Ajíu

Yusa Uunt Je̱e̱nka yamaram tura imiá shiira nu

2 Tura nantu siátitin tsawantka paintiúnunam Yúsnan etserin Ajíui̱ní̱ Uunt Yusa chichame̱ akuptúkmiayi. Tura chichaak 2 “Jutanmaya̱ shuara uuntri̱ Saratiára uchirí̱ Surupapír núnisaṉ Yúsnan pujurniu uuntri̱ Jusatáka uchirí̱ Jusuí nuyá̱ ashí shuar matsatainia nu chicharainiakum, 3 ‘Emka Je̱a̱ páantniuri̱ urukuya nuna atumíiya̱ ¿ya wáinkiait? Tura yamaisha ¿urukua íyarum? Yamái ana nuka átum iismasha imiancha ¿ániuchukait? 4 Pai, yamaikia Jutanmaya̱ shuara uuntri̱ Saratiára uchirí̱ Surupapírá núnisaṉ amesha Yúsnan pujurniu uuntri̱ Jusatáka uchirí̱ Jusuiyá núnisrumek ashí aents matsatrumna nútirmesha atumsha kakaram ajastarum. Túrarum takakmastarum. Warí Wi atumji̱a̱i̱ṉkia pujajai’ tawai Ashí Akupin Uunt Yus. 5 ‘Núnisnak Ejiptunmaya̱ jíinkiurmin nekas túrattajai tímiajna nuja̱i̱ métek átum matsatrumna nui̱ Winia Wakantruka pujawai. Tuma asamtai sapijmiakairap.’ 6 Warí Ashí Akupin Uunt Yus chichaak ‘Ishichik tsawant naṉkaamasu ai̱ nayaimpincha nuṉkancha nayantsancha tura kukarsha umuchrattajai. 7 Núnisnak ashí uunt nuṉka mátsatka ainia nunasha umuchrartatjai. Túramtai ashí uunt nuṉka mátsatka ainia nuna kuítri̱ncha ikiankartatui. Túrunamtai Winia winchar ju̱ Je̱a̱nmaṉka piáktatui’ tawai Ashí Akupin Uunt Yus. 8 Tura chichaak ‘Kurisha kuitcha ashí Winia áiniawai’ tawai Ashí Akupin Uunt Yus. 9 ‘Núnisaṉ ju̱ Je̱a̱ páantniuri̱ ukunam átatna nuka emka amia nuna naṉkaamas átatui. Nu arantcha jú̱ nuṉkanka aṉkant pujustinian susattajai’ titiá” tawai Ashí Akupin Uunt Yus tu etserkamiayi.

Péṉker umíachmanum chichareamu

10 Taríu úunt akupin ajasmaka jimiará uwí wéanmunam nantu nuíwitin tsawant paintikuátrunam Yúsnan etserin Ajíui̱ní̱ Uunt Yusa chichame̱ támiayi. Tura chichaak 11 “Ashí Akupin Uunt Yus chichaak ‘Yúsnan pujurin ainia nu akupkámu umiktin chichamnum ¿warintiua? nu jú̱nisam inintrúsarta. 12 Yaaksha Yúsnan akantúkma namaṉke̱n ni entsarmari̱ji̱a̱i̱ weṉkuka júamuja̱i̱ paṉsha yurumak iwiaramusha tura uwa yumiri̱sha asuitisha tura chíkich yurumak ainia nusha nu entsatai̱ tsakari̱ji̱a̱i̱ antiaram ¿Yusna akantúkmak ajainia?’” tutai Yúsnan pujurin chichainiak “Atsá” tiármiayi. 13 Nuyá̱ Ajíu chicharainiak “Aents jaká aya̱shi̱n takas imiatkímpra ajasu yurumak antiaram ¿imiatkímpra ajawak?” takui̱ Yúsnan pujurin chichainiak “Ee imiatkímpra ajasuíti” tiármiayi. 14 Tuíniakui Ajíusha aya̱k “‘Wi aentssha tura ju̱ nuṉkanmaya̱ aentssha nuja̱i̱ métek túmainiawai. Tura ashí ni túramuri̱sha ni suíniamuri̱sha imiatkímpra áiniawai. 15 Wats yamaiya̱ ju̱ya̱ṉ nekas enentáimpratarum. Uunt Yusa Je̱e̱ je̱a̱mtin kayarí̱ tuke aepruntsa̱i̱ṉ ¿jú̱nis áchamka? 16 Núkap júukar irumpramu painti nekapmamu jukittsa werirum aya tiáschik wainkiamarme. Tura winiu najantainiam seṉkuintia muits jusataj tusa weriyátrum aya páintichik wainkiamarme. Nusha ¿warí urukakuṉ túrunamia? 17 Kame ashí atumí takatrí̱n nase tí tsue̱rja̱i̱ ijiji̱a̱i̱ seṉkaja̱i̱ tura michaja̱i̱ emestukmajrume. Túramaitiatrumek Wíniaka peṉké enentáimtursachmarme’ tawai Uunt Yus. 18 ‘Túrasha yamaikia nantu nuiwi tura tsawant paintikuátrua ju̱yá̱ Uunt Yusa Je̱e̱n je̱a̱mtinian aeprukmari̱n umikiara ju̱i̱ṉ^k eem ju̱ tí enentáimpratarum. 19 Maa, atumí yurumkari̱ ikiutai̱nmasha jiṉkiaiṉsha ¿áwak? Uwa arakmasha íkiusha tura trikiu arakmasha nerenatsui. Nuyá̱ uriwiusha kuku̱jruiniatsui. Túmaitkiusha yamaiya̱ ju̱ya̱ṉka ti shiir yumiṉkian amastatjarme’ tawai Uunt Yus” tímiayi.

Yus Surupapírja̱i̱ chícham nájanma

20 Ataksha tsawant paintikuátrunam nú nantutini̱ṉ Ajíui̱ní̱ Uunt Yus chichaak 21 “Jutanmaya̱ shuara uuntri̱ Surupapír chicharkum ‘Wi nayaimpincha nuṉkancha umuchrattajai’ tawai titiá. 22 Úunt akupin pujuinia nuna akupeamuri̱n pachimprukartatjai. Túran yajá nuṉkanmaya̱ akupeamu kakarmari̱ncha emestukartatjai. Nuyá̱ káruri̱ncha tura nui̱ eṉketáinia nunasha pachimprukartatjai. Núnisaṉ kawaisha tura eketainia nusha nuamtak naṉkiji̱a̱i̱ amunaikiartatui. 23 Ashí Akupin Uunt Yus chichaak ‘Saratiára uchirí̱ Surupapír Winia takartiniá, nú tsawantinkia Winia uwejruí̱ weamatai̱ya ímiatrusan Wi anaikiamu asakmin áminkia tuke wainkiattajme. Wi Ashí Akupin Uunt Yus tajai’ titiá” tímiayi.