Isekiár

Isekiáran Yus untsukma

2 Nuyá̱ chichartak “Aentsu uchiri̱yá wajaktia, ámiji̱a̱i̱ chichastaj” turutmiai. 2 Nuya̱ṉka aujtú wajái̱ Yusa kakarmari̱ waintruamai túruta awajtúkmiai. Nuyá̱ chichartan antukmajai. 3 Tura chichartak “Aentsu uchiri̱yá, Israer shuar ni aparí̱sha umichu tura ántichu ásarmatai nui̱ weme winia chichamur etserkai tusan akupkáttajme. Kame yáunchusha Winia nakitrurarmai tura yamái tsawanta ju̱i̱sha tuke núnisaṉ áiniawai. 4 Tura niisháa iirka kaya imianú katsuram tura ántichu enentáimkia ainia nú aentsnum Wi ámin akupeajme. Tura nú aents chicharainiakum ‘Uunt Yus ashí aentsu Uuntri̱ jú̱nis túramprume’ tiartá. 5 Kame ántakka antukarti túrasha imiá antichu áiniasha anturtamkartimpiash tura Yúsnan etserin nui̱ pujus etserka nunakka nekaawartatui. 6 Tura ame, aentsu uchiri̱yá, nu aents peṉké ántichu ásarmatai nisha peṉké anturkaraip núnisaṉ turamainia nusha ashamkaip. Kame jaṉki téntakma áintsam pujakmesha tura titiṉ írunna núninium pujá nekapeakmesha sapijmiakaip. 7 Antsu ámeka ántuiniakuisha tura ántuiniachkuisha nu ántichu aents ainia nu Winia chichamur ujakárta. 8 Túrasha ámeka aentsu uchiri̱yá, ju̱ shuar umichu ainia núnin aip antsu ámeka Wi tájamna nu antukta. Waṉkata túram Wi amastatjamna nu yuátá” Uunt Yus turutmiai. 9 Nuya̱ṉka íimiaj tukamán aya úwejnak papí aara penuarman winia iniakturun wainkiamjai. 10 Nuyá̱ nu uwej papí áarman wi wajamunmaani̱ iwiaintiurkama nú papiniumka mai̱ yantam áarmauya nuna wainkiamjai. Nu papiniumka útmasha najaimiamusha tura wáitsatin chichamsha áarmauyi.