Túramuri̱

Kurintiunam

18 Nuya̱ṉka Papru Atenasnum ikiukí̱ Kurintiunam wémiayi. 2 Tura nui̱ Israer shuaran ni naari̱ Akiran wainkiamiayi. Akiraka Puntu nuṉkanam akiiniauyayi. Tura ukunam Itiaria nuṉkanam pujái̱ úunt akupin Krautiu ashí Israer shuaran Rúmanmaya̱ awemarmiayi. Rúmaka Itiaria nuṉkanmaiti. Nui̱ awemamu ásar Akira Kurintiunam nuik támiayi nuwe̱ Prisiraja̱i̱. Tura Pápruka Akiran chichastaj tusa werimiayi. 3 Akirasha Páprusha mai̱ ju̱na takáu ármiayi, tarach ti núparman je̱a̱ najantain najanin ármiayi. Tuma asamtai Papru Akirai̱ nu takat túrawartai tusa seturmiayi. 4 Tura tuke sáwartin Papru Israer shuar iruntai̱ je̱a̱n wéuyayi. Nui̱sha Israer shuaran Kriaku aentsnasha nútiksaraṉ Yus Chichaman ujakar enentáimtikrarmiayi.

5 Tura nuyá̱ Séras Timiutéuja̱i̱ Masetúnianmaya̱ táarmatai Pápruka miji̱atrutsuk Israer shuaran Yus Chichaman étseruk “Yusa anaikiamuri̱ Kristu átum nákarmena nu Jesusaiti” tímiayi. 6 Tura támaitiat nú chichaman nakitiarmiayi. Túmainiak Páprun katsekkarmiayi. Tuma asamtai Papru, nuiṉkia ikiuajrume tusa, ni pushiri̱n pe̱ar chichaak “Atumek makuumarme. Tura wikia Yusai̱ makuumatsjai. Yamaikia Israer shuarcha ainia nuna Yus Chichaman ujakártaj tusan werajai” tímiayi.

7 Tura nuya̱ṉka Israer shuar iruntai̱ je̱a̱nmaya̱ jiinkí̱ Yusan enentáimtin áishmaṉ Justu je̱e̱n wémiayi. Ni je̱e̱nka Israer shuara iruntai̱ je̱e̱n ayamach pujumiayi. 8 Israer shuar iruntai̱ je̱a̱ chicharniuri̱ Krispu, Uunt Jesusan nekas enentáimturmiayi. Túruna nua̱ri̱ji̱a̱i̱ uchirí̱ji̱a̱i̱sha Yusan umirkamiayi. Tura chíkich aentssha Kurintiunmaya̱ armia nu nútiksaraṉ Yus Chichaman antukar Jesusan enentáimtusar imianiarmiayi.

9 18:​9-10 Nuyá̱ Uunt Yus Páprun mesekran ipiatkámiayi. Chicharuk “Peṉké imiatík awajtámsachartatui Wi ámiji̱a̱i̱ pujakui. Ju̱ péprunmasha untsurí aents Winia ajasártin írunui. Tuma asamtai ashamtsuk winia chichamur tuke etserkata” tímiayi Yus.

11 Tura nui̱ Kurintiunam jimiará uwí ejesatuk Yus Chichaman étseruk pujumiayi. 12 Tura Kariun Akayanam úuntri̱n chichamprin anaikiamu ai̱ Israer shuar Páprun kajerkarmiayi. Tura kajerainiak chichamprin iruntai̱niam irunturarmiayi. Túrawar Páprun júkiar ejeniarmiayi. 13 Tu túrawar úuntri̱n chichamprinian chicharainiak “Jú̱ aishmaṉ Yusan umirkatniun Muisais akupkámia núnaka íikias aushá jintíawai” tiármiayi. 14 Tura Páprusha chichastaj táunak Kariunka chicharainiak “Israer shuartirmesha ju̱sha nekas tunáa túrakuiṉkia tura akupniun umirchakuiṉkia tárumna nuna anturkaintjiarme. 15 Túrasha aya chichamnak tura aya náari̱niak atumí akupkámuri̱niak tau asamtai atumek nuamtak iistarum tájarme. Wikia nu chichamnum pachinkiatniun nakitiajai” 16 taku iruntai̱nmaya̱ a̱a̱ jí̱i̱kmiayi. 17 Tura nuya̱ṉka úuntri̱n chichamprin íimmianumaṉ Kriaku aents Israer shuar iruntai̱ je̱a̱ úuntri̱n Sústinisian achikiar awatiármiayi. Túrasha Kariunka túranak peṉké pachischamiayi.

