Wekasarma

Yusna akantúkma ainia nu umikiartin

6 Uunt Yus Muisaisan ataksha chicharuk 2 “Israer shuar áujsarta tura chicharainiakum ‘Áishmaṉ núja̱i̱nchuka nuwa̱ Uunt Yusna akantúkma nasaréu átaj tákuṉka 3 wíniuncha tura chíkich umutai̱ncha umarchartiniaiti. Núnisaṉ winiu ikiariámuncha tura chíkich umutai̱ ikiariámu áiniana nunasha umarchartiniaiti. Tura uwa yumiri̱ncha peṉké umarchartiniaiti núnisaṉ uwa sameknasha nuyá̱ ikiarámuncha yúachartiniaiti. 4 Ní nasaréu ajas pujustatna nu amuumamka úwanmaya̱nka wariniaksha yúachartiniaiti. Kame jiṉkiainkesha núja̱i̱nchuka saepenkesha yúachartiniaiti.

5 Núnisaṉ nasaréu ajas pujamu amúachmanumkeka ni intiashí̱ncha tsupirchartiniaiti. Uunt Yus íimmianuma akantúkma tura nasaréu awajsamu umiimiam Uunt Yusai̱ tunaarincha átatui tura intiashí̱ncha aṉkant tsakatmartiniaiti.

6 Uunt Yusna akantúkma pujuttana nui̱ṉkia aents jakanka peṉké weantukchatniuiti. 7 Tura Yusna akantúkma asa ni aparí̱ṉsha nukurí̱ṉsha yachi̱ṉsha núja̱i̱nchuka umai̱ṉsha jakamtaisha nuja̱i̱ mui̱jmiai̱ ajakchatniuiti. Warí ni Yusri̱ akantúkma ni muuke̱n awai. 8 Tura nasaréu pujuttana nu amumam Uunt Yusai̱ akantúkma átiniaiti.

9 Kame aya aneachma aents niji̱a̱i̱ tsaniṉ pujá jakamtai tura Yusna akantúkma nu mui̱jmiai̱ ajaska imiatkincha ajastiniaiti tura intiashí̱n tsupir kesá kesá awajsatniuiti. Kame nasaréu ajastatna nu tsawantin tsawant siátitin intiashí̱ṉkia tsupirtiniaiti. 10 Antsu tsawant úchutinkia jimiará yampitsan núja̱i̱nchuka shimpia uchich apu maṉkarún itiatniuiti. Yúsnan pujurin pujamunam Yus Shiir Awajtai̱ Je̱a̱ wá̱i̱ti̱a̱i̱ri̱n itiatniuiti. 11 Nuya̱ṉka Yúsnan pujurin makumarmanum Yus súsatniun chikichkiniak áestuattawai tura chikichnaka takamtsuk áestuattawai. Túram nuja̱i̱ tunáa túramu tumashri̱n akikmatkattawai. Warí jakaan antiṉ tunaan túrachaik. 12 Túrasha mui̱jmiai̱ ajaku asa emka urutmá tsawanta Yusna akantúkma pujusuit nuka ántar juáktatui. Tura urutmá nukapea Uunt Yusna nasaréu pujustata núnaka Yúsnan pujurin atakka akantúktinaiti. Nuya̱ṉka makumarmanum Yus súsatniun chikichik murik áishmaṉ chikichkí uwí takakun itiatniuiti.

13 Tura Yusna nasaréu pujá tsawant jeamtai umiktinia nuka jú̱ áiniawai. Yus Shiir Awajtai̱ Je̱a̱ wá̱i̱ti̱a̱i̱ri̱n tátiniaiti. 14 Tura Uunt Yus súsatniua nuna murik áishmaṉkan tunamárcha chikichik uwí takakun chikichkiniak takamtsuk áestuatniun nuyá̱ murik nuwa̱ tunamárcha chikichik uwí takakun chikichkiniak makumarmanum Yus súsatniun núnisaṉ murik áishmaṉ tunamárcha chikichkiniak Uunt Yus shiir awajkur áestuatniun itiatniuiti. 15 Ántsaṉ nekas peṉkeri̱ trikiu tí péṉker nekeṉma asuitiji̱a̱i̱ pachimprar paṉ najanamu karin eṉketáchman chikichik chaṉkinniak tura chíkich paṉ, kayeti ániun, karin eṉkettsuk najanamu asuitiji̱a̱i̱ yakarman nuyá̱ Yus arak susamuja̱i̱ apatak ni umatairi̱ji̱a̱i̱ irur itiatniuiti. 16 Tura tunaanum áestuatniua nuna núnisaṉ takamtsuk áestuatniua nunasha Yúsnan pujurin itiá Uunt Yusan mái̱ súsatniuiti. 17 Núnisaṉ murik áishmaṉ tunamárcha Uunt Yus shiir awajkur áestuatniunka trikiu nekas peṉkeri̱ tí peṉker nekeṉma asuitiji̱a̱i̱ pachimprar paṉ najanamu karin eṉketáchma chikichik chaṉkin itiamua nuja̱i̱ apatak Uunt Yusan súsatniuiti. Nuna tura umik nuya̱ṉka Yus árak susamun umutai̱ji̱a̱i̱ apatak Uunt Yusan susattawai. 18 Tura umik nasaréu asa Yus Shiir Awajtai̱ Je̱a̱ wá̱i̱ti̱a̱i̱ri̱n intiashí̱n tsupir kesá kesá awajsatniuiti. Nuya̱ṉka intiashrurua nu tsupirman achik Uunt Yus shiir awajkur áestamunam wakenam ji ana nui̱ áesatniuiti. 19 Tura nasaréu intiashí̱n tsupir kesá kesá awajás amukmatai Yúsnan pujurin murikiú taṉkiri̱ iniarkámun achik trikiu nekas peṉkeri̱ tí peṉker nekeṉmaja̱i̱ asuiti pachimprar paṉ najanamu karin eṉketáchman chikichkiniak achik núnisaṉ chíkich paṉ, kayeti ániun, karin eṉkettsuk najanamuncha chikichkiniak nasaréu uwejé̱e̱n súsatniuiti. 20 Nu susamun Yúsnan pujurin Uunt Yus íimmianum takuí pe̱a̱tkatniuiti. Kame nuka netsepé̱ takuir pe̱a̱tkar susamuja̱i̱ tura makui̱ takuir iniaktusmaja̱i̱ métekrak Yúsnan pujurin akantúkma áiniawai. Nu túruna uminkiamtaiṉkia nasaréu shuarka wíniunka umarminiaiti.

21 Kame nasaréu pujusan ju̱na umiktatjai tuíniana tura nasaréu warinia Uunt Yus susar umiktinkia jú̱ áiniawai. Núnaka túrayataṉ nasaréuka núna nukap súsatniun wakerakka ni jeana nuja̱i̱ métek susamniaiti. Tura wariṉkish ju̱na túran umiktatjai tákuṉka nasaréu jú̱ akupkámuja̱i̱ métek umikiartin áiniawai’ tawai titiá” tímiayi.

Yúsnan pujurin Israer shuaran yumiṉkrartin

22 Uunt Yus Muisaisan chicharuk 23 Araun ní uchirí̱ji̱a̱i̱ áujsarta tura chicharainiakum “Jú̱tiksarum Israera shuari̱ṉkia yumiṉkratarum. Chicharkuram

27 Kame nútiksarum Israer shuarnumka Winia naar untsuktiniaitrume túrakrumni̱ṉkia Wi péṉkernum yumiṉkrartatjai” tímiayi.*