Rúmanam
3 Núnis ai̱sha Israer shuar ainia nu ¿warí péṉkernak takakainia? Tura tsupirnaktincha ¿wariniak yayá̱? 2 Tí peṉkeraiti. Warí, émkaka, Yus ni chichame̱n Israer shuaran súsacharmakia. 3 Kame chíkich chíkich umichu áiniakui Yus tsaṉkatkamia nuna nú shuaran súsachmataiṉkia nuikia “Yus umichuiti” ¿títinkiait? 4 Péṉkea. Antsu Yuska nekas túratniua nuja̱i̱ métek ashí túriniaiti. Shuar umichu áiniakuisha ni támari̱n mash umiktatui. Ni tamaja̱i̱ shuaran wáitrin awajeakka nusha péṉkeraiti. Núnisaṉ atí. Yus Papisha métek tawai
“Támena nu ‘imiá nekasaiti’ tiártatui
tura súmamtikramataj tuíniakuisha nupetmaktatme” tawai.*
5 Nu arantcha “Wi tunaan túramuja̱i̱ Yus imiá péṉkera nuna paant awajeakka ¿urukamtai winia asutiua? ¿Nuka péṉkerkait?” tíchatapash. (Kame aents chichainia núnisnak tajai.) 6 Warí, Yus péṉkerchaitkiuṉka ¿itiurak ashí shuara tunaari̱n sumamtikiawarat? Kame imiá péṉkeraiti.
7 Núnisaṉ “Wi umirkachmaja̱i̱ Yus tuke umiiniana nuna paant awajeaknaka nuikia nuja̱i̱ iin shiir awajsámtai ¿urukamtai ‘tunaitme’ túruta?” tíchatapash. 8 Warí “tunáa túramuja̱i̱ Yusan péṉker awajeajai” tú nekas enentáimpramniaitkiuiṉkia shuar nui̱kia “Wats, ashí péṉker ati tusar tunáa túratai” tímin ainti. Kame chíkich shuar iin kajertamainiak “nuna jintintiáiniawai” túramji. Nu shuar sumamawartin áiniawai.
Ashí shuarti tunáa túraitji
9 Nuikia Israer shuartikia chikichja̱i̱ naṉkaamas ¿péṉkerkaitiaji? Peṉkesha. Warí, Israer shuartisha Israer shuarchasha ashí métekrak tunaanum eṉkempraruitji. Núnaka jú̱ áarmaja̱i̱ paant awajsaitjiai. 10 Yus Papisha núnisaṉ tawai
“Péṉkeran túrin chikichkiksha peṉké atsawai.
11 Yúsnan nekaatniun nakitiáiniawai.
Yusnasha e̱a̱iniatsui.
12 Yusai̱ya̱ kanakiar meṉkakatniunam wénawai.
Chikichkisha péṉkeran túrin peṉké atsawai.*
13 Ashí yajauch chichainiak iwiarsamu yama uraimiua núnisaṉ áiniawai.
Ni chichame̱ja̱i̱ tuke anaṉkartin áiniawai.
Chichame̱ napia áintsaṉ najamin áiniawai.*
14 Chichame̱ aya yájauchik asa yapá áiniawai.*
15 Maṉkartuatniun aya wáurtin áiniawai.*
16 Aya ti itiurchat ti yajauch awajin áiniawai.
17 Shiir pujustinian nékainiatsui.*
18 Ishichkisha Yusan ashamenatsui.”*
19 Yaunchu akupkámun umirkatin ainia nú shuar aya tákamtak umirkatin áiniawai. Tuma asamtai ashí shuar umirkachu ásarmatai Yus nuja̱i̱ súmamtikiawartatui. Túrakui nisha pachischamin áiniawai. 20 Akupkámuka aya ii tunaari̱n paant awajtúrmaji. Tuma asamtai akupkámu péṉker umirkatniuja̱i̱ Yus “péṉkeraitme” turamchamniaitji.
Aya Yus nekas enentáimtusar uwempramniaitji
21 Yus Chicham yaunchu áarmanum itiura Yus iin “péṉkeraitme” turamminiaitiaj nuna paant tawai. Kame akupkámuja̱i̱nchuiti. 22 Antsu iisha ashí shuarsha núnisaraṉ aya Jesukrístu shiir enentáimtakrin Yus “péṉkeraitme” túramniaitji. 23 Túrasha ashí shuarti tunáa túraitji. Tuma asar Yusa shíirmari̱ya̱ tímianu ajastin peṉké jeatsji. 24 Tuma ai̱ṉ Yuska iin Jesukrístuja̱i̱ uwemtikramar waitnentrampra asa ii akikmakchamuja̱i̱ “tunaarincha awajsámuitme” túramji. 25 Tura Krístun akupkámiayi ni jakamuja̱i̱ ashí tunaan asakártinian. Túramtai shuar Niin nekas enentáimtuiniakui Yus tsaṉkuramniaiti. Yaunchu tunáa túramun katsunteak enentáimtuschamiayi. Yamái tsaṉkuramnia nuna yaunchu nekáa, nuna turamniuyayi. 26 Tura yamaiya̱ tunaancha tsaṉkureak ashí shuar Jesus táman nékaskete tú enentáimtuinia nu shuaran Yus “tunaarincha awajsaitme” tíminiaiti. Kristu jakamuja̱i̱ nuka paant ajasái.
27 Núja̱i̱ṉkia ii péṉker ajasjinia nu “winia kakarmarja̱i̱ túrunajai” tíchamnia asar ¿naṉkamantu enentáimtumarminkiaitiaji? Peṉkesha. Warí, akupkámu umitsuk aya Kristu nekas enentáimtakrin Yus “péṉkeraitme” túramji. 28 Nuja̱i̱ páantaiti. Akupkámu umirtsuk aya Jesukrístu shiir enentáimtakrin tunaarincha awajsamu asakrin Yus “péṉkeraitme” túramji.
29 Warí, Yuska Israer shuarnasha tura núnisaṉ Israer shuarchancha mai̱ ni Yúsri̱nchukait. 30 Kame aya chikichik Yúschakait. Tura tsupirnakuncha tsupirnakchancha mái̱ metek aya Jesukrístun nekas enentáimtuiniakui “péṉkeraitme” tíminiaiti. 31 Shuar Yusan shiir enentáimtamuja̱i̱ péṉker ajastin áiniakui nuja̱i̱ ¿akupkámu ántar awajsámukait? Atsá. Antsu nuna naṉkaamas umirkatin awajsamuiti.