Aptías
Etum takamtsuk emesnaktin ujamu
1 Aptías ímiaja̱i̱k wainkiamu
Uunt Jiuwá Etumnan jú̱nis tíniuiti.
“Ju̱ aentsja̱i̱ meset juárkiarmi”
wajarartai tusar chichaman etserniun ashí nuṉkanam Jiuwá akuprámu antukaruitji.
2 “Pai yamaikia, ashí uunt nuṉka ainia nuya̱ṉka peṉké uchich áminkia awajsaitjiame túramu asam nakitrámu pujame.
3 Ame naṉkamantu enentáimtumamuk anaṉkramaiti.
Amesha muchiṉ tsentsakamunam ti yakí̱ pujakum ame enentáimtumasmek
‘¿Winiasha yaki nuṉkasha aju̱ntrat?’ túmamme.
4 Kame churuwia nanamna tímiatrusam ti yakí̱ nanakakminish
tura ya eketainia tímianai pasuṉmakakminish
tímianaiya̱sha akakín aju̱a̱ttajme” tawai Jiuwá.
5 “Kame kasa núja̱i̱nchuka kakarmaja̱i̱ kasamín kashi káutramkarka
¿aya ní wakeramunak kasartamkacharaintiak?
Núnisaṉ úwan juu ainia nu káutramkarsha ¿e̱a̱kar júukminia̱ṉka ikiukcharminkiait?
Túrasha áminkia itiurká tiatkiarmawara
¿aya jú̱niksha awajtámsara?
6 ¡Kame Esauncha tí itiurkara timiá jú̱niksha awajsara!
Warí ashí kuit émamkesar u̱u̱kar ikiusma áiniana nunasha e̱á̱a̱ e̱á̱a̱ awajsar mash yarurkacharaik.
7 Ámiji̱a̱i̱ tsaniṉ chichaman najanin ainia nuke ashí anaṉkramawar nuṉka tesarma áiniana tímianai ejetamiarai.
Ámiji̱a̱i̱ kajernaitsuk pujuarma nusha
ame nemasrum ajasárai.
Ame yurumkarmin yurumáinia nuke
anaṉkramuk chichaman najatramawarai.
Warí, ju̱sha peṉké nekaachminiaiti.
8 Antsu nu tsawantiṉkia Etumnumia̱ tí neka nuyá̱ Esaú náintri̱n tí peṉker enentáimin matsatna nunasha ¿mash emeskashtatjak?” tawai Jiuwá.
9 “Maa Temaná amiiya̱ aents kakaram áiniana nusha ti sapijmiakar wáurkartatui.
Warí naintiar naintiar Esaú nuṉka nuyá̱ aentska ashí wáitkiasar mantamnawar amukma ártatui.*
Etuma itiurchatri̱ paant awajma
Esaú péṉker túrachma
10 Ame yátsum Jakup tí yajauch awajsa asaakmin
tí natsanmai̱ awajnáktatme
tura mantamnam tuke amuukattame.
Esaú nisháa enentáimpramu
11 Amesha nuí̱ pujamni̱ṉ ame suntarumnia̱sha nékashtai achirar yarumiarmai
ántsaṉ nékashtai aents ame pujamna nui̱sha káuniarmai.
Nui̱ pujusár Jerusaréṉkan nekapas iyarmai.
Amesha niji̱a̱i̱ métek ajasam nui̱ pachinkiamame.
12 Amesha ame yatsumi itiurchatri̱ tsawant ama nui̱sha páchitsuk ii waraschatniume
ántsaṉ Jutá shuari̱ awakmakcharmataisha nu íismesha wishirchatniume
tura ni wáitiarma nui̱sha naṉkamantusha enentáimtumaschatniume.
13 Amesha Wi shuar itiurchat pujumia nu tsawantincha ni pépruri̱ wá̱i̱ti̱a̱i̱ri̱ni̱sha waya̱shtiniume.
Ni yajauch itiurchat awajma pujumia nui̱sha waraschatniume.
Maa ni imiá itiurchat mesek pujumnia nui̱sha
ni warirí̱ṉsha yarurkashtiniume.
14 Núnismek aents pisainia mátaj tusamsha jintia paasa íṉkiuntramunmasha nákakchatniume.
Tura tuke iwiaaku juákarusha itiurchat pujuinia yaruakarat tusamsha surukchatniume.
Etum emeskamu tsawant
15 Jiuwáa tsawantri̱ ishichik ajasái ashí ju̱ nuṉkanam úunt matsatkamu túrattana nu.
Ame túramamna ímiatrusaṉ túrunattame.
Ame akinkiatniuka túramurmiji̱a̱i̱ métek sunastatme.
16 Warí Winia akantúkma murarui̱ atumsha umara nampeku asaakrumin
núnisaṉ ashí uunt matsatkamu iniaitsuk nui̱ tuke úmin ártatui.
Tuma túmainiakua yáunchusha tuke atsuwa núnis juákartatui.
17 Maa nui̱ Seun naintnium juákaruka uwempraru ártatui.
Nu naintkia aya Yusnak akantúkma átatui.
Nuya̱ṉka Jakup aentska mashi ni takaku armia núnaka awaṉtumprartatui.
18 Jakupa shuari̱ nuyá̱ Jusé shuari̱sha kapá̱a̱ átatui.
Nuyá̱ Esaú shuarka aesnak amunuk kai̱ awajnas warinkish juákchattui
tura ekemanak mashi amunkattui” warí Jiuwá núnis tíchakait.
Israer naṉkamantu awajma
19 Nekep aents Esaú náintri̱nkia akinkiartatui,
núnisaṉ Jiristíu nuṉkanka Sejera akintrukartatui
áintsaṉ Eprainnasha nuyá̱ Samaria kampunniuri̱ncha
tura Karaatnanka Piṉjiamín akinkiattui.
20 Israer shuara suntari̱ misaar yaruakma arma nu Kanaan shuara nuṉke̱n Sarepta ímianai akinkiartatui.
Tura Jerusaréṉnumia̱ misaar yaruakma Separátnum matsatna nu
Nekepnumia̱ pepru ainia nuna akinkiartatui.
21 Nuyá̱ uwemtikkiartin Seun naintnium wákartatui
túrawar naintiar naintra Esaú nuṉkanka nékaskea nuja̱i̱ métek sumamtikiattawai.
Nuya̱ṉka Jiuwá akupin ajastatui.