Túramuri̱
Ananías nuwe̱ja̱i̱ wáitruamu
5 Tura chíkich áishmaṉ ni naari̱ Ananías ni nuwé̱ Sapiraja̱i̱ ni nuṉke̱n surukarmiayi. 2 Nisha nuṉkan suruk kuítian akanák jukí̱ Jesusa akatrámuri̱n werí takamtsukea nútikias susamiayi. Ni nuwe̱sha Sapira nuna túran nekaamiayi. 3 Túramtai Pítiur chichaak “Ananíasa ¿urukamtai iwianchi uuntri̱ enentáimin eṉkemturmamtai Yusa Wakaní̱n anaṉkataj tusam nuṉka surukam kuit achikiumna nu akankám ikiurmásum? 4 Enta, nuiṉkia nuṉka áminiuchukait. Surukumna nu kuitcha áminiuchukait. Nusha, ¿urukataj tusamea tu enentáimpram? Amesha aya aentsnum waitruachume. Antsu Yusai̱ya̱sha waitruame” tímiayi Pítiur. 5 Tutai Ananías nuna antuk nú chichamaik jakamiayi. Tura ashí shuar nuna antuk nekaawar ti ashamkarmiayi. 6 Nú turunamtai áishmaṉ tariar Ananías jakaan penuararmiayi. Túrawar iwiarsatai tusar júkiarmiayi.
7 Tura Ananíasa nuwe̱ arur menaintiú ura naṉkaamasai̱ támiayi. Túrasha ni aishri̱ jakaanka nekaachmiayi. 8 Támatai Pítiur nuwa̱n chichaak “Turuttia. Átum nuṉka surukurmena nui̱ ¿kuit itiarumna núnikik surukuram?” Tutai nuwa̱ “Ee, núnik surukji.” 9 Tutai Pítiur chichaak “¿Urukamtai atumsha Uunt Yusa Wakaní̱ nekapkamsatai tusarum imiá enentáimprarum? Pai, iisiá. Ame áishrumin iwiarsatai tusar júkiarainia nu wininiawai. Tura yamaikia amincha juramkiartatui” tímiayi. 10 Tutai nu chichamaik nisha imia Pítiur wajamunam jaka iniaantmiayi. Áishmaṉ waya̱j tukamá jaka tepan wáinkiarmiayi. Túramtai júkiar ni áishri̱ni̱ṉ ayamach iwiarsarmiayi. 11 Tura ashí Yus shuar tura aentssha nuna antukarmia nu ti ashamkarmiayi.
Yusa kakarmari̱ji̱a̱i̱ akatrámu túramu
12 5:12-14 Tura ashí Yus shuar Yusa Uunt Je̱e̱ á̱a̱ri̱n irunin ármiayi. Nu á̱a̱ri̱sha Saramúṉna tu anaikiamuiti. Tura chíkichmamtinkia nui̱m iruntratniun ashamiarmiayi. Túmainiayataṉ tí peṉker áiniawai tu wéarmiayi. Tura Yus shuar Yusa kakarmari̱n iniakmasarmiayi. Tura asamtai imiá untsurí aents Nin enentáimtusar Yus shuar ajasármiayi. 15 Tura chíkich aents ni shuari̱ jainia nuna jintiá amamtikiarmiayi. Peakja̱i̱ júkiar tampunmasha eṉkeawar júkiar jintiá ayamach áepsarmiayi. Pítiur naṉkaamak ni mikintrari̱ṉsha naṉkaatamkinti tusar nu shuar túrawarmiayi. 16 Núnisaṉ arantia̱ shuarsha ti untsurí ni shuari̱ jáinian tura iwianchrukuncha nui̱ Jerusaréṉnum itiarmiayi. Tura ashí nui̱ táaruka tsuámararmiayi.
17 Yúsnan pujurniu uuntri̱ tura Satuséu aentssha niji̱a̱i̱ pujuarmia nu suir íiniak 18 Jesusa akatrámuri̱n achikiar eṉkeawarmiayi. 19 Túrasha kashi Uunt Yusa suntari̱ nayaimpinmaya̱ tara sepú wáitiri̱n uraimiayi. Tura Jesusa akatrámuri̱n a̱a̱ jí̱i̱kiarmiayi. 20 Tura chichaak “Wetarum. Tura Yusa Uunt Je̱e̱n wajasrum Yusja̱i̱ tuke iwiaaku átinia nu etserkatarum” tímiayi.
21 Nuna antukar kashin tsawa̱r káshik Yusa Uunt Je̱e̱n waya̱war jintintiáwarmiayi. Nu túmainiai̱ Yúsnan pujurniu uuntri̱ tura niji̱a̱i̱ pujuarmia nusha iruntrarmiayi. Tura Israer shuara uuntri̱ naamka armia nuna iruntrami tusa untsukarmiayi. Ashí iruntrar akatar Jesusa akatrámuri̱ sepunmaya̱ itiatárum tusar akupkarmiayi.
