Márkus

Kuatru míran Jesus ayuramu

(Mat. 15:32-39)

8 Nu tsawantai̱ shuar timiá untsurí iruntrarmiayi. Yurumkari̱ atsakui Jesus ni unuiniamuri̱n untsukar chicharainiak 2 “Ju̱ shuaran waitnentajai. Menaintiú tsawant Wiji̱a̱i̱ pujuinia ásarmatai ni yurumkari̱ amukachaik. 3 Tura ni je̱e̱n ayurtsuk akupeamka yajaya̱ káunkaru ásar tsukari̱i̱n jintiá pimpikiartatui” tímiayi. 4 Tutai ni unuiniamuri̱ chichainiak “Túrasha ju̱i̱ atsamunam ju̱ aents ejemararat tusar ¿tuyá̱ yurumkak wainkiattaji?” tiármiayi. 5 Tutai Jesus nin chicharainiak “¿Urutmá paṉ aa?” tutai “siati awai” tiármiayi. 6 Nuiṉkia ashí aentsun “nuṉká pujustarum” tiármiayi. Tura páṉkan achik Yusan yumiṉsamiayi. Tura puur aentsun ajamsatarum tusa ni unuiniamuri̱n susamiayi. 7 Tura uchich namaksha ishichik aan achik Yusan yumiṉkias ni unuiniamuri̱n chicharuk “Ju̱sha shuar ajamsatarum” tímiayi. 8 Túram ashí yurumáwar ejemararmiayi. Puunar ampiniáruncha siati chaṉkinnium áimkiarmiayi. 9 Kuatru mir aents yurumáwarmiayi. Yurumáwar amikiarmatai Jesus nin áujas akupkarmiayi. 10 Tura ni unuiniamuri̱ji̱a̱i̱ kanunam eṉkemprar Tarmanúta nuṉkanam wéarmiayi.

Pariséu Jesusan iniakmasta tiarma

(Mat. 16:1-4; Ruk. 12:54-56)

11 Pariséu Jesusja̱i̱ áujmattsatai tusar tariarmiayi. Nekapsatai tusar wakeruiniak Nin chicharuk “Nayaimpinmaya̱ kakaram iniakmasta” tiármiayi. 12 Tuíniakui Jesus kúntuts enentáimias mayati chichaak “¿Urukamtai yamaiya̱ aentstiram, nayaimpinmaya̱ kakarman iniakmasat tusarum wakerarum? Nuka peṉké sunaschattarme, paant tájarme” tímiayi. 13 Nuyá̱ nin ikiukiar ataksha kanunam eṉkemár amain katiṉmiayi.

Pariséu túramuri̱ji̱a̱i̱ aneartarum

(Mat. 16:5-12)

14 Tura ni unuiniamuri̱ yurumak jukitiai tukamá kajinmatkiarmiayi. Kanunmaṉka aya chikichik páṉnak takaku ármiayi. 15 Jesussha ni unuiniamuri̱n enentáimtikiuk chicharainiak “Enentáimpratarum. Pariséu wakaprutai̱ tura Irutisa wakaprutairi̱sha mai̱ aneartarum” tímiayi. 16 Tutai ni unuiniamuri̱ nuamtak tunaiyar chicharainiak “Paṉ kajinmátkin asakrin nuna túramtsujiash” tiármiayi. 17 Tura Jesus nuna nekáa chichaak “¿Urukamtai aya yurumkak enentáimtarum. Tuke nékatsrumek. Peṉké enentáimtsurmek. Atumí enentái̱ tuke kiritkiait? 18 Ji̱mi ai̱sha ¿itiura wáintsuram? ¿Kuíshim ai̱sha itiura ántatsrum?* ¿Ashí kajinmátkintrumek? 19 Nekaatarum, nuik seṉku páṉkan púuran seṉku míran ayurachmakaj. ¿Tura ampirma urutmá chaṉkinnium chumpíamarum?” tímiayi. Nisha tutai “Tuse chaṉkinnium chumpíamji” tiármiayi. 20 Ataksha Jesus chichaak “Tura siati paṉja̱i̱ kuatru míran ayuramtai ¿ampirmásha urutmá chaṉkinnium chumpíamarum?” Tutai nisha “siati” tiármiayi. 21 Tuma asamtai Jesus chichaak “¿Itiura imiá nékatsrum?” tímiayi.

