Juaṉ

Áraka áintsaṉketjai

15 “Witjiai nekas araknaka tura Winia Aparka arakan wáinniuiti. 2 Ashí kanawe Winí̱ áyat nereatsna núnaka tsupirak jurustatui. Antsu nereana núnaka nú nukap nerekat tusa puruartatui.

3 Wi ujakjarmena nuja̱i̱ puruarmaitrume. 4 Átumka Winí̱i̱ pujustarum núnisnak Wisha atumíin pujustatjai. Warí kanawe̱ kampui̱i̱n áchitkiachkuṉka níṉkikia peṉké nerekchamniaiti. Núnisrumek atumsha Winí̱i̱ áchitkiachkurmeka nerekchattarme.

5 Wikia kampuintji̱a̱i̱ tura átumka kanawe̱ntrume. Ni Winí̱i̱ pujakuiṉkia núnisnak Wisha niní̱ pujaknaka núkap nerektatui. Antsu Wini̱i̱ya̱ kanakiṉkia péṉkeran túratniunka peṉké tujintkiattawai. 6 Winí̱ tuke áchitkiachuka ajapam kukartatui. Kanawe̱sha kukarmatai irumnar jiniu epeam esaawartatui.*

7 Tuke Winí̱ áchitkiaitkiurmeka tura Winia Chichamprusha kajinmáttsuk emetarmeka átum wakerarmena nu seakrumin amastatjai. 8 Átum núkap nereakrumni̱ṉkia ashí shuar ‘Nekas Jesusa unuiniamuri̱nti’ turamartatui tura Winia Aparnasha shiir awajsártatui. 9 Winia Apar anenna nútiksanak Wisha atumín aneajrume. Winia aneamur tuke atarum. 10 Winia Aparu akupkámuri̱n umíakun tuke ni aneamuri̱ntjiai. Núnisrumek winia akupkámur umíakrumka tuke winia aneamur átatrume.

11 Wi warajna áintsarmek warastarum tusan nuna tájarme. Tura ti shiir warastatrume. 12 Wi akupkámu ju̱i̱ti, Wi aneajrumna nútiksarmek ashí anenaitiarum. 13 Shuar ni amikri̱n nekas yáiṉtaj tusa aneak jarana nuna naṉkaamas aneen áminkiait. 14 Wi akupeamu takaakrumka atumsha winia amikruitrume. 15 Takarniuka ni uuntri̱ takaana nuna nékatsui. Tuma asamtai ‘winia takarniúruitrume’ tátsujrume. Antsu ashí winia Apar táman ujaku asan ‘winia amikruitrume’ tájarme. 16 Aya atumí enentáimsamuri̱ji̱a̱i̱ṉ Wí shuar ajaschamarme. Antsu akatrámur ajastarum tusan atumniaka achikmajrume Wi. Winia takatur takastiniaitrume. Túrarum péṉker túratniuitrume nerektinia áintsarmek. Tura nu nere amuutsuk tuke átiniaiti. Tuma asamtai winia Apar searmena nuna amastatui. 17 Jú̱naka akupeajrume nuamtak mái̱ anenai ajatarum.

Jesusnasha Níniuncha nakitruiniamu

18 Ju̱ nuṉkanmaya̱ shuar Winia emka nakitrurar atumniasha nakitramarme.

19 Atumsha ju̱ nuṉkanmaya̱ shuaraitkiurminkia níniua nútiksaṉ anenmaintrume. Antsu Wí shuar ajastarum tusan ju̱ nuṉkanmaya̱ achikmajrume. Túramtai nekas ju̱ nuṉkanmaya̱nchuitrume yamaikia. Nu asamtai nu shuar nakitramainiawai. 20 ‘Takarniuka ni uuntri̱ naṉkaamaschaiti’ tíchamkajrum. Shuar Winia yajauch awajtúsaru ásar atumniasha yajauch awajtámsartatui. Chikicha umirtukaru ásar atumniasha umirtamkartatui. 21 Winia Akuptúkun nékachu ásar Winia enentáimturkurmin yajauch awajtámsartatui.

22 Wi tana Yus Chichaman nin ujakchamtaiṉkia tunaanum sumamachara̱a̱yi. Antsu ujakma ásar ‘Nékachkun túraitjiai’ tíchamnia áiniawai. 23 Winia nakitruinia nuka winia Aparnasha nakitiáiniawai. 24 Aents peṉké túrachman túrachuitkiuiṉkia yajauch túramunam sumamacharainti. Antsu wi túramun wáinkiaru áiniayat Winiasha tura winia Aparnasha nakitiáiniawai.* 25 Yaunchu Yus akupkámunam áarmaiti ‘Peṉké ántar nakitrurarmai.’* Nu chicham uminkiati tusa túrunaiti.

26 Tura atsaṉtamprattsa yáintmana nuna winia Aparuí̱ya̱ akuptúktatjarme. Nisha tuke nekas tiniu Wakaniti. Nisha Yusai̱ya̱ taa atumín nekamtikramattarme. 27 Atumsha yaunchu Wiji̱a̱i̱ pujusu asarum chikitcha nékamtikiattarme” tímiayi.