22 Tura suntarsha sepunam jeariar Jesusa akatrámuri̱n wáinkiacharmiayi. Atsawai tukam táarmiayi. 23 Taar chichainiak “Sepú waiti asakamua tímianisaṉ aa wainkiaji. Tura sepú wáinniuka wáiti̱nkia ii wajainia wainkiaji. Tura waiti urair waya̱ji tukamar atsá wainkiaji” tiármiayi. 24 Yúsnan pujurniu uuntri̱ tura Yusa Uunt Je̱e̱n wainniu úuntri̱sha nu chichaman antukar “Tsej ausha ¿urutáik nunasha iniaisarat?” tiármiayi. 25 Nu chichamaik áishmaṉ taa chichaak “Áishmaṉ átum sepunam eṉkeamarmena nu Yusa Uunt Je̱e̱n wajasar aentsun jintintiuk pujuiniawai” tímiayi.
26 Túrunamtai Yusa Uunt Je̱e̱n wainniu uuntri̱ ni suntari̱ji̱a̱i̱ wéar achik itiarmiayi. Túrasha peṉké aents kayaja̱i̱ tukurmara̱i̱j tusar yajauch awajtsuk itiarmiayi. 27 Tura achik itiaar Israer shuar naamka pujamunam naka awajsarmiayi. 28 Tura Yúsnan pujurniu uuntri̱ chichaak “Iisha atumín chicháa chicharu awajsar Jesusa naari̱ pachisrum etserkairap tusar akupkachmakjarum. Túrasha ¿antukurmek? Atsá. Mash Jerusaréṉnum átum etserkamu pampaṉkai. Iis, átum Jesusan máwarai iin tátsurmek. Nusha iin makuutai tusarum tárume” tiármiayi. 29 Tutai Pítiur Jesusa chíkich akatrámuri̱ji̱a̱i̱ chichainiak “Iikia áentsja̱i̱ṉkia iniaṉkasar Yus emka umirkatniuitji. 30 Jesus atumek krúsnum mámurmena nuna ii iwiaaku Yusri̱ Nin iniantkímiayi. 31 Yus ni kakarmari̱ji̱a̱i̱ Nin naṉkamantu awajsámiayi. Tura nekas Akupniuiti tusa ni untsuurí̱ni̱ apujsamiayi. Tura aentsun Uwemtikniuiti. Israer shuar enentái yapaji̱áwar tunaarí̱nia̱ uwemprarat tusa Yus túraiti. 32 Nu tuma asamtai iisha nu nekaar étsereaji. Tura Yusa Wakaní̱sha nuna étsereawai. Túrasha aya Yusa umirkarua nunak ni Wakaní̱n súsaruiti” tiármiayi.
33 Tutai nuna antukar ti kajerkarmiayi. Túrawar maatai tusar wakeriarmiayi. 34 Tura nui̱ Israer shuara uuntri̱ pujumiayi ni naari̱ Kamarír. Nisha Pariséunam páchitkiauyayi. Tura akupeamun jintinniuri̱yayi. Túmakui̱ ashí aents nin shiir enentáimtin ármiayi. Tura nisha wajaki̱ chichaak “Ju̱ áishmaṉ a̱a̱ ishichik wajasarti” tímiayi. 35 Nuya̱sha irunar matsamármia nuna chicharuk “Israer shuartiram, ju̱ áishmaṉ tú túratai tu enentáimsarumna nu aneartarum. 36 Enentáimsatarum. Nuik áishmaṉ Tiútas wantinkiachmakia. Nisha úuntaitjiai takui̱ kuatru siantu shuar nemarkarmiayi. Tura ukunam nin máwarmatai ni némarkamuri̱sha pisarármiayi. Túrunawar nuní̱ amukámiayi. 37 Ukunmasha iruntrar nekapmartin tsawantincha Kariréanmaya̱ Jútas wantinkiachmaka. Tura nincha nútiksaṉ ti untsurí nemarkarmiayi. Túman máwarmiayi. Nu túrunamtai nútiksaṉ ni némarkamuri̱sha pisararmiayi. 38 Iis, tuma asamtai nu áishmaṉ a̱a̱ wajainia nu iniaisatarum. Auka pachisairap. Au túmainia nu aya aentsnaketkuiṉkia amuukattawai. 39 Tura antsu Yúsnaitkiuiṉkia atumsha amuktai tukamarum tujintkiattarme. Aneartarum. Iniaiyachkurmeka nu tumá pujusrum Yusja̱i̱ mánikchatarmeash” tímiayi Kamarír.
40 Tú tutai tímianak umikiarmiayi. Túrasha Jesusa akatrámuri̱n untsukar asutiáwarmiayi. Tura chicharuk “Jesusa naari̱ pachisrum peṉké ishichkisha etserkairap” tiármiayi. Tú tiar akupkarmiayi. 41 Jesusa akatrámuri̱sha Israer shuara uuntri̱ pujamunmaya̱ jíinkiarmiayi. Tura wáitsamniaitrume tusa Yuska Jesusa naari̱ pachia asakrin ii natsantin wáitsatniun tsaṉkatramkaitji tusar ti shiir enentáimsar wéarmiayi. 42 Tura Jesukrístunun áujmatsatniun peṉké iniaisacharmiayi. Antsu tuke tsawant Yusa Uunt Je̱e̱ncha tura chíkich je̱a̱nmasha páchitsuk etseriarmiayi.