai” tawai Uunt Yus. 25 Uunt Yus chichaak “Emeskartin naintia, ashí nuṉka emesin asakmin, kajerkan, winia uwejrun iwiaintiukan kayanmaya̱ akaṉkékan aju̱a̱ttajme. Túran náintniaka áesamua nútikiattajme. 26 Nuiṉkia amiinia̱ kayanka je̱a̱mkur yantamén aepruktinniaksha yaaksha júkichartatui. Warí ámeka peṉké atsá juáktatme” tawai Uunt Yus.
27 Ashí nuṉkanam kachu umpuartarum, túrarum nuṉkanam atumí tarachri̱ yakí̱ takuirum nenaatarum. Ashí nuṉkanmaya̱tiram iruntrarum Ararátnumia̱ tura Mininmaya̱ nuyá̱ Askiniásnumia̱ akupniúri̱ ainia nusha untsuktarum. Núnisaṉ suntara uuntri̱ ainia nusha akupratarum. Tura atumí kawairi̱sha manchi kajer wajarua tímiatrusrum ikiankatarum. 28 Ashí nuṉkanmaya̱tiram atumí nemasri̱ Mítianmaya̱ akupin ainia nu tura ni yaintri̱ ainia nusha nuyá̱ uuntri̱ áiniasha tura ni akupeamuri̱ ímiatai náṉkata tímianai irunturum iwiarnatratarum. 29 Núṉkaka ú̱u̱rkattawai tura najaimiak tuniṉkiana núniawai. Warí Uunt Yus Papirúnia amuk aya jú̱nik atsá mashiaru áentskesha atsá awajsatin tsawant uminkiayi. 30 Papirúnianmaya̱ meseta unuimiátka ainia nuka ni wenuke̱ utúachmin ajasár mánitniaka iniaisar nui̱ utsanawar epeemiarai. Kakarmachu ajasár nuwa̱ núnikiarai. Ni je̱e̱sha ekemátnarar tura ni waiti epentairi̱sha kupirnararai. 31 Tura Papirúnia akupniúri̱n ame péprurmiṉkia peṉké akintrutmakuiti. Tu ujaktai tusar papí áarman chichama iniaṉkaincha chikichan ujak ikiuak chikitcha nú chichamnak jukí̱ chikichan ujak ikiutaj tusa wéawai. Túmak mái̱ íniaṉka ajainiawai. 32 Nuyá̱ wajarar katitiainmasha mash nákarmaiti. Ni ejamtairi̱sha jiji̱a̱i̱ áestukmaiti. Núnisaṉ suntarí̱sha kakarmachu wainkiarai.
33 Warí Ashí Akupin Uunt Yus Israer shuara Yusri̱ya nu chichaak “Papirúnia núṉkaka trikiu júukar pakatai̱niam matsasma núniniaiti. Tuma asa nekeṉkar pakartintri̱ jearní̱.* 34 Tura Papirúnianmaya̱ aentsu akupniúri̱ Napukutunusúr achia̱r yua núnis amutkamai tura piniṉnum peṉké eṉkerchamua áitkiaramai. Núnisaṉ entsaya̱ yajasma kú̱jana áitkiasaṉ ni wakeramun yuruá ajapruamai.” 35 Seun kame Jerusaréṉnumia̱ shuar chichainiak “Nu tunamkamuja̱i̱ Papirúnianmaya̱ Kartíu aentska wáitsarti. Ii aentsun wáitkiasar máwaru ásar nisha núnisaṉ mantamnawarti” tiártatui.
Israer shuar nákasartinia nu
36 Tuma asamtai Uunt Yus chichaak “Wi jú̱naka ni tunaari̱ni̱ṉ sumamtikiattajai. Atumí nemasri̱nkia wi yapajkiattajai. Núnisnak entsancha púkunincha ukuikiaran kukach awajtúsartatjai. 37 Papirúnianka peṉké emeskan ashí yajasma matsamtai̱ awajsan aentska peṉké pujuschamnia tsuumai̱ awajsamu asamtai wishiktai̱ juáktatui. 38 Kame nu chichamaik úunt ya̱wa̱ uuntri̱ shiniuiniakui uchirí̱ṉkia ‘niaur’ ajainia núnis ajartatui. 39 Nuyá̱ imiá tsuernum pujuinianak yurumátniun iwiarturan ayurawaran nampekar warasarti tusan tsaṉkatkartatjai. Túrunawarmatai peṉké shintiarchatniun ikiantrartatjai” tawai Uunt Yus. 40 “Nuyá̱ murik tura chipiu áishmaṉkri̱ mátai̱niam yarumtai̱ya̱ áitkiasan júkiartatjai.
