Isekiár
Úunt akupin Tírunmaya̱ jakamtai kantamma
28 Nuyá̱ Uunt Yusa chichame̱ winia taruti 2 “Maa aentsu uchiri̱yá, Tírunmaya̱ akupin chicharkum Uunt Yus Ashí Aentsu Uuntri̱ chichartamuk aentsuitiatam naṉkamantu enentáimtumaram Yusa núnisam wikia yúsaitjiai tusam yusa pujutái̱ri̱n nayants ajapén pujajai tákum Yusa enentáimtairi̱ji̱a̱i̱ métek enentáimpra asam, 3 yamaikia nekaata ámeka Taniarja̱i̱ naṉkaamas nékaitme tura ashí nekaachmin áiniana nusha ú̱rkachminiaitme. 4 Ame nekatairmiji̱a̱i̱ tura enentáimtairmiji̱a̱i̱ kuítrintin ajasam kurisha tura kuitcha irumpraitme. 5 Tura tí neka asam sumakam súramna nuja̱i̱ tí kuitrintin ajasam ame kuítrumja̱i̱ naṉkamantu enentáimtumame túramui titiá. 6 Tuma asakmin Uunt Yus Ashí Aentsu Uuntri̱ jú̱nis túramui. Ámeka Yus enentáimna tímiatrusam enentáimtuma asam, 7 yamaikia ju̱ nekaata chíkich nuṉkanmaya̱ kakaram tura kajen áiniana nú aentsun ikiatkattajme. Tura ni puya̱ri̱ji̱a̱i̱ ame nekaatairmiji̱a̱i̱ tí shiir najankar iwiarkamu ainia nunasha emesturmakar ame páantniurmi̱ncha peṉké yajauch mui̱jmiai̱ awajtúrmakartatui. 8 Nuya̱ṉka mantamawartatui tura mantamainiakuisha nayants ajapén jáiniak urukainia núnisam tí waitsam jakattame. 9 Ámeka yuscha antsu áentsuitiatam ámin mantamawartatna nusha chicharainiakum ‘Wikia yúsaitjiai’ ¿titiameash? 10 Wi chichaku asamtai ámeka tsupirnakcharu áiniana núnisam tí waitsam yajaya̱ aentsu uwejé̱n jakattame tawai Ashí Aentsu Uuntri̱ Uunt Yus Tírunmaya̱ akupin titiá” turutmiai.
Úunt akupin Tírunmaya̱ jakamtai e̱a̱rtin
11 Nuyá̱ Uunt Yusa chichame̱ winia taruti chichartak 12 “Aentsu uchiri̱yá, kúntuts enentáimkiur kantamtai̱ Tírunmaya̱ akupin kantamprakum Uunt Yus Ashí Aentsu Uuntri̱ jú̱nis tawai titiá ‘Ámeka tí neka tura tí shiirmach nájankur imiatkincha tí peṉker najanamuyame. 13 Ámeka Yusa ajarí̱n Etennum pujuyame tura ame pushirmeka ashí kaya tí kuit shíirmach ainia nuja̱i̱ ruwí, tupasiu, tiamanti, krisuritiu, únise, jaspi, sapiru, turkisa, tura piriruja̱i̱ najanamuyayi. Ame sháukrumsha tura kuishnium aki̱i̱tiai̱ṉkia kuriji̱a̱i̱ najanamu armai. Nuyá̱ ámin najatmawarmiania nu tsawantini̱ṉ nunasha najanawarmiayi. 14 Áminkia kirupín najanamu asakmin asuitiji̱a̱i̱ muukmin ukatran wáinin kirupín anaikian apujsamiajme tura ámeka Yusna akantúkma nainnium pujuyame tura wekaakmesha kaya kéenamunam wekainiuyame. 15 Tura yama najanamuyamna nui̱ṉkia ame túrutairmesha imiatkincha tí peṉkerauyayi túrasha tímiatmam ame tunaarum wainniakmai. 16 Ámeka sumakam súramna nuja̱i̱ tí kuitrintin ajasam tí kajen yajauch najanaram tunáa túramiame. Túrawakmin Yusa náintri̱ya̱ṉ, kirupín wainniu, kaya keamunmaya̱ṉka Wi ji̱i̱ki̱ aju̱i̱miajme. 17 Ame shíirmarmek naṉkamantu enentáimtikrampramai tura ame wincharmek nekaatairmincha ikiajtiúrmakmai. Tuma asakmin akupin íirmasar enentáimprarti tusan nuṉká aju̱a̱mjame. 18 Ámeka tunáa tí tura asam sumakam súramna nuja̱i̱ Yus enentáimtutai̱sha netse mui̱jmiai̱ awajsaitme. Tuma asakmin ju̱ áesati tusan ji kean akuptúkmajme. Túran aentssha iimiainiamunmaṉ nuṉká yuṉkunim awajsámajme. 19 Tura ashí nuṉkanmaya̱ aents ámin nekarmainiana nuka nuna nekaawar “¡Áyawa, nushaa, urukakua túrunaya!” tuíniawai. Yamaikia ashamái̱ ajasume tura jakam tuke meṉkakattame’ turutmiai” tímiayi.*