Sakarías

Uunt Yuska ni shuari̱n ataksha awakeartatui

10 10:1-2 Uunt Yusak yútumtikiawai tura aentsnasha yurumkan suíniawai. Ántsaṉ kampunniunmasha arakan tsapamtikiui. Antsu najankamu yus ainia nuka ántar áiniawai. Tuma asa aentska murik wainniuri̱ atsana núnisar námkamsar yujainiawai.

3 10:3-5 “Murikiu wáinniun kajerkarjai tura nin asutiáwartatjai. Ashí Akupin Uunt Yus ni murikrí̱ Jutan íistatui. Tura kaya eem apujtuatniusha núnisaṉ nuap je̱a̱ ajintruatniusha áitkiasan mánitiai̱ tíshimkiusha nuyá̱ ashí úunt akupniusha Jutanmaya̱ ártatui. Suntar kakarma núnisar tura Uunt Yus niji̱a̱i̱ pujá asamtai ni nemasri̱ncha emesrartatui.

6 10:6-11 Waitnentainiakun Jutanka kakaram awajsaran Jusé shuari̱nkia aṉkant awajsartatjai. Tura náakam ajasárua núnisar Eprainniumia̱ṉka Uunt Yusai̱ warasartatui. Tura ní uchirí̱sha núnaka wáinkiar núnisar warasartatui. Tuíntsuk matsatainia nui̱sha Wíniaka enentáimturiartatui. Áitkiasnak tui̱ matsatainia nuya̱ntka ji̱i̱raran Karaatnum tura Ríwianunam ikiankartatjai. Túrasha ashí aents matsamsatin nuṉka jeashtatui. Núnisaṉ Asiria waantu enentáimtumatairi̱ncha emestukartatjai antsu Ejiptu akuptai̱ naṉkiri̱nkia emeṉkátkattajai. 12 Kame Wi Jutan Uunt Yusa kakarmari̱ji̱a̱i̱ kakaram awajeakui Winia naarja̱i̱ wekasartatui” tawai Uunt Yus.