Amus

Israera akupeamuri̱ amukatin ímiaja̱i̱k wainma

8 8:1-3 Tura yuraṉ esatái̱ neren ainia nu chaṉkinnium chumpíamun Uunt Yus iniaktursamai. Nuyá̱ chichartak “Amusá ¿warí wáiniam?” túrutkui chicharkun “Yuraṉ esatái̱ neren ainia nu chaṉkinnium chumpíamun wainjiai” tímiajai. Tutai chichartak “Wi shuar Israer amukatin yamaikia jeayi. Yamaikia katsuntrashtatjai. Nu tsawantinkia shuar tí útiartatui tura jákarusha tí iruniartatui” tímiayi.

4 8:4-6 Atsumainia nu tura kuítrincha ainia nu waitnenchatiram ju̱ antuktarum. Átumka chichaakrum “¿Urutáiṉ yamaram nantusha naṉkaamasat trikiu súrakur kijintri̱ itiarar kuítri̱sha iwiakar aents kuítrincha ainia nuka kuitji̱a̱i̱ súmarkur tura aents atsumainia nusha sapatja̱i̱ sumaka̱jⁱ? Nui̱sha trikiu imianchasha suruktatji” tárume.

7 8:7-10 Tura nekas túrattajai tusa Uunt Yus Jakupa páantniuri̱n pachis chichaak “Ni túrawarua núnaka peṉké kajinmátkishtatjai” tawai. Kame ni túrattana nu nekas tsuumai̱ asamtai nuṉkasha muchitrattawai tura Ejiptunam Niru entsa nujaṉkrua ní neas ku̱yu̱á núnis ashí núṉkaka núniktatui. Nu arantcha tutupin áyataṉ kirit ajastatui. Núja̱i̱ṉkia aentssha ashamkar úttiartatui.

Yus chichaman kitiama ímiatrus enentáimtamu

11 8:11-14 Uunt Yus chichaak “Nu tsawantai̱kia ashí nuṉkanam tsukancha tura kitiaknasha akupkáttajai. Túrasha apatuk yúatin tsúkachu núnisaṉ entsa umartin kitiakcha antsu Yusa Chichame̱n antuktinian tsukamak tura kitiamana tímiatrus enentáimtusartatui. Yusa Chichame̱n e̱a̱iniak ni nuṉke̱ya̱ takamtsuk náṉkamas wekaikiní̱ ajartatui túrasha peṉké wáinkiachartatui. Tura Samaria umitmakmanum nekas tajai tusa Tan shuará, ame najankamu yúsrum iwiaaku atí tura Pirshiwia jintiasha tuke páantin atí tuinia nuka asutiámuja̱i̱ iniaantarka atakka peṉké nantakchartatui” tíniuiti Uunt Yus.