Amus

Israer emesnarmatai ti kúntuts enentáimmia

5 Wats Israer shuartiram nekaatarum. Átum kajiṉkrum amukákrumin tí kuntuts e̱a̱ran kantamprajrumna nu antuktarum. 2 Israer nuwa̱ natsach áishmaṉja̱i̱ pujuscha núnisauya nu iniaar atakka wajakchattawai. Nuṉká tepá ikiukmiaiti tura nuna iniantkitniuka yaaksha atsawai. 3 Warí Uunt Jiuwá Israer shuarnaka chicharuk “Mesetnum wénak mir suntar wéu armia nuka siánchik iwiaaku juákartatui. Nuyá̱ sian wénaksha aya tiáschik iwiaaku juákartatui” tawai. 4 Warí Jiuwá Israer shuarnaka chicharuk “¡E̱a̱tkurmeka iwiaaku átatrume! 5 Tura Pitirka e̱a̱kairap nuyá̱ Jirkarai̱sha waya̱wairap. Núnisaṉ Pirshiwianmasha weerap. Warí Jirkarka achiniak sepunam junaktiatui, nuyá̱ Pitirka ántar juáktatui” tíniuiti. 6 ¡Jiuwá e̱a̱ktarum túrakrum iwiaaku atarum! Túrachkurmeka Jusé shuari̱nkia kajerak jiya núnis jiinkí̱ Pitiran aeseakui ¿yaki ikiajniákat? 7 Átumka naka wekaatai̱sha yapá ánis awajsarume núnisrumek nekasa nuja̱i̱ métek túratniusha ántar awajsaitrume. 8 Tuma asarum Musachincha Utunmíncha ántsaṉ kiritniuncha atsa̱we̱a̱ nu núnisaṉ tsawantnasha kashi awajna nu e̱a̱ktarum. Tura nayantsanmaya̱n entsancha untsuk ashí nuṉkanam tseṉkerum waa ajastarum tana nuna náari̱ṉkia Jiuwayaiti. 9 Kame wenuke̱ péṉker iwiartukma asa nupetkachmin áunak aya aneachma kakarmaja̱i̱ emesak utuawar suntar kakaram matsamtai̱ utúachminniasha emesniuka Níṉkiti.

10 Nu aentska chícham iwiartai̱niam chicharkámash úuntri̱n yajauch enentáimtuiniawai. Núnisaṉ péṉker chicháu áinianka muí̱jiainiawai. 11 Nuna arant kuítrincha ainia nuna arakri̱ya̱ akikmamtikiakrum wáitkiasrum kaya péṉker iwiarkamuja̱i̱ je̱a̱mkarume. Túrayatrumek nui̱ṉkia pujuschattarme. Tura úwa aja tí peṉker ajamkayatrumek nuna yumiri̱ umarchattarme. 12 Warí átum umiktin nakittiai̱ tí nukap tura atumí tunaarí̱sha ti untsurí ainia nunasha Wikia nékajai. Péṉkera túrin ainia nuka átum wakeramu túrumtikiarme núnisrumek túrashtincha túrata tusarum akikrum útsuarme. Ántsaṉ kuítrincha ainia nuka úuntnum ejerum ni tana nuka wáitiaiti tírum núpetearme. 13 Warí nu tsawantinkia ti yajauch asamtai esetar enentáimniuka tákamtak pujuttawai. 14 Tuma asamtai iwiaaku pujutaj tákurmeka yajauchia nuka e̱a̱tsuk antsu péṉkera nu e̱a̱ktarum. Nu túrakrumni̱ṉkia átum tárumna núnisaṉ Jiuwá, Ashí Akupin Uunt Yus atumji̱a̱i̱ṉkia pujustatui. 15 Péṉkera nu aneakrum yajauchia nuka muí̱jkiatarum. Núnisaṉ chícham iwiartai̱nmasha nekasa nuja̱i̱ métek sumamtikiatin juárkitiarum. Antsu nuiṉkia Jiuwá Yus, Nayaimpinmaya̱ Suntara Uuntri̱ Jusé shuar juákarua núnaka waitnentrachartimpiash.

16 Antsu ántichu asaakrumin Nayaimpinmaya̱ Suntara Uuntri̱ Jiuwá Yus chichaak “Ashí péprunam aṉkantin ainia nui̱ úttiartatui. Núnisaṉ ashí péprunam tí waitiaji tiártatui. Túmainiak arakma ainia núnaka kúntuts enentáimiar pujusárat tusa untsukartatui tura kúntuts enentáimiuk wáitin ainia núnaka kúntuts enentáimkiur wáitiaji tiarat tusa ipiaawartatui. 17 Warí ashí emeskin atumíini̱ naṉkaamaktiatjai. Tuma asamtai uwa ajanmasha úttiartatui” tawai Jiuwá. 18 Maa Jiuwáa tsawantri̱ jeatí tusa nákana nuka waitnenmainti. ¿Urukamtaitsuk Jiuwáa tsawantri̱ jeatí tusarmesha wakerarum? Nu tsawantka tsáapnichu antsu kiritin átatui. 19 Tuma asamtai nu tsawantai̱kia shuar úunt ya̱wa̱n wainiak tseke wesa chai̱ iṉkiun nuyá̱ sapijmiak tsékeṉki̱ je̱a̱ waya̱k tanishnum achimiun napi esaana núnis átatui. 20 Jiuwáa tsawantri̱ṉkia ti kirit tee áchattawak tura tsáapniṉkia péṉke atsushtatuak.

21 Kame atumí namperi̱nkia muí̱jiakun nakitiajai. Núnisaṉ átum iruntrarum nampermarmena nusha péṉkerka kuṉkuntratsui. 22 Ántsanak takamtsuk aesturkurmincha tura árak Yus susatai tusa surakrumnisha peṉké pachischattajai. Núnisnak aṉkant ajastaj tusarum taṉku unuerma Yus shiir awajkur aestuatai̱ tusarum surakrumnisha peṉké íischattajai. 23 Tura kantamkuram charaatum ajarmena nuka yajá jukitiarum. Warí atumí tuntuitiairi̱ túntuiyamuncha peṉké antukchattajai. 24 Antsu asutniátin tsaṉkatkamuka entsa akaana núnis wetí. Tura nekasa nuja̱i̱ métek túrutaiṉkia ashints ku̱yu̱chua núnis atí. 25 Maa Israer shuará antsu kampuntin atsú nuṉkanam kuaraintia uwí pujusmarum nui̱sha Yus aestuatniusha tura árak Yus susatai tusarmesha ¿Winia surusmakarum? 26 Antsu íksarmek najankamu yus enentáimtaji tusarum átum najankamuk Muruk tura yaa yus Kiun náartin entsakní̱ wekaimiarme. 27 Tuma asaakrumin yamaikia Tamaskunmaya̱ nú arant achirar yarurmakarat tusan tsaṉkamkattajrume. Ni naari̱ Jiuwá Nayaimpinmaya̱ Suntara Uuntri̱ Yus nuna tíniuiti.