Rúmanam
Papru Rúmanmaya̱ Yus shuaran áatramu
1 Wi Papru Jesukrístu takarniuitjiai. Núnisaṉ Yus achirak ni uwempratin chichame̱n etserkat tusa akatar akuptúkmiayi. 2 Nu uwempratin chichaman Yus yaunchu “akupkáttajai” tímiayi. Núnaka Yúsnan etserin Yus Papinium paant ujakármiayi. 3 Nu Chichamnum Yus ni Uchirí̱n áujmatui. Aya̱shi̱ji̱a̱i̱ṉkia Tawit we̱a̱num akiiniamiayi. 4 Tura ni ti shiir wakaní̱ji̱a̱i̱ṉkia Yusa Uchirí̱nti. Tura ti kakarmaiti. Jakamunmaya̱ nantakmiaja̱i̱ nekas Yusa Uchirí̱a nu, paant nekanamiayi. Nisha ii Uuntri̱ Jesukrístuiti. 5 Ni túramuja̱i̱ Yus shiir enentáimturuk nu uwempratin chichaman etserkat tusa akuptúkmiayi. Núnisaṉ ashí nuṉkanmaya̱ shuar nu chichaman umirkar Jesusa náari̱n shiir awajsarat tusa akuptúkmiayi. 6 Atumsha nuyá̱ shuaraitrume. Tura Jesukrístunu ajasarat tusa Yus achirmákuitrume.
7 Ashí Yus aneamutirmincha Rúmanam matsatrum nuna ju̱ papin áateajrume. Yus tí peṉker awajtámsatniun wakerutmarme. Ii Aparí̱ Yussha ii Uuntri̱ Jesukrístusha waitnentramainia ásar imiatkinchanum ti shiir pujustinian yaintmakarti.
Papru Ruma irautniun wakeramu
8 Emkasha, átum Yus nekas enentáimtamun ashí nuṉkanam áujmatenan nekaan Jesukrístun pachisan Yusan ti shiir yumiṉsajai. 9 Tuke enentái̱rja̱i̱ Yusa Uchirí̱n ashí shuarnum etsertajai. Túrakui wi atumín tuke áujtamun Yus nékarui. 10 Ashí tsawant ni wakerutakuiṉkia íitjiarum tusan Yusan seajai. 11 Nekas íitniun wakerajrume. Nui̱ jean wakanmin yáiṉkian Yusja̱i̱ kanakchamin ajasúk tusan wakerajrume. 12 Kame atumsha tura wisha Yus nekas enentáimtuinia asar mai̱ ikiakánai ajatai tusan wakerajai.
13 Yatsuru, tuke íitjiarum tusan wakerimjiarme. Túrasha iyatsjarme. Kame Yus Chichaman ujaakun chíkich shuarnuma áintsaṉ atumíincha Yus kakaram takasman wáinkiatniun wakerajai. 14 Wikia Yus akuptúku asamtai ashí shuaran ujakártiniaitjiai. Unuimiáruncha tura unuimiárchancha, ti nékainia nunasha tura nékachuncha, métekrak ujakártiniaitjiai. 15 Tuma asan atumniasha Rúmanam pujarmena nunasha uwempratin chichaman ujaitjiarum tusan pujajai.
Uwempratin chicham kakarmaiti
16 Nu uwempratin chicham Yusa kakarmari̱ji̱a̱i̱ ti kakaram asa ashí shuaran Krístun nekas enentáimtuinia nuna uwemtikramniaiti. Tuma asamtai natsantatsjai. Nekas Israer shuarnasha tura chíkich shuarnasha núnisaṉ uwemtikramniaiti. 17 Nu chichamnum Yus enentáimsamia nu páantaiti. Ju̱i̱ti, áyatik Yusan nekas enentáimtuiniakui Yuska “péṉkeraitme” tíminiaiti. Yus Papiniumsha núnisaṉ tawai “Yusan nekas enentáimta nuna Yus ‘péṉkeraitme’ tutai tuke Yusja̱i̱ shiir wekasattawai.”*
Aentsu tunaarí̱
18 Shuar nekas chichaman nakitrar yajauchin túrataj tusar surimiainiawai. Túrawar tuke tunaarintin áiniawai. Nu shuaran Yus ti kajerkar ti asutiátniun nayaimpinmaya̱ paant awajsaiti. 19 Tura nu shuarka ashí Yusna nekaamnia nuna Yus paant awajsa asamtai péṉker nékainiawai. 20 Kame yámankamtaikniumia̱ Yus wáinchataitiat ni najanamuri̱ji̱a̱i̱ ju̱ka paant nekaamniaiti. Nekas Yus asa tuke kakarmaiti. Nusha ti paant asamtai nu shuar tsaṉkurnarchartatui. 21 Yusan nékainiayat shiir awajsacharmiayi tura yumiṉsacharmiayi. Tuma ásar aya antra nunak enentáimtuiniak ni enentái̱ tunaaja̱i̱ piakai. 22 Tura tí nekajai tuíniayat enentáimcha núnin ajasárai. 23 Túmainiak jákachmin Yus imiá shiira nuna iniaisar shuar jakamnia nakumkamun shiir awajénawai. Tura nu arant nanamtinniasha napincha kuntinniasha yajasmancha nakumkar nuna shiir awajénawai.
24 Nu asamtai imiá yajauch enentáimiainiakui “ánik asati” tímiayi Yus. Túramtai ti natsanmainian túrunainiawai. 25 Yusna imiá nekasa nuna nakitrar antsu wait chichaman anturkar nuna túrin áiniawai. Yusak tuke shiir awajsatniun iniaisar antsu ni najanamun tikishmátainiak shiir awajénawai. “Antsu tuke Yusak shiir awajnásti” tajai.
26 Nuna túrin ásarmatai Yus natsanmainia nuna wakeruktinian tsaṉkatkarmiayi. Túramtai nuwa̱sha áishmaṉja̱i̱ tsaniṉtinian nakitrar nuamtak yajauch awajnáiniawai. 27 Núnisaṉ áishmaṉsha nuwa̱ja̱i̱ tsaniṉtinian iniaisar nuamtak áishmaṉkak tsanirmanainiawai. Ti wakerunainiak ti natsanmainia nuna yajauch túrunainiawai. Tura yajauch túruiniak ni aya̱shi̱ wáitsatniunak sumamawarmiayi.
28 Tura tuke Yusan nakitiáinia asamtai ti yajauch enentáimiainiak peṉké túrachminia nuna túrawarti tusa Yus tsaṉkatkarmiayi. 29 Nu shuar ti tunaaja̱i̱ piaku áiniawai. Tsanirmausha aya kuítniak wakerincha tura yajauch awajin áiniawai. Nu arantcha awakmakun kajerniusha maṉkartincha tuke mánaincha anaṉkartincha péṉkercha awajkartincha, tsanumniusha áiniawai. 30 Nu arantcha chikichnasha yajauch áujmatin áiniawai. Yúsnasha nakitiáiniawai. Áimniusha áiniawai. Tura “péṉkeraitjiai” tiar naṉkamantu enentáimtumainiawai. Tunáa túratniun e̱a̱iniawai. Aparí̱ncha nukurí̱ncha umirainiatsui. 31 Enentáincha áiniawai. Tana nuna umichu áiniawai. Aneṉkratcha ásar waitnenkartichu áiniawai. Tsaṉkurcha áiniawai. 32 Yuska “Shuar nuna túrinkia jákatniuiti” táman nékainiayataṉ tuke túrukin wénawai. Tura nu arantcha chíkich yajauch túramtai ti shiir wararenawai.