Túramuri̱
Mártanam túrunamu
28 Tura ashí iwiaakuk jíintrar nu nuṉka Marta náartin nekaamiaji. 2 Tura nui̱ matsamin armia nu shiir awajtámsarmiaji. Tuma asamtai iisha tsetsema asakrin tura yumisha yútakui uunt jinia ikiapárarmiayi. Tura “anamaitiarum” turammaji. 3 Pápruka jinia kukarun ikiaanak jinium pataamiayi. Túman napi tsuéran ashamak jiinkí̱ Papru uwejé̱n nemaramiayi. 4 Tura nú nuṉkanmaya̱ aents Papru uwejé̱n napi nemaran wáinkiar “Ju̱ áishmaṉsha shuaran mái̱chuashit. Nayantsanmaya̱ uwempraitiataṉ ni yusri̱ iwiaaku átinian suritiawai” tiármiayi. 5 Páprusha ni uwejé̱n pe̱ar napin jinium awaṉmiayi. Tura peṉkesha najawe̱achmiayi. 6 Tura nisha earchatpiash tusar ii pujuarmiayi. “Túmatskesha jaka inianchatpiash” tiármiayi. Túrasha tí nukap pujussha peṉké najawe̱achmiayi. Túrunamtai nuiṉkia nusháa enentáimprar “Pápruka yúschashit” tiármiayi.
7 Nú nuṉkanam aentsu peṉkeri̱ ámiayi ni naari̱ Pupriu. Nú Pupriu ni je̱e̱n iin itiaarmamiaji. Tura menaintiú tsawant yurumkancha suramsarmiaji. 8 Tura nui̱ pujarin Pupriu aparí̱ tsue̱r numpá ijiarki̱ jáamiayi.Túmakui̱ Papru werí iyumiayi. Tura Yusan áujtus amik uwejé̱n nin awantkamiayi. Túram péṉker ajasmiayi. 9 Nu túramun nekaawar nú nuṉkanmaya̱ aents jaa armia nu tariar nisha péṉker ajasármiayi. 10 Túram iincha ti shiir enentáimturmasar núkap ajampramsamiaji. Túram ukunam ii wétin jeamtai ashí ii atsumamun suramsarmiaji.
Rúmanam jeawarma
11 Ii wétsuk nú nuṉkanam menaintiú nantu pujusmiaji. Tura nuyá̱ chíkich kanunam eṉkempramiaji. Nu uunt kanusha Arejántrianmaya̱ yaunchu tau menaintiú nantu yumi yútakui nui̱ pujumiayi. Nú kanu nuji̱i̱n numi yus najankamu jímiar ekemiarmiayi, ni náari̱ṉkia Kástur tura Púruks. 12 Iisha nui̱ eṉkemprar weri Serakúsa péprunam jeamiaji. Nui̱ menaintiú tsawant pujusármiaji. 13 Tura jíinkir nuya̱ṉka nayants ayamach weri Ríjiunam jeamiaji. Tura nui̱ kanarmiaji. Tura kashin nuṉkaani̱a̱ nase suut umpuuni̱ támiayi. Tuma asamtai nú kashinkia Putiuri péprunam jeamiaji. 14 Nui̱ jeawakrin Yus shuar pujuarmia nu ni je̱e̱n juramkimiaji. Tuma asamtai nui̱ṉ chikichik tumiṉ pujusmiaji. Tura nuya̱ṉka Rúmanmaani̱ wémiaji. 15 Tura Rúmanmaya̱ Yus shuar ii tátinian neka ásar jintiá iṉkiunmaktai tusar winiarmiayi. Chíkichkia Apiu pepru támunam táarmiayi tura chíkichkia, Menaintiú Je̱a̱ tutainiam táarmiayi. Nuna káunkan wainiak Papru shiir enentáimias Yusan yumiṉsamiayi.
16 Tura ii Rúmanam jeawakrin suntara uuntri̱ Juriu shuaran achirar yarumman Rúmanmaya̱ uuntan ejetimiayi. Túrasha Pápruka je̱a̱ ikiamas niisháa pujusti tiármiayi. Tura Páprun íisat tusa chikichík suntarnak ni je̱e̱n apujtusarmiayi.
