Wekasarma
Kurái kajekmatai asutiámu
16 Kame Riwí shuarnumia̱ Kujata uchirí̱ Isjaran uchirí̱ Kurái núnisaraṉ Ruwin shuarnumia̱sha Iriapa uchirí̱sha Tataanja̱i̱ Apirám nuyá̱ Piritia uchirí̱ Uncha aentsun irurarmiayi. 2 Túrawar Israer shuara uuntri̱ iruntramunam anaikiarma peṉkeri̱ tura páantin armia nuja̱i̱ iruntrar Muisaisan kajerkarmiayi. 3 Tura irunturar Muisaisja̱i̱ Araunan chicharainiak “Yamaikia atumji̱a̱i̱ṉkia máakete. Warí ashí aents Israer shuarka, niṉkia peṉké tunaarincha kame Yusna áiniawai núnisaṉ Uunt Yus niincha pujuráiniawai. Enta tuma ai̱sha ¿urukamtai Uunt Yusna iruntrarmanumsha atumsha naṉkamantusha ajarum?” tiármiayi.
4 Muisaiska nuna antuk tikishmar tsuntsumamiayi. 5 Tura Kurain ní írutramuri̱ji̱a̱i̱ chicharainiak “Niniu ainia núnaka kashin káshik Uunt Yus paant awajsattawai. Ya tunaarinchait tura yana ju̱ka Wíniaiti titiatá núnaka Nin weakártatui. 6 Tura Kuraiyá ámeka ame írutramurmiji̱a̱i̱ jú̱ túrata. Kuṉkuin áestutai̱ achiktarum. 7 Tura nui̱ ji eṉkearum Uunt Yus íimmianum kuṉkuincha yaraatarum. Nuya̱ṉka Uunt Yus yana ju̱ka Wíniaiti titiatá nu aentska tunaarincha átatui. Maaj Riwí uchiri̱yá atumji̱a̱i̱ṉkia máakete.”
8 Nuya̱sha Muisaiska Kurain chicharuk “Riwí shuartiram antuktarum. 9 Kame Uunt Yus Nin wearmak Uunt Yus Shiir Awajtai̱ Je̱e̱n takaakrum Israer shuar iruntrarmanum eem pujusuk tusa Israer shuarnum atumín Uunt Yus Winia árat tusa achirmakmiarmena nuka ¿atumji̱a̱i̱ṉkia peṉké ántraṉkait? 10 Warí áminkia tura ámiji̱a̱i̱ métek ame yatsumin Riwí aentsnasha Niṉki Nin wearmákuiti. ¿Túramaitiatrumek Yúsnan pujurin ajastincha átumka enentáimprum? 11 Tuma asam ámeka ame írutramurmiji̱a̱i̱ iruntram Uunt Yus kajerkáme. ¿Warí ishishmasrumek yajauch chichartincha Arauncha yait?” tímiayi.
12 Nuya̱ṉka Muisaiska Iriapa uchirí̱ Tataan Apirámja̱i̱ untsuktarum tusa akupkarmiayi. Túramaitiat chichainiak “Peṉké winishtatji” tiármiayi 13 “Kame tí peṉker nuṉkanmaya̱ṉka ashí arak tsapáu asamtai muntsu míshkiji̱a̱i̱ entsa núnis akamunmasha jukartukim ju̱i̱ ikiajkiataj tusam kampuntin atsunum itiakratniumna nuka ¿peṉké enentáimtsukek ii uuntri̱ ajastincha enentáimiam? 14 Núnismek tí peṉker nuṉka asa muntsu míshkiji̱a̱i̱ entsa núnis akamunmasha itiakratchame tura nuṉkasha nuyá̱ uwa ajasha sukartuschame. ¿Jú̱ aentsu ji̱ṉkia ukuitrartatmek? Iikia peṉké winishtatji” tiármiayi.
