Riwiitikia

Takamtsuk áestuatai̱

1 Yus Shiir Awajtai̱ Je̱e̱n Uunt Yus Muisaisan untsuk chicharuk 2 “Israer shuar chichareakum jú̱nis tiartá ‘Atumíya̱ Uunt Yusan shiir awajsatniun waakanke̱sha murikniaksha suíniakka, 3 ni súamuri̱ áestuatniuitkiuiṉkia waaka áishmaṉ tunamárcha átiniaiti. Warí ni enentái̱ji̱a̱i̱ṉ sua asa Uunt Yus Shiir Awajtai̱ Je̱a̱ wáitiri̱ya nui̱ áestuatniuiti. 4 Waakan súana nu waaká muuke̱n uwejé̱n awantkamtai nu taṉkuja̱i̱ ni tunaarí̱ tsaṉkuramniaiti timia átatui. 5 Nuiṉkia Uunt Yus íimmianum nu waakan kuntujé̱n tsupirak máattawai. Túramtai aya Araun wéak Yúsnan pujurin ásar nuna numpe̱ja̱i̱ Yus Shiir Awajtai̱ Je̱a̱ waya̱munam Yus áestutai̱ pujana nuna yantamén ukatkartatui. 6 Tura nu waaka áestuatin mámun pakak namaṉke̱n asa̱a̱rartatui. 7 Nuiṉkia aya Araun weak Yúsnan pujurniu uuntri̱ ásar Yus áestutai̱niam jinia ikiamtuk iwiarturartatui. 8 Nuyá̱ aya Araun weak Yúsnan pujurin ásar Yus áestutai̱niam ji iwiarturmana nui̱ waaka muuke̱ncha macharí̱ncha péṉker awa̱rartatui. 9 Tura Yúsnan pujurin waaká ampuje̱ncha núnisaṉ makui̱ncha entsaja̱i̱ nijiartatui. Nuya̱ṉka Yusna áestutai̱niam áesattawai. Warí takamtsuk áestuatniuchukait. Yus takamtsuk áestamu asa Uunt Yus áestuatin susamu áestamun ti shiir kuṉkuan nekaprattawai.

10 Kame ame takamtsuk áestuatin murik matsatmanumia̱ suákmeka murikkisha nuíchuka chípiuksha áishmaṉ tunamárcha susata. 11 Tura Yus áestutai̱niam arakaani̱ ana nui̱ Uunt Yus íimmianum taṉkú sue̱n tsupirkattawai. Arauna uchirí̱ Yúsnan pujurin ainia nu taṉkú numpe̱ja̱i̱ Yus áestutai̱ ashí yantamén tura yakiní̱sha ukatrattawai. 12 Nuya̱ṉka Yúsnan pujurin namaṉke̱n tsupirtatui tura muuke̱ncha nuyá̱ macharí̱ncha Yus áestutai̱niam ji patarar ikiapármanum awa̱rtatui. 13 Tura Yúsnan pujurin entsaja̱i̱ makuin nuyá̱ ampuje̱n nijiartatui tura áestutai̱niam awaṉ áestuattawai. Yus takamtsuk áestamu asa Uunt Yus áestuatin susamu áestamun ti shiir kuṉkuan nekaprattawai.

14 Núnisaṉ Uunt Yus susamu takamtsuk áestuatin nanamtiniaitkiuiṉkia yámpits itiatniuiti nuíchuka shimpiá uchirí̱n itiatniuiti. 15 Nuya̱ṉka Yúsnan pujurin áestutai̱niam júkitniuiti. Nuyá̱ muuké̱ akarak áestutai̱niam áesatniuiti tura áestutai̱ yantamén ni numpe̱nka chukuikiá awajsatniuiti. 16 Tura uwer tsukaje̱n jurustatui. Tura etsa̱ jintiainmaani̱ yantam áestutai̱ yuṉkunmiri̱n ajapattawai. 17 Núnisaṉ Yúsnan pujurin jímiapetek nakak napichak nanapnum achik ayapá̱r áestutai̱niam ji patarma keamunam awaṉ áestuattawai. Yus takamtsuk áestamu asa Uunt Yus áestuatin susamu áestamun ti shiir kuṉkuan nekaprattawai.