Jesus kusurun íimtikmia

22 Nuyá̱ Petsaitianam jeawarmiayi. Jeawarmatai áishmaṉ ji̱ kusurun Jesusan itiariármiayi. Túrawar antiṉta tusar seawarmiayi. 23 Tuma asamtai Jesus uwejnum achik eṉkeki̱ jukí̱ péprunmaya̱ ji̱i̱ki̱ ji̱nium usukí̱ji̱a̱i̱ kuérmiayi. Tura uwejé̱ja̱i̱ antiṉ “¿íimmek?” tímiayi. 24 Tutai kusuru iimi chichaak “Aentsun wainiainiajai túrasha paantcha. Numi wekainia ániun wainiainiajai” tímiayi. 25 Nuyá̱ ataksha Jesus ni uwejé̱ja̱i̱ kusuru ji̱n antiṉmiayi. Tura kusurúsha úmamkes iis péṉker ajas ashí paant iimpramiayi. 26 Jesus chichaak “Je̱e̱miin wéakum péprunam waya̱waip tura shuar ujakaip” tímiayi.

Pítiur Jesusan “Yusa Anaikiamurinme” timia

(Mat. 16:13-20; Ruk. 9:18-21)

27 Jesus ni unuiniamuri̱ji̱a̱i̱ uunt pepru Sesaria Jiripiunam jeatsuk tíjiu̱ch uchich péprunam irasarmiayi. Jintiá wésar Jesus ni unuiniamuri̱n chicharainiak “¿Winiasha yaiti turutainiawa?” tímiayi. 28 Tutai nisha chichainiak “Chíkichkia chichartamainiak imiakratin Juáṉkaiti turamainiawai. Tura chíkichka Iríasaiti tura chikicha yaunchu Yúsnan etserin nantakniua núiti turamainiawai” tiármiayi. 29 Tutai Jesus chichaak “Atumsha, ¿warí turutrumea yáitiaj?” Tutai Pítiur chichaak “Ámeka Krístuitme. Yusai̱ya̱ akupkámuitme.” 30 Tutai Jesus chichaak “Peṉké etserkairap” tímiayi.

Jesus Ni jákatniuri̱n ujakma

(Mat. 16:21-28; Ruk. 9:22-27)

31 Tuke ujaki̱ wéak chichaak “Wi Aents Ajasuitjiana ju̱ tí waitsatniuitjiai. Israer shuarti ii úuntri̱sha, Yúsnan pujurniu úuntri̱sha, ii jintinniuri̱sha Winia nakitrurar mantuawartatui. Túrasha menaintiú tsawant naṉkaamasmatai nantaktiniaitjiai” tímiayi. 32 Nunasha paant ujakmiayi. Tura Pítrusha Jesusan arantach jukí̱ kakantramiayi. “Tu chichasaip” tímiayi. 33 Tutai Jesus ayantmatar ni unuiniamuri̱n iis Pítrun kakantar chicharuk “Éṉkatmasta Satanásá. Ámeka Yusna ana nu enentáimtatsme, antsu aya aentsnak enentáimtame” tímiayi. 34 Nuna tuasua amik tura nui̱ matsamármia nunasha ni unuiniamuri̱ncha untsuk chicharainiak “Shuar Winia nekas nemartustasa wakerakka ni wakeramuri̱nkia iniaisati tura ni krusri̱ yanakí̱ nemartusti. 35 Kame shuar ju̱ nuṉkanam aya niṉki anenmamkuṉka nu shuar ni iwiaakmari̱n emeṉkáktatui. Antsu Winia anentu asa tura winia chichamprun anea asa shuar aya péṉker pujustinniak enentáimtsuna nu nekas iwiaakman wainkiattawai. 36 Nekaata, shuar ashí ju̱ nuṉkanam írunna nuna sumaksha túrasha ni wakaní̱ jinium wéakuisha ¿itiurak péṉker pujusaint? 37 Shuar ni wakaní̱n uwemtikrataj tusa wakerak ¿urutmak akikmakaint? 38 Antuktarum. Yamaiya̱ aents Yusan nakitiar ajapawaru yajauch ainia nu iimiainiamunam shuar Winia natsantrakuiṉkia tura winia chichampruncha natsantakuiṉkia Wi, Aents Ajasuitjiana ju̱ winia Aparu kakarmari̱ji̱a̱i̱ tura nayaimpinmaya̱ péṉker suntarja̱i̱ atak táakun nú shuaran natsantrattajai Wisha.” Tú timiayi Jesus.