15 Nuya̱ṉka Muisais tí kajek Uunt Yusan chicharuk “Ní amainiamusha péṉkeraiti tiip. Warí níniunka chikichik umpurunkesha jurukcharuitjiai túrutskesha níya̱nka chikichkinkisha yajauchinkia peṉké túrichuitjiai” tímiayi. 16 Nuyá̱ ataksha Muisaiska Kurain chicharuk “Kashin ámeka ame írutramurmiji̱a̱i̱ nuyá̱ Arauncha Uunt Yus íimmianum naka wajastatrume. 17 Tura aṉkant aṉkant kuṉkuin áestutai̱n níniunak achikiárti túrawar kuṉkuinian yarakarti. Nuya̱ṉka níniunak kuṉkuin áestutai̱nkia tusiantu seṉkuintia ainia nú jukiar Uunt Yus íimmianum naka weankárti. Tura amesha áminiuk nuyá̱ Arauncha níniunak kuṉkuin áestutai̱nkia jukiti” tímiayi. 18 Nuya̱ṉka aṉkant aṉkant kuṉkuin áestutai̱nkia níniunak achikiar jinia eṉkeawar kuṉkuinniasha yarakár Muisaisja̱i̱ tura Araunja̱i̱ métek wajakiar Yus Shiir Awajtai̱ Je̱a̱ wá̱i̱ti̱a̱i̱ri̱n wajasármiayi. 19 Túrasha Kuraikia Israer shuarnaka ashí irurar Yus Shiir Awajtai̱ Je̱a̱ wá̱i̱ti̱a̱i̱ri̱n nákakar matsamtiarmiayi. Túmainiai̱ Uunt Yusa winchari̱ ashí aents iruntramunam wantinkiamiayi.
20 Nui̱ Uunt Yus Muisaisan Araunja̱i̱ áujainiak chichaak 21 “Ju̱ aents iruntrara ju̱yaṉka átumka arant ajastarum ju̱ke arusnak mash amukártatjai” tímiayi. 22 Takui̱ tikishmarar tsuntsumá chichainiak “Maa Yusá ashí aentsu iwiaakmari̱ nérentin Yusá chikichik aentsuk tunáa túramtaik ¿ashí aents suir ka̱e̱ kaje̱ntuktatam?” Muisais Araunja̱i̱ tiármiayi. 23 Nuya̱ṉka Uunt Yus Muisaisan áujuk chicharuk 24 “Ashí aents iruntraru chicharainiakrum ‘Kurái nuyá̱ Apirám tura Tataan matsatáiniamunam ayaam matsatrumna nuya̱ṉka arant ajastarum’ tawai tiartá” tímiayi.
25 Tutai wajaki̱ Tataan Apirámja̱i̱ pujuiniamunam Muisaiska wémiayi. Tura ní weakui Israernumia̱ shuara úuntri̱sha úkumur patakarmiayi. 26 Nuya̱ṉka aents nui̱ iruntrarun chicharainiak “Yusan enentáimtichu shuara jutai̱ je̱e̱ya̱ṉka waitneasrum arant ajastarum. Tura ni tunaarí̱n iisha makumarara̱i̱ji tusarum ni warirí̱ áiniana nusha antiṉkiairap” tímiayi.
27 Tutai Kurái nuyá̱ Tataan tura Apiráma je̱e̱n ayaam pujuiniaka núnaka ikiukiar wéarmiayi. Túrunawarmatai Tataanka Apirámja̱i̱ tura ni nuwe̱sha uchirí̱sha tura ni uchirí̱ peṉké uchich armia nui̱m ni je̱e̱ wáitiri̱n wajasármiayi. 28 Nuyá̱ Muisais chichaak “Jú̱ túrata tusa Uunt Yus wíniaka akuptúkua nuka ju̱ja̱i̱ nekaattarme. Kame wikia wí wakeraknaka túracharuitjiai. 29 Ashí aents jákartiniana núnisaraṉ jú̱ aentska ni neas jákarmataiṉkia antsu nui̱ṉkia Uunt Yuska wíniaka akuptúkchaiti. 30 Antsu Uunt Yus nékashtai̱n yamarman túrakui nuṉka nakaak wa̱a̱ṉka aentsnaka wariri̱ntiuk takamtsuk ku̱jarar jaka matsamtai̱niam* iwiaakainianak utsamtaiṉkia antsu nuiṉkia jú̱ aentska Uunt Yusan muí̱jkiarua nuka paant nekaattarme” tímiayi.
31 Muisaiska nuna ashí chichak umíamuja̱i̱ métek nuṉka nu aents wajarmia nui̱ wakenam puj nakakámiayi. 32 Tura nuṉka nakaak wa̱a̱ṉka niṉkia shuári̱ntiuk tura Kurái shuari̱ armia núnaka warirí̱ntiuk ashí utsamiayi. 33 Nu aentska ashí takaru armia núurtiuk jaka matsamtai̱ Seúrnum iwiaakuk utsanawarmiayi. Kame núṉkaka ataksha tímiatrusaṉ chimiamtai Israera shuari̱ iruntraruka ashí iimiainiamunmaṉ nú aentska kajinkiarmiayi. 34 Kame nú aents utsanainiak charaatum meṉkararmatai Israera shuari̱ nui̱ ayamach wajarmia nuka “iincha nuṉka ku̱jatmarara̱i̱ji” tusar ashí pisakármiayi. 35 Nuya̱ṉka Úunt Yusai̱ya̱ ji tara tusiantu seṉkuintia aents kuṉkuinian áestiarmia nunasha ashí amukármiayi.