Papirúnia meserma
41 ¡Kame Papirúniaka ashí nuṉkanmaya̱ shuarja̱i̱sha imiá páantniuya nusha itiura nupetnakuit! ¡Ántsaṉ ashí nuṉkanmaya̱ shuarja̱i̱ iismasha itiura imiá tsuumaisha juákuit! 42 Tura nayantsasha ama̱a̱rak Papirúnian amur tamparuk téter ajawai. 43 Túram ashí nui̱ pepru matsatainia nu nuṉkaṉka ju̱yú̱ ju̱yu̱n kúntuts awajsattajai. Tura kampuntin peṉké atsú nuṉka awajsan nui̱ṉkia yaaksha pujuschamnia mashiaku awajsattajai. 44 Áitkiasnak Papirúnianmaya̱ aentsu yusri̱ Píirnasha asutián, ni ku̱jarmia nuna ímiumtikiattajai. Nuna túramtaiṉkia ashí nuṉkanmaya̱ aentssha nin shiir awajsachartatui. Tura Papirúnia téntakar wénuimiuri̱ṉkia mash yumpuartatjai. 45 Tura Uunt Yus asan ti kajerkaran asutiáwartatjana nui̱ jáka̱i̱rum Wi shuartirmeka nuya̱ṉka jiinkirum uwempratarum. 46 Túrasha nui̱ itiurchat átatna nu wáinkiuram ántrarum sapijmiakairap. Warí uwir uwir itiurchatka winikiar ajartatui. Nuyá̱ túmaki̱ weak Papirúnianmaya̱ nuamtak uuntri̱ ainia nu mai̱ maanai ajartatui. 47 Pai, yamaikia Papirúnianmaya̱ najankamu yus asutniátin tsawant ishichik ajasái. Núnisaṉ ni nuṉke̱ncha natsanmai̱ juákmatai jákarusha tepetar ajartatui. 48 Nuyá̱ araki̱a̱ emeskartinia nu Papirúnian káutkar amukármataiṉkia nayaimpiniam irunainia nusha tura nuṉká irunainia nusha ashí wararainiak charaatum ajartatui” tawai Uunt Yus. 49 Israer shuaran amukar nuyá̱ ashí nuṉkanmaya̱ shuarnasha amukármia núnisaṉ Papirúnianmaya̱ aentssha amuukartatui.
Jutá shuar Papirúnianam pujuinia chícham akuptamu
50 Tura átum mesetnumia̱ pisarmarum nútirmeka sétutsuk tuke wetarum. Nui̱ pujakrumsha Yussha tuke enentáimtustarum tura Jerusaréṉsha kajinmátkirap. 51 Tura iin wishikramainia anturmamkar natsa̱a̱raruitji. Warí Uunt Yusa Uunt Je̱e̱n mai̱ tesamunam yajaya̱ aents káunkar yajauch awajkaruiti. 52 Nu asamtai Uunt Yus chichaak “Wats Iistá, najankamu yusri̱ ainia nuna Wi utsaṉkartatjai tura ashí nuṉkanam awatmiari̱n akaṉman najaimiainiak nu tsawantka úttiartatui. 53 Kame Papirúnia nayaimpia tímianai wakamtaisha tura ni wenuke̱n yakiya̱ tímiana najankamtaisha emeskartinian Wi akuptúrartatjana nuka tímianaisha warurártatui” tawai Uunt Yus.
54 Tura Papirúnianmaṉka wáurkar charaatum ajainiawai. Nu arant kakarmachu jata nekapenawai. 55 Warí Uunt Yus Papirúnia ti naṉkamantu enentáimtumatairi̱nkia emestuk amuk tétete ajamuri̱ṉkia mitia awajtúsartatui. Nuyá̱ nemasri̱ nupetmakar utsanawar entsá tampari̱ya núnis téter ajainiawai. 56 Warí Papirúnian emesrattana nuka tariyi. Núnisaṉ meseta unuimiátka ainia nusha sepunam achikiar eṉkeamu áiniawai. Tura tíshimkiuri̱sha kupiramuiti. Warí Uunt Yuska, aents túrana nuja̱i̱ métek yapajmiawiti. 57 “Nui̱ ni peṉkeri̱ pujuinia ainia nuna tura neka ainia nunasha úuntri̱ncha nuyá̱ páantniuri̱ncha tura suntari̱ncha mash umutain aturaran anamtukartatjai. Túran atakka shintiarchatniun kijinmamtikiartatjai” Úunt Akupin tawai nuna náari̱ṉkia Ashí Akupin Uunt Yusaiti. 58 Tura Wi, Ashí Akupin Uunt Yusri̱ya nu, chichaak “Papirúnia pepru kayaja̱i̱ wenuimiu imiá uunt wenukaitiat mash yumpuntrattawai. Wáitiri̱sha esakartatui. Auka, amuukatniun takainiak peṉké ántar wáitsaruiti.”
59 Nuyá̱ Jutanmaya̱ shuara akupin Setekías, kuatru uwí pujái̱ Yúsnan etserin Jirimías papí áarman Neríasa uchirí̱n Masíasa tiraṉki̱ akupin Setekíasan Papirúnianam juíniakui Serayásan papin ataksamiayi. Kame Serayáska suntara úuntri̱yayi. 60 Tura Jirimías papinium aak Papirúnia nuṉkanam ti itiurchat átatna nuna áarmiayi. 61 Nuyá̱ Jirimías Serayásan chicharuk “Papirúnianam jeam ju̱ áarman amaj ju̱ áujtuiniakum 62 ‘Uunt Yusru ame chichaakum ju̱ nuṉkanka mashi emesmakam amukam kampuntin atsú nuṉka áitkian aentsush yajasmash atakka peṉké pujuschamnia awajsattajai tímiame’ titiá. 63 Tura nu papí aujsa umikiam kaya perka jiṉkiaram Yúpratis entsanam aju̱ṉtá. 64 Túram waya̱kui chichareakum ‘Papirúnia nuṉkasha ju̱ papí entsa waya̱na núnis amukáttawai. Tura nuka ni yajauchiri̱ji̱a̱i̱ṉ Uunt Yus asutiámu asa peṉké atsuttawai’” tu Jirimías aarma ju̱i̱ṉ amukáyi.