Papru Rúmanam Yus Chichaman étserma
17 Nuyá̱ menaintiú tsawant naṉkaamasmatai Pápruka Rúmanmaya̱ Israer shuara peṉkeri̱n untsuk ikiaanak “Yatsurtiram antuktarum. Wisha Israer shuaran yajauchin peṉké túrachmiajai. Tura ii uuntri̱ akupkarmia nunasha yajauch chicharkachmiajai. Tuma ai̱ṉ Jerusaréṉnum winia achirkar Rúmanmaya̱ aentsnum surutkarmiayi. 18 Tura nu aentssha winia anintsar, akupkatai turutiarmiayi, wisha peṉké yajauchin mantamnamnia tímianu túrachu asamtai. 19 Túrasha Israer shuarka ‘Atsá, akupkairap’ turutiarmiayi. Nu tuma asamtai ‘antsu akupin Sésar nekarati’ tímiajai. Wikia wí shuara tunaari̱n ii nuṉké̱ úuntri̱n ujaktinian táchaitjiai. 20 Tuma asamtai yatsurtirmin, atumín chichastaj tusan untsukjarme. Yusa anaikiamuri̱ Israer shuarti nákajnia nu táwiti wi tu étserkui ju̱i̱ achikiar jiṉkiamu pujajai” tímiayi Papru.
21 Tutai nisha tiármiayi “Iisha Jutanmaya̱ aentsti ame yajauch túramu papí peṉké wáinkiachuitji. Tura ii shuar nuyá̱ táarainia nusha ‘au yajauch túraiti’ tu ujatmákcharmaji. 22 Túrasha ashí nuṉkanam yamaram chichaman jintinian yajauch chicharainiawai tama antukji. Tuma asamtai amesha nu warintia enentáimtam nekaatai tusar wakeraji” tiármiayi.
23 Nú tsawantai̱ iruntrami tiarmia nú tsawant jeamtai ti untsurí aents Papru pujamunam iruntrarmiayi. Papru jintintiáiniak Muisais yaunchu aar akupkámia nuja̱i̱ tura chíkich Yúsnan etserniu áarmari̱ji̱a̱i̱sha Jesus nekas Yusa Anaikiamuri̱nti tusa paant jintintiáwarmiayi. Nuna tura káshik naṉkama Yus akupeamunam pachinkiatniun étse étserkua kí̱arai̱ iniaisámiayi. 24 Tura Papru táman antukarmia nu chíkichkia nekasaiti tusar umikiarmiayi. Tura antsu chíkichkia nekaschaiti tusar umikcharmiayi. 25 Chikichkí enentaiki enentáimsatin atsá asamtai jiinkí̱ wéartasa pujuarmiayi. Túmainiakui Papru chichaak “Nékaseṉ Yusa Wakaní̱ yaunchu Yúsnan etserin Isayas áarmari̱ji̱a̱i̱ ii úuntri̱n chicharuk ju̱na tímiayi
26 ‘Ame weme au aents ju̱ titiá
“Ántutka ántakrumsha nekaashtatrume,
Iitkia iyakrumsha wáinkiashtatrume.
27 Warí, au shuara enentái̱ katsua̱rai.
Kuishi̱ji̱a̱i̱ ántaksha ántichua núnin áiniawai.
Ji̱sha epetkamua ánin áiniawai.
Iyaksha wáinki̱a̱i̱ṉ tusa ántaksha antuka̱i̱ṉ tusa
enentáimkiusha nekaawa̱i̱ṉ tusa Winí̱ uwempra̱i̱ṉ tusa
tura Winí̱ tsuámara̱i̱ṉ tusa túrunayi” titiá’ tímiayi.*
28 Tuma asamtai nekaatarum. Yamaikia Yusai̱ uwempratin ana nuna Israer shuarcha susamuiti. Tura niṉkia nekas umikiartatui” tímiayi. 29 Tura Papru nuna ti iniaisamtai Israer shuar nuamtak núkap chicharnaiyasua wéarmiayi.
30 Tura Pápruka nui̱ṉ je̱a̱ ikiamsamunam jimiará uwí pujusmiayi. Tura ashí aents nin iyutaj tusa wéarmia nuna ni je̱e̱n itiaamiayi. 31 Tuma asamtai Papru arantutsuk urukuk Yus akupeamunam ati Uunt Jesukrístu túramuri̱ncha ashí etserkamiayi. Nútiksaṉ etserkatniuncha Páprun peṉké suritkiacharmiayi.