Rúmanam
Yus Israeran achikma
9 Yamái tájana nu Kristu shuari̱ asan imiá nekasan wáitrutsuk tajai. Winia enentái̱rsha tura Yusa Wakaní̱sha “nekas tawai” turutainiawai. 2 Israer shuaran waitnentakun tuke tí kuntuts enentáimjiai. 3 Wí shuar áiniakui yáiṉminiaitkiunka Krístunmaya̱ kanakin wi nekaska yumiṉnaraintjiai. 4 Israer wea shuar áiniawai. Tura ni uchirí̱ya áinis Yus achikiáruiti. Yusa winchari̱sha niji̱a̱i̱ pujumiayi. Yaunchu Chicham ni we̱a̱trí̱ji̱a̱i̱ iwiaramuncha tura Muisais akupkámuncha susamiayi. Tura Yusa Je̱e̱n Nin shiir awajsatniun jintintiámiayi. Tura ukunam shiir tsaṉkatkattana nunasha ujakmiayi. 5 Ni we̱a̱trí̱n Yusan tí peṉker enentáimtin irunmiayi. Krístusha aents ajas nú shuarnum akiiniamiayi. Krístuka Uunt Yus asa tura ashí akupin asa Niṉki tuke shiir awajnásti. Núnisaṉ atí.
6 Kame Yus ashí Ni timia nuna Israer shuaran súsachmataisha nuja̱i̱ “Yus timia nu uminkiachuiti” tíchamniaiti. Antsu jú̱nis enentáimpratniuiti, ashí Israer wea áiniayatan Yusja̱i̱ íismaka ashí nekas Israer shuar áiniatsui. 7 Núnisaṉ Aprajám wea shuarsha ashí nekas ni shuar áiniatsui. Iis, Yus Aprajáman chicharuk “Aya Isak pampaṉma amé shuarum ártatui”* tímiayi. 8 Nuja̱i̱ páantaiti. Shuar aya Aprajám wea akiinia asa Yus timian wáinkiashtiniaiti. Antsu Yus timiaja̱i̱ métek akiinia nu nekas Aprajám wea shuar áiniak Yus timian wainkiattawai. 9 Kame Yus Aprajáman timia nu ju̱i̱ti “Tsawant jeamtai jeartiatjame tura ame nuwem Sara uchin takustatui” tímiayi.*
10 Nu arantcha ii we̱a̱tri̱ Isaka nuwe̱ Riwikia jímiampramiayi. 11 9:11-13 Nu uchisha akiiniainiatsa̱i̱ṉ péṉkernasha tura yajauchincha túruiniatsa̱i̱ṉ Yus Riwikian tímiayi “Iwia̱i̱ri̱a nu ni patai̱n umirkattawai.”* Ataksha núnisaṉ Yus ni Papiri̱i̱n chichaak “Jakupan aneakun Esaun nakitrámjai”* tímiayi. Núja̱i̱ṉkia páantaiti. Yus wakerak aya ni enentái̱ji̱a̱i̱ṉ shuaran achikminiaiti. Nu shuar túrunamu enentáimtutsuk túramniaiti.
14 Túriniaitkiui “Yus péṉkerchaiti” ¿titiajiash? Atsá. 15 Yus Muisaisan jú̱nis tímiayi “Wi wakerajna nunak waitnentrattajai.”* 16 Tuma asamtai shuar ti wakerakuisha tura kakaram takaakuisha aya nuja̱i̱ Yus waitnentatsui. Antsu aya ní enentái̱ji̱a̱i̱ṉ wakerak waitnentawai. 17 Ataksha Yus Ni Papiri̱n Parauṉkan tawai “Ámiji̱a̱i̱ ashí nuṉkanam winia kakarmar nekanat tusan úunt akupin awajsámjame” tímiayi.* 18 Tuma asamtai Yus Ni wakera nuna waitnentawai. Túrasha Ejiptu akupniúri̱n túramia núnisaṉ Ni wakera nú shuaran enentái̱n kátsuram awajtawai. 19 Tura ame “Núnisaitkiuiṉkia ¿urukamtai shuaran Yus súmamtikia? ¿Kame Ni wakerakuiṉkia yaki titi?” turutchatapash. 20 Warí, aents asam Yusja̱i̱ ¿tunaiminkiaitiam? Nuwa̱ piniṉkian nájankui núweka “¿urukamtai jú̱nincha najatam?” tíminkiait. 21 Nuwa̱ wakerakka nu nuweja̱i̱ amamkuncha tura yukuntnasha nusháa takakmastinian mai̱ najanachminkiait.
22 Wats, Yuska chíkich aentsja̱i̱ ni suir enentáimiari̱n paant awajsatniun wakerak tura núnisaṉ ni tí kakarmari̱n iniaktustaj taku nu shuaran kajertai̱ áyat amukártaj tamanka Yuska tí kajetairi̱n katsuntrachmakia. Yus nuna tí katsunteak wárik amukártinian nakitiakui ¿warí itiurkