Rúkas

Suntara takarniúri̱n Jesus tsuarma

(Mat. 8:5-13)

7 Jesus aentsun unuiniasua amik Kapernáumnum jeamiayi. 2 Nui̱ Rúmanmaya̱ suntara uuntri̱ pujumiayi. Nu uuntri̱ takarniúri̱ ti aneamuri̱ jakamnia jáamiayi. 3 Tura Jesusan pachis áujmatainian antuk, ame shuarum Jesusan itiartiti tura winia takarniúrun tsuárturti tusa Israer shuara úuntri̱n akupkámiayi. 4 Nisha Jesusan weriar umirtukat tusa ti seainiak “Ju̱ uunt nekas yáiṉtin péṉkeraiti. 5 Nisha yajaya̱ apachitiat iin shiir enentáimturmaji. Tura iruntai̱ je̱a̱n je̱a̱mtinniasha niṉki chicharkaiti tura yaya̱wai” tiármiayi.

6 Nuyá̱ Jesus niji̱a̱i̱ wémiayi. Tura ni je̱e̱n jeastatuk jatemsamtai kapitiáncha ni amikri̱n akatar ju̱ titiarum tusa Jesusan akuptúkarmiayi. Nisha Jesusan chicharuk “Uuntá, ántram waya̱taj tu enentáimsaip. Ame ti naṉkamantu asam winia je̱a̱rui̱ waya̱chminiaitme. 7 Tuma asakmin imia wiki Amiin jeatniun arantúkjame. Áyatik ‘péṉker ajasti’ tákumin winia takarniúrsha péṉker ajatrústatui. 8 Wi nékajai. Winia úuntur winia akuptuiniawai. Tura wisha suntaran akupénajai. Nunasha wi ‘wetá’ takui̱ wéawai. Tura chikichnasha ‘winitiá’ tutai winiawai. Tura winia takartintrun ‘ju̱ túrata tutai umíawai’” tímiayi. 9 Jesus nuna antuk ti enentáimias ni nemarainian chicharainiak “Nekas tájarme Israer shuar Yusan tímiatrus enentáimtinian wáinchaitjiai” tímiayi. 10 Tura uunta akatrámuri̱ je̱á̱ waketkiar, takarniúri̱ péṉker ajasún wáinkiarmiayi.

Jesus wajé̱ uchirí̱n iniantkímiu

11 Nuyá̱ ukunam chíkich pepru Nain tutainiam ni unuiniamuri̱ji̱a̱i̱ tura chíkich untsurí aentsja̱i̱ Jesus wémiayi. 12 Tura péprunam nuntumas jakaan iwiarsatai tusar juínian wainkiamiayi. Jakáa nukurí̱ wáje̱yayi tura uchirí̱ jakamia núchikiyayi. Tura ti untsurí nú peprunmaya̱ nin nemarsarmiayi. 13 Jesus nu waje̱n wainiak tura waitnentar “útip” tímiayi. 14 Nuiṉkia jakaa eṉkerman Jesus tarunt antiṉmiayi. Nuna juíniasha wajasármiayi. Nuiṉkia Jesus jakaan chicharuk “Umpá nantaktia, tájame” tímiayi. 15 Tutai nisha nantaki̱ pujus chichaamiayi. Tura Jesus ni nukurí̱n “Uchiram Ju̱jú̱” tímiayi.

16 Tura matsamiarmia nu, nuna wáinkiar ashamkarmiayi. Tura Yusa náari̱n shiir awajsarmiayi. Tura chichainiak “Yúsnan etserniuchukait Nisha. Ataksha Yúsnan etserin uunt ana nu tarutramji” tiármiayi. Tura “Israer shuarti Niniu ájinia nuna yaintmaktai tusa Yus tarutramji” tiármiayi. 17 Tura ashí Jutanmaya̱sha tura ni írutkamu nuṉka armia nuya̱sha Jesus túramia nuna nekaawarmiayi.

Juaṉ Jesusai̱ akatar akupma

(Mat. 11:2-19)

18 Juaṉ ni unuiniamuri̱ ujakam Jesus túramun nekaamiayi. Nekáa ni unuiniamuri̱n jímiaran untsuk chicharuk 19 “Atumsha Jesusai̱ werum aniastarum. ¿Amesha nekas Kristu Yus akupkámu tátinia núkaitiam. Antsu chikichak nákastatajⁱ? titiarum” tusa Jesusai̱ akupkarmiayi. 20 Tutai nisha Jesusan werí jeariar chicharainiak “Iincha imiakratin Juaṉ akatar akuptámkaji. ¿Amesha nekas tátinia núkaitiam. Chikichak nákastatajⁱ? Nu nekaatai tusar wakeraji” tiármiayi.

21 Wats, ni jeawarmia nui̱ Jesus untsurí jaan tsuártasa pujurmiayi. Iwianchrukuncha iwianchri̱n ji̱i̱rki̱ akuptúktaj tusa pujurmiayi. Tura kusurúncha íimtikmiayi. 22 Tuma asa Jesus akatrámun chicharuk “Waketkirum átum antukurmena tura wáinkiarumna nusha ashí ujaktarum. Kusurúsha wáinmainiawai,* shutuap ainia nusha péṉker wekainiawai, tunamárusha tsuámainiawai, empekusha ántuiniawai, jakaasha atak iwiaaku ajainiawai tura kuítrinchanumsha uwempratin chicham ujakmaiti.* Juaṉ nu ujaktarum. 23 Yawe̱tsuk Winia tuke shiir enentáimturna nú shuar shiir átatui” tímiayi Jesus.

24 Waketkiarmatai Jesus Juáṉkan pachis áujmatainian antuk shuar matsamármia nuna chicharuk “Shuar atsamunmasha ¿warí werimiarum. Pintiu nase umpuam atúu we ju̱ní̱ we ajana nu iistai tusarmek wémarum? 25 Kame ¿warí werimiarum. Shuar péṉker iwiarmampra iistai tusarmek wémarum? Warí, péṉker iwiarmampraka úunt akupniu je̱e̱n pujuiniatsuk. 26 Nuiṉkia ¿warí werimiarum. Yúsnan etserniuk werimiarum? Maa, nú naṉkaamas wainkiarme. 27 Yaunchu Yus Chichamnum ju̱ áarmaiti

‘Winia akatrámurun amiini̱ emka akupeajai ame jintimín iwiarat tusan.’*

28 Nekasan tájarme, Yúsnan etserin Imiakratin Juaṉja̱i̱ naṉkaamas uunt atsuwiti. Túmaitiat Yus akupeamunam páchinia nu shuarka nekas imianchaitiat, Juaṉja̱i̱ naṉkaamas átatui” tímiayi. 29 Peṉké shuarsha kuítian juusha Juaṉ imiaimiuja̱i̱ imianiarmia nu, Jesus timian antukar Yusa náari̱n shiir awajsarmiayi. 30 Túrasha Pariséusha Israer shuara jintinniuri̱sha Yus yáiṉtaj támaitiat Juaṉ imiaamuja̱i̱ imiancha ásar nakitrarmiayi. 31 Nuiṉkia Jesus chichaak “Yamaiya̱ aentstiram wariji̱a̱i̱ṉ métektakuitrum nuna ¿itiurak tíntjiarum? 32 Uchiji̱a̱i̱ métek árume. Ni ai̱ji̱a̱i̱ iruntrar nakurústaj tukamá chichainiak ‘Námpera áinis nakurústaitsar peem umpuarji túrasha jantsemáchurme. Nuyá̱ iwiarsatniua áinis nakurústaitsar íwiareakur kantamtai̱ kantamáji túrasha átum útcharme.’ Tu tuíniawai. 33 Atumsha núnisaitrume. Kame Imiakratin Juaṉ núkap yurumtsuk úmutsuk wekaimiayi. Túmakui̱ átumka ‘iwianchrukuiti’ tímiarme. 34 Nuyá̱ Wisha Aents Ajasan támajai. Tura yurumá úmakuisha ‘ti yurumin tura ti nampenaiti, kame ashí yajauch shuaran tura kuítian juu amikrinti’ túrutrume. 35 Wats nekas neka ainia nu Yusa nekatairi̱n iniakmainiawai.” Tú timiayi.

