Túramuri̱

Papru Jerusaréṉnum wema

21 Tura nuyá̱ Yus shuar aujsa ikiukir kanunam eṉkempramji. Tura íṉkiuasmak Kus péprunam jeamji. Tura kashin tsawa̱rar Rútas péprunam jeamji. Tura nuya̱ṉka Patara péprunam jeamji. 2 Tura nui̱ Pataranam pujusár chíkich kanu Pinisia péprunam wea wainkiamji. Túmakui̱ nui̱ eṉkemprar wémaji. 3 Nui̱ wésar Chíprikia wainkiamji. Tura Chíprikia menanmaani̱ aa wariṉkish ikiuakur Sírianam jeamji. Kánuka Tiru péprunam jeá pujustiniuyi, wariṉkish núkap ikiuktin akui. Tuma asamtai iisha Tírunam jear kanunmaya̱ jíinkir péprunam waya̱mji. 4 Nui̱ Yus shuar wáinkiar nuiṉ siati tsawant pujusmaji. Tura Yus shuaran Yusa Wakaní̱ ujakam Páprun chicharainiak “Jerusaréṉnumka wéchatniuitme” tiármiayi. 5 Tura siati tsawant naṉkaamasmatai jiinkimji. Ashí Yus shuar armia nu núwentuk uchirtiuk nemartamkamji, péprunam iniaṉkatmaktiai tusar. Kaanmatkanam jear tikishmarar Yus áujsamji. 6 Tura nu amikiar nuiṉkia áujnaisar ikiukiarmaji. Tura iikia kanunam eṉkemprakrin niṉkia ni je̱e̱n waketkiarmiayi.

7 Iisha Tírunmaya̱ entsak wea wéakuar Turumáitianam nui̱ṉ jíintramji. Tura nui̱ jearsha Yusai̱ yachi̱ armia nu chichasar nui̱ṉ chikichkí tsawant pujusmaji. 8 Kashin tsawa̱rar nuyá̱ jíinkir nuṉkaṉ weri Sesaria péprunam jeamji. Nui̱ Jirip je̱e̱n jear pujusmaji. Jiripikia Yus Chichaman etserniuyayi. Nuik Jerusaréṉnum siati áishmaṉkan Yusa takatrí̱n wáinkiarat tusar anaikiarmia nú Jiripiti. 9 Jiripsha kuatru nawantri̱n yarumkauyayi nuatnakchan. Nisha Yusa Chichame̱n etserin ármiayi. 10 Tura iisha Jirip je̱e̱n wárum tsawantak pujarin Jutanmaya̱ shuar Yusa etserniuri̱ Akapu náartin támiayi. 11 Nisha taa Papru emenmamkari̱n achikmiayi. Tura achik niṉki ni nawe̱n tura uwejé̱ncha jiṉkiamamiayi. Nuna tura chichaak “Yusa Wakaní̱ tawai ju̱na emenmamka nérenniuri̱n Israer shuar Jerusaréṉnum pujuinia nu jútikia jiṉkiawar Israer shuarchanum surukartatui tawai” tímiayi. 12 Iisha nu antukar Papru tímiaji “Jerusaréṉnumka weep.” Sesarianmaya̱ Yus shuarsha núnisaṉ Páprun tiármiayi. 13 Tutai Papru chichaak “¿Urukamtai útkuram winia enentái̱rui̱ kúntuts awajtarum? Wi Jesusna asan Jerusaréṉnum jiṉkiatrarmataisha jákatniun ashamatsjai” tímiayi. 14 Tura iisha Papru emetatai tukamar tujintkiar “Wats, nuiṉkia Uunt Yus wakera nu tímianak atí” tiármaji.

15 Nu tiri iniaisar iwiarnarar Jerusaréṉnum wémaji. 16 Chíprinmaya̱ yaunchu Yus shuar Manasun ni je̱e̱n Jerusaréṉnum takakuya nuna ikiatmastinian wakerimiayi. Tuma asamtai Sesarianmaya̱ ishichik Yus shuar nemartamainiak Manasunnasha júkiarmiayi.

Papru Jakupu je̱e̱n irauttsa wema

17 Tura iisha Jerusaréṉnum jeawakrin nui̱ warasar Yus shuar ti shiir áujtamsarmiaji. 18 Tura kashin tsawa̱r Papru íimiak Sántiaku je̱e̱n wémiaji. Nui̱sha Yus shuara uuntri̱ matsamármiayi. 19 Páprusha áujas amik Israer shuarchanum ni étsermaja̱i̱ Yus túramia nuna yámankamtaikniumia̱ jukí̱ chikichkimias ujakar ujakar awajsámiayi. 20 Papru táman antukar “Yus tí peṉkerchakait” tiármiayi. Tura Páprun ju̱ chichaman tiármiayi “Támena nu péṉkeraiti yatsuru, túrasha Israer shuar timiá untsurí Krístun nekas enentáimtusar Yus shuar ajasu áiniayat ashí Muisais akupkámia nu umiktiniaitji” tuíniawai. 21 “Nú arant yajaya̱ aents taar chichartamainiak ‘Pápruka nusháa jintintiui. Israer shuar chíkich nuṉkanam pujuinia nuna Muisaisa akupkámuri̱ umirkashtinian Pápruka jintintiui. Israer shuarti tsupirnaktin ana nu túrashtinian tura ashí Israer shuar túrutai̱ iniaisatniun Papru imia Israer shuaran jintintiui’ turamainiawai. 22 Wátsek yatsuru, nuiṉkia itiurmaiṉkit. Ame tátintrumin aents nekaawarka ju̱i̱ kajertamainiak káutramkachartatuak. 23 Wats, antsu nuiṉkia ju̱ túrata yatsuru. Ju̱i̱ kuatru áishmaṉ Yusan yaunchu tiarmia nuna umiktasa pujuiniawai. 24 Ni júkiarta. Túram nisha Muisais akupkámia nuna umikiar nijiaamainiakui amesha nijiaamarta. Núnismek kuítniasha ni súsatin ana nu amesha akikmatkarta. Nisha ashí umikiarmatai ni intiashí̱n awampratin áchattawak. Nu áishmaṉka intiashí̱n awampran Israer shuar wáinkiar anturtamkarainia nu nekaschaiti. Antsu Pápruka Muisais akupkámia tímianak túrawai, turamartatui. 25 Túrasha yatsuru, nekaata, Israer shuarcha Yusan nekas enentáiji̱a̱i̱ enentáimtusarua nu papí yaunchu akuptúkmiaji. Israer shuarti túratin ana nu ashí mash túratarum tátsuji, tu áatramji. Tura antsu taṉkun máwar ántar yusan susamu yúashtiniaitrume, tímiaji. Tura numpasha umarchatniuitrume, kajemtikramusha yúashtiniaitrume. Tura tsanirmashtiniaitrume. Tu áatramji” tiármiayi.

Papru achikma

26 Nuyá̱ tiniu asamtai Papru nú kuatru áishmaṉkan júkiarmiayi. Tura kashin tsawa̱rar níimiak nijiaamararmiayi, Muisais timia nútiksaraṉ. Tura Yusan tiarmia nuna wárik umiktinian tura Muisais timia nuna Yus súsatniun ujaktajtsa Papru Yusa Uunt Je̱e̱n waya̱miayi. 27 Túrasha nu siati tsawant amusattuk ajatémsai Ásianmaya̱ Israer shuar Páprun Yusa Uunt Je̱e̱n pujan wáinkiarmiayi. Túrawar charaatum ajakiar Páprun achikiármiayi. 28 Achikiar untsumainiak “Israer shuartiram iin yaintmaktarum. Ashí nuṉkanam Muisais akupkámuri̱ncha Israer shuarti túrutairi̱ncha ju̱ Yusa Uunt Je̱e̱ncha yajauch chicharea nu achikji. Warí, Kriaku aentsun awayá̱shtinia nuna awayá̱ nuja̱i̱ yamái ju̱ Je̱a̱ncha yajauch awajtúrmaji” tiármiayi.

29 Iis, nuik Ipisiunmaya̱ Trúpimiu Pápruja̱i̱ péprunam wekaan wáinkiaruyi. Wáinkiaru ásar Yusa Uunt Je̱e̱n waya̱yi, tu enentáimsar tiármiayi. 30 Tuíniakui aents ashí mash charaatum ajakiar tseke táarmiayi. Túrawar Páprun achikiar japirkutak Yusa Uunt Je̱e̱ya̱ jí̱i̱kiarmiayi. Túrawar wáitincha nú chichamaik epentrarmiayi. 31 Tura maatai tusar matsamtuiniai̱ suntara uuntri̱ Jerusaréṉnumia̱ aents ashí charaatum ajainian antukmiayi. 32 Nu uunt nuyá̱ ni suntari̱n tura suntara úuntri̱ncha irur aents pujuarmia nui̱ tseke weriarmiayi. Aentssha suntaran tura kapitiánin wáinkiar Páprun asutíniayat iniaisarmiayi. 33 Kapitiánkia Páprun jearí achikmiayi. Tura jimiará jiruja̱i̱ jiṉkiamiayi. Nuya̱sha aniasmiayi “¿Nisha yait? ¿Warinia túrait?” tímiayi. 34 Túrasha aentssha untsurí chichaman untsumiarmiayi. Túmainiakui kapitiáncha peṉké nekaachmiayi. Tuma asamtai Páprunka suntar pujamunam júkiarmiayi. 35 Tura suntar pujamunam wáitiniam jeawar Páprun entsakí̱ júkiarmiayi aents imiá kajerainia asamtai. 36 Tura aentssha ukunmaani̱ pataakar mantamnati, tu untsumiarmiayi.

Papru chichastinian seamu

37 Tura Papru suntarnum awayá̱m Páprusha kapitiánin Kriaku chichamja̱i̱ chichaak “Wi ishichik áujsaintjiameash” tímiayi. Tutai kapitián chichaak “Warí, ¿amesha Kriaku chicham chichastin nékamek? tímiayi. 38 Nuiṉkia amesha ¿Ejiptunmaya̱nchukaitiam? ¿Nuik kuatru mir aents maṉkartin tutai atsamunam yaruakchamkam? ¿Kapitiánja̱i̱ meset najanataj tusa túrachmakum?” tímiayi. 39 Tutai Papru chichaak “Núchaitjiai. Antsu wikia Israer áentsuitjiai. Sirisianam Tarsu péprunam akiiniaitjiai. Tura waitneasam ju̱ aents áujsartin tsaṉkatrukta” tímiayi. 40 Tura kapitián ayu, tutai Papru watai̱nium wajas mitia pujustarum tusa uwejé̱n takuimiayi. Tura aents itiatkarmatai Israer chichamja̱i̱ chichasmiayi.