Juaṉ
19 Nuyá̱ Piratu Jesusan asutiáwarat tusa suntaran akupkámiayi. 2 Suntarsha Jesusan wishikiainiak tawasap jaṉki najanamun etseṉkrumtikiarmiayi. Yamákái pushincha úunt akupniua áintsaṉ áentsrarmiayi.
3 Nuyá̱ “Israera Uuntri̱a, kakaram ajasta” tiar yapiniam awatiármiayi. 4 Nuyá̱ Piratu atak jiinkí̱ chichaak “Átum wainkiarum nekaatarum tusan Jesusan jí̱i̱ktiatjai. Wikia yajauch túrutairi̱ncha peṉké wáittsujai.” 5 Tímiatai Jesussha jaṉkin etseṉkraku tura pushin yamakáirman entsaru jiinkimiayi. Tura Piratu nui̱ káunkarun chicharainiak “Pai ju̱i̱ti, iistarum” tiármiayi. 6 Yúsnan pujurniu peṉkeri̱sha tura suntarsha Jesusan iisar kakantar untsumainiak “Krúsnum jakati. Krúsnum jakati” ajarmiayi. Piratusha “Átum jukirum mátarum. Ni yajauch túrutairi̱n peṉké wáittsujai” tímiayi.
7 Tura Israer shuar chicharainak “Nu shuar ‘Yusa Uchirí̱ntjiai’ takui̱ jákatniuiti. Iiniu akupeamu aarma nui̱ núniskete” tiármiayi. 8 Nuna antuk Piratusha nu naṉkaamas ashamkamiayi. 9 Ataksha init wayá̱ Jesusan aniasmiayi “¿Tuya̱mpaitiam?” Tura Jesussha peṉké ái̱kchamiayi. 10 Nuyá̱ Piratu chichaak “¿Urukamtia winia ái̱rtsum. Wi jeajna nu nékatsmek? Wakeraknaka krúsnum mátniuncha tura aṉkant akupkatniuncha jeajai.” 11 Tutai Jesussha chichaak “Yus nuna amaschaitkiuiṉkia peṉké tujintkiaintme. Nu asamtai amiin surutka nu ámin naṉkaamas yajauch túriniaiti” tímiayi.
12 Piratusha nú chichamtaik Jesusan aṉkant akupkáttsa wakerimiayi. Antsu Israer shuar kakantar untsumshim chichainiak “Ju̱ aṉkant iniaiyakmeka ame úunt akupniu amikrí̱nchuitme. Ju̱ka ‘úunt akupniuitjiai’ taku atumí úunt akupniuri̱ nemasri̱nti” tu untsumkarmiayi. 13 Piratusha táman antuk akupin pujutai̱nium pujus Jesusan untsukmiayi. Nui̱ kaya ukatkámu asamtai Israer shuar chichamja̱i̱ṉkia Kapata anaikiarmiayi. 14 Paskua namper jeatsa̱i̱ṉ nantu tutupin ajatsa̱i̱ṉ Piratu Israer shuaran chicharainiak “Úunt akupniuram iistarum” tímiayi. 15 Tura ashí “Jakati, jakati, krúsnum maatá” tu untsumkarmiayi. Tura Piratu “¿Atumí úunt akupniuri̱n krúsnum máattajak?” tímiayi. Tura Yúsnan pujurniu peṉkeri̱ chichainiak “Sésarja̱i̱ṉkia naṉkaamas chíkich úunt akupniuka atsawai.” 16 Tutai Piratu Jesusan krúsnum mantamnati tusa tsaṉkatkarmiayi. Túramtai nisha Jesusan júkiar wéarmiayi.
Jesus krúsnum maamu
(Mat. 27:32-34; Mar. 15:21-32; Ruk. 23:26-43)
17 Jesussha ni krusri̱ yanakí̱ Kúrkuta nainnium wémiayi. Kúrkuta támaka Israer shuara chichame̱ja̱i̱ṉkia “muuka ukunch” tawai.
18 Nui̱ krúsnum ajintrurar awajainiarmiayi. Tura mái̱ pae̱ jimiará shuaran chikichik chikichik awajainiarmiayi. Tura Jesus ajapén ámiayi. 19 Piratusha Jesusa krúsri̱n uunt áarman anujkamiayi. NASARÉTNUMIA̱ JESUS, ISRAERA ÚUNT AKUPNIURI̱ tu áarmauyayi. 20 Israer chichamja̱i̱sha Kriaku chichamja̱i̱sha Rúmanmaya̱ chichamja̱i̱sha áarmauyayi. Menaintiú chichamnum aarma asamtai tura Jerusaréṉ pepru tíjiu̱ch asamtai Israer shuar ti untsurí áujiarmiayi. 21 Nu asamtai Yúsnan pujurniu uuntri̱ Piratun jeariar “‘Israera Úunt Akupniuri̱’ aaraip. Antsu ‘Israera Úunt Akupniuri̱ntjiai tawai’ tu aartá” tiármiayi. 22 Tura Piratu áiniak “Wi áaraj nuke átatui” tímiayi.
23 Suntarsha Jesusan krúsnum awajainiar ni entsarmari̱n kuatru akankar aṉkant aṉkant júkiarmiayi. Tura ni pushiri̱n apatsuk najanamu asamtai já̱a̱ktinian nakitrarmiayi. Kame yaki̱ya̱ nuṉkaani̱ apa̱yá̱chma takamtsukeyayi. 24 Tuma asamtai suntar chichainiak “Ju̱ka já̱a̱kchatai. Antsu nakurakrin yának ati nu jukiti” tiármiayi. Núja̱i̱ṉkia yaunchu Yus Chichamnum aarma nu uminkiamiayi. “Winia entsarmarun akantrarmiayi tura nakurúsar awakmakua nuna winia pushirun súsarmiayi.”*
25 Krúsnumsha Jesusa nukurí̱sha Kriúpasa nua̱rí̱ Marisha tura Máktaranmaya̱ Marisha wajaarmiayi. 26 Jesus ni nukurí̱ncha tura ni ti aneamu unuiniamuri̱ncha nui̱ wajan wainiak ni nukurí̱n chicharuk “Nukuru, ju̱ ame uchirmea áintsaṉ atí” timiayi. 27 Nuyá̱ ni unuiniamuri̱ncha chicharuk “Ju̱ ame nukua áintsaṉ atí.” Nu tsawantai̱k nu unuiniamuri̱ ni je̱e̱n jukí̱ awayá̱miayi.
Jesus jakamu
(Mat. 27:45-56; Mar. 15:33-41; Ruk. 23:44-49)
28 Nuyá̱ ashí uminkiamtai Jesus nuna nekáa yaunchu Yus Papinium aarma uminkiati tusa “kitiamajai” tímiayi. 29 Nui̱sha piniṉnum churuin ámiayi. Tura shuar nuna uruchji̱a̱i̱ ejampar sapapja̱i̱ ijiú mukunati tusa susamiayi. 30 Jesussha churuinian naje̱kaa “Ashí túrunatniua nu mash uminkiai” tímiayi. Nuna ti, muuke̱n nená jakamiayi.
Suntar Jesusan páenam naṉkiji̱a̱i̱ ijiumu
31 Nu tsawantai̱ kashinkia Paskua nampera uunt tsawantri̱ asamtai tura ayampratin tsawant aa asamtai Israer shuar jaka aya̱shí̱ nui̱ paant ai̱ṉ tusa nakitrarmiayi. Nu asamtai Piratun seainiak “Krúsnum ajintrurma ainia nuna kaṉkajin suntar kupirkarti. Nuyá̱ wari jákarmatai krúsnumia̱ júkiarti” tiármiayi. 32 Nuyá̱ suntarsha weriar emka krúsnum amia nuna kaṉkaji̱n kupirkarmiayi. Nuyá̱ chikichnasha Jesusja̱i̱ atsantkiar ajintrurma nuna kaṉkaji̱ncha kupirkarmiayi. 33 Tura Jesusan weantuk yaunchu jákaiti tusa kaṉkaji̱n kupirtsuk 34 suntar aya páenam ijiumiayi. Ijiumtaisha nu chichamtaik numpa yumiji̱a̱i̱ puármiayi. 35 Wi Juaṉ nuna wainkia asan nekas tajai. Atumsha Yus enentáimtustarum tusan tí nekas tajai. Wi áarajna nu nekasaiti nékajai. 36 Yaunchu Yus Chichamnum aarma uminkiati tusa túrunaiti. “Ni ukunchi̱n kupirkachartatui” tu áarmaiti.* 37 Tura chikicha “Ijiuarmiania nuna wáinkiartatui” tu áarmaiti.*
Jesus iwiarsamu
(Mat. 27:57-61; Mar. 15:42-47; Ruk. 23:50-56)
38 Nuyá̱ Arimatéanmaya̱ Jusé Jesusa aya̱shí̱n jukitiaj tusa Piratun seamiayi. Nu Jusé Jesusan enentáimtaitiat Israer shuara úuntri̱n ashamak paant nemarsachmiayi. Nisha seamtai Piratu “Jukitia” tímiayi. Tutai Jusé Jesusa aya̱shí̱n jukimiayi. 39 Nikiutémusha Jesusja̱i̱ chichastaj tusa kashi tarimia nu jimiará kuṉkuin pachimpramun tí nukap sumak itiamiayi. Mira kuṉkuinniasha aruí kuṉkuinniasha sumakmiayi. 40 Nuyá̱ Jusé Nikiutémuja̱i̱ Jesusa aya̱shí̱n júkiar kuṉkuinian kuérar tarach esarmaja̱i̱ penuararmiayi. Kame Israer shuarka tuke núnis ikiunain ármiayi. 41 Jesus krúsnum maamua nui̱ aja tíjiu̱ch ámiayi. Nu ajanmasha wa̱a̱ nainnium taurma ámiayi. Nusha yama taurma asamtai jaka nui̱ ikiuschamuyayi. 42 Nu wa̱a̱sha tíjiu̱ch asamtai tura Israer shuara ayampratin tsawantri̱ jeatémamtai Jesusa aya̱shí̱n nui̱ iwiarsarmiayi.