Semuṉ Jesusan ipiaamu

36 Winí̱ yurumáitia tusa Pariséu Jesusan ipiaamiayi. Tutai Jesus ni je̱e̱n werí ekentsa yurumtainiam pujusmiayi. 37 Nuiṉkia nu péprunmaya̱ yajauch nuwa̱ Jesus Pariséu je̱e̱n yurumáttsa weyi táman antuk, kayá mutinium kuṉkuin áimkiamun takukí̱ jearmiayi. 38 Tura utki̱ Jesusa nawe̱n pujuras nea̱jki̱ji̱a̱i̱ nijiarmiayi. Tura intiashí̱ji̱a̱i̱ japirmiayi. Nuyá̱ nawe̱n mukuná kuṉkuinian ni nawe̱n ukatramiayi. 39 Pariséu Jesusan ipiaamia nu núna wainiak ní enentáimias “Ju̱ nekas Yúsnan etserniuitkiuṉka ju̱ yajauch nuwa̱ ántiana nuna nekaawainti. Warí, nisha netse nuwa̱chukait” tu enentáimsamiayi.

40 Nuiṉkia Jesus Pariséun chicharuk “Semuṉká, ámin titiaj tusan wakerajai” tutai Pariséu chichaak “Turuttia, Uuntá” tímiayi. 41 Tutai Jesus chichaak “Kuítian ikiamniun jimiará aishmaṉ tumashmakarmiayi. Chíkich kiniantu tura chíkichkia aya seṉkuintiak tumashmakmiayi. 42 Akiktin tsawant jeamtai mái̱ metek takakcha ármiayi. Tuma asamtai kuítian ikiamin ni tumashri̱n mái̱ metek asakátrarmiayi. Wats, turuttia ¿tú aishmaṉka ikiamniun nekas aneamia?” 43 Tutai Semuṉ chichaak “Enta, núkap tumashri̱n tsaṉkuramia nu” 44 tutai Jesus aya̱k “Nekas tame” tímiayi. Nuiṉkia nu nuwa̱n iis Semuṉkan chicharuk “Ju̱ nuwa̱ wáintsumek. Ame je̱e̱miin waya̱mtai winia nawer nijiartin entsa suruschamame antsu jú̱ nuwa̱ka nawerun nea̱jki̱ji̱a̱i̱ nijiarturai tura intiashí̱ji̱a̱i̱ japirturai. 45 Mukutam áujtuschamame antsu niṉkia waya̱j nuiṉ ayamtsuk nawerui̱ mukutui. 46 Winia muukarui̱sha asuiti ikiurtuschamame antsu niṉkia nawerui̱ kuṉkuin asuitin ukatrurai. 47 Nu tuma asamtai tájame nisha Winia ti anentu asamtai ni yajauchin untsurí ana nu tsaṉkuramuiti. Tura yajauchir ishichik awai tau tsaṉkuramu ana nuka ishichik aneṉkratniuiti” tímiayi Jesus. 48 Nuiṉkia nuwa̱n chicharuk “Ame yajauchiram tsaṉkuramuitme.” 49 Tura chíkich ipiaamu Jesusja̱i̱ ekentsa yurumtainiam pujuarmia nu “¿Ju̱sha ya asaṉ tunaancha tsaṉkurea?” nuamtak tunainiarmiayi. 50 Tura Jesus nuwa̱n chicharuk “Uwemtikkiartiniaiti tu enentáimturu asam uwempraitme. Shiir wetá” tímiayi.