Kurái kuṉkuin áestutairi̱ tuke enentáimtutai̱ najanamu
36 Nuya̱ṉka Uunt Yus Muisaisan áujeak chicharuk 37 “Yúsnan pujurin Arauna uchirí̱ Iriasár chicharkum ‘Kuṉkuin áestutai̱ piniṉkia ji keamunmaya̱ṉka júsarti’ antsu nuna kaí̱ri̱ṉkia juukam arant utsaṉta. Warí nuka Yusna shiir akantúkma áiniawai. 38 Antsu iwiaakmari̱n tsaṉkamakar tunáa túrawarainia nú aentsu piniṉkrí̱ṉkia Yus áestutai̱ eṉkektin tsatsapich najankata. Warí Uunt Yus áestuawarma ásar péṉker Yusna akantúkma awajsamu piniṉ áiniawai. Tura nuna iisar Israer shuar enentáimprarat tusa túrunattawai” tímiayi.
39 Nuya̱ṉka Yúsnan pujurin Iriasárka aents áesnakarma nuna piniṉkrí̱ kuṉkuin áestutai̱ yaṉkú jiruja̱i̱ najankamun júukmiayi. Tura Yus áestutai̱ eṉkektinian jiru tsatsapchin najankamiayi 40 Kame nuna iisar Araun aentsnumia̱nchuka chíkichkia kuṉkuinian Uunt Yusan áestuattsa weankachminia nuna paant nekaawartiniaiti. Kame Muisaisai̱ni̱ Uunt Yus chichakmatai Kurái ni írutramuri̱ji̱a̱i̱ urukawarmakia núnikiara̱i̱ṉ tusa núnaka túramiayi.
Aents kaji̱nkiarma
41 Nuyá̱ kashí tsawantai̱ Israer shuarka ashí Muisaisan Araunja̱i̱ kajerkar yajauch chicharainiak “Átumka Uunt Yusa shuari̱ kajeṉkurme” tiármiayi. 42 Nuna tiar Muisaisan Araunja̱i̱ yajauch awajsatai tusar irunturar pujursar Yus Shiir Awajtai̱ Je̱a̱nmaani̱ íimiaj tukamá Yus Shiir Awajtai̱ Je̱e̱n yuraṉkim amúan wáinkiarmiayi. Nui̱ Uunt Yusa winchari̱ paant wantinkiamiayi. 43 Túrunamtai Muisais Araunja̱i̱ Yus Shiir Awajtai̱ Je̱e̱n eem wéarmiayi. 44 Tura nui̱ Uunt Yus Muisaisan áujuk chicharuk 45 “¡Ju̱ aents iruntrar pujuinia nuya̱ṉka átumka éṉkastarum. Wárichik amukártatjai!” takui̱ tikishmarar tsuntsumawarmiayi. 46 Nuya̱ṉka Muisais Araunan chicharuk “Kuṉkuin Yus áestutai̱ piniṉ achikiam Yus áestutai̱nmaya̱ ji eṉkeam kuṉkuincha yaram aents irunar pujuiniana nui̱ wari wetá. Túram aents yajauch túrawarmanum akikmatkarta. Warí Uunt Yus suíran ka̱e̱ kaje̱ntkamtai aents kaji̱i̱tian juárkiarai” tímiayi. 47 Tutai Araunka Muisais timia tímiatrusaṉ kuṉkuin Yus áestutai̱n achik aents irunar matsamármia nuní̱ tsékeṉkimiayi. Kame ju̱ nekaata aents irunar matsatáiniaka kajinian jearmiayi. Nuya̱ṉka kuṉkuinian ekemátak aents yajauch túrawarmanum akikmatkarmiayi. 48 Nuna túrak aents iwiaakainiasha nuyá̱ jákarusha matsatáiniamunam ajapén wajasmiayi. Nuna túramtai aents kaji̱niamusha meṉkakamiayi. 49 Kame Kurái túramuja̱i̱ aents kaji̱ṉkiarmia nuya̱shá aentska jú̱ja̱i̱sha katurse mir siatisiántu jákarmiayi. 50 Nu kaji̱i̱t naṉkaamasmatai Yus Shiir Awajtai̱ Je̱a̱ wá̱i̱ti̱a̱i̱ri̱n Muisais pujumia nui̱ ataksha Araunka waketkimiayi.