Papru Antiukíanam ataksha waketkimiu

18 Tura ni je̱e̱n waketkiarmatai Papru nu péprunam untsurí tsawant pujusmiayi. Tura nuya̱sha ukunam Yusai̱ yachi̱ armia nuna áujas ikiuak Prisiraja̱i̱ ni aishri̱ Akiraja̱i̱ Seṉkreanam wéarmiayi. Nui̱ Israer shuar túrutai̱n umíak Papru ni intiashí̱n awampramiayi, nuik Yusan tímiaj nuna yamái umíajai tusa. Nui̱ṉkia Sírianam waketkitiai tusar kanunam eṉkemprarmiayi. 19 Tura nuyá̱ Ipisiunam jeawar Pápruka Prisiran tura Akiran ikiukmiayi. Tura Israer shuar iruntai̱ je̱a̱nam wayá̱ Israer shuar irunar pujuarmia nuja̱i̱ chichasmiayi. 20 Tura nisha Páprun ju̱i̱ṉ núkap tsawant pujusta tusar seawarmiayi. Túrasha támaitiat tujintiajai, tímiayi. 21 Nuya̱ṉka áujas ikiuak “Wisha Jerusaréṉnum námper átatna nuna pachintiuktiniaitjiai. Tura Yus akuptakuiṉkia atak tatajai atumín íistaj tusan” tímiayi. Tura kanunam eṉkemár Ipisiunmaya̱ jiinkimiayi.

22 Nuyá̱ Pápruka Sesarianam jeá nuya̱ṉka Jerusaréṉnum wémiayi, Yus shuaran nui̱ áujsataj tusa. Tura nuyá̱ Antiukíanam wémiayi. 23 Tura Antiukíanam ishichik pujus ataksha wéak Karasea nuṉkanam tura Príjia nuṉkanmaani̱ wekaráktak wémiayi. Tura wéak Yus shuar matsamármia nuna chicharak ikiaká̱rarmiayi.

24 Tumá pujái̱ Arejántria péprunmaya̱ Israer shuar Apurus Ipisiunam jeamiayi. Nisha Yusa yaunchu papiri̱n tí peṉker nekaamiayi. Etserkatniuncha ti nékauyayi. 25 Uunt Yus timia nunasha unuimiátrauyayi. Tura nekas enentáiji̱a̱i̱ chichasmiayi. Jesusa túramuri̱n péṉker jintinniuyayi. Túrasha aya Juaṉ imiakratmanak nekaamiayi. 26 Ju̱ Apurus arantutsuk Israer shuar iruntai̱ je̱a̱nam chichamiayi. Tura Prisira Akiraja̱i̱ ni étserman anturkar nincha akaṉkí̱ júkiar Yusa Chichame̱n ni nekaachmia nuna núkap jintintrarmiayi.

27 Nuyá̱ ukunam Apurus, Akayanam wétaj takui̱ Ipisiunmaya̱ Yus shuar yáiṉkiar papí áarar atakas akupkarmiayi. Nú aentsnum péṉkerak jeat tusar túrawarmiayi. Tura Akayanam jeá nú aentsun Yusa waitneṉkratairi̱ji̱a̱i̱ uwempraru armia nuna ti yáiṉkiarmiayi. 28 Tura Apurus Israer shuarja̱i̱ paant chichasmiayi. Túrasha Yusa Papiri̱ji̱a̱i̱ Jesussha nekas Yusa anaikiamuri̱nti tusa paant jintíak nincha nupetkamiayi.