Isekiár

Jerusaréṉ asutniátin ímiaja̱i̱k wainkiamu

9 9:​1-11 Nuya̱ṉka ti kakantar untsumuk “Pepru emeskatniutiram atumí emeskartutairi̱ takaku weankátarum” winia kuishrui̱ tímiayi. Tura sais áishmaṉ ni uwejé̱e̱n emeskartutai̱ ainia nuna takarainia araki̱a̱ wininian wainkiamiayi. Tura nui̱ páchitkia áishmaṉ riniu pushí entsaru aakma ainia nu takatai̱ṉ takaku winimiai. Tura Israernumia̱ Yusa winchari̱ kirupínnium yakini̱ amia nuka tukí̱ ni Yusa Je̱e̱ wá̱i̱ti̱a̱i̱ri̱ni̱ wémiayi. Túrunamtai áishmaṉ áakmatai̱n ni akachumtairi̱n takaruya nuna Yus chicharuk “Jerusaréṉ péprunam waya̱m naṉkamakum chíkich aents mui̱jmiainian túruiniakui aents wáitiainia nuka nijia̱i̱nium áakarta” tímiayi. Nuya̱ṉka chíkich sais áishmaṉ arma nuna akupáiniak chichareak “Aents áishmaṉ tura nuwa̱sha nuyá̱ natsa núnisaṉ uchisha nijia̱i̱nium áarchamu ainia nuka Yusa Je̱e̱n naṉkamarum ashí kajeṉtarum” tímiayi. Nuya̱ṉka Yusa Je̱e̱n naṉkamawar áishmaṉ úuntach ainia nuna kaje̱nak Yusa Je̱e̱nka mui̱jmiai̱ najankar jakaan áimkiarmayi. Nuya̱ṉka Yúsnan etserin Yusan chicharuk “¿Jerusaréṉ kajerka asutiakum Israer shuar ashí juaru ainia nusha amú amuk awajsattam?” tímiayi. Tutai Yus chichareak “Israeran tura Jutá shuara tunaari̱nkia tí nukapete tuma asamtai peṉké waitnentrachartatjai” tímiayi. Nuya̱ṉka áakmatain takaru nu áishmaṉ Yus túrutna núnaka ashí umíajai tusa etserkattsa waketki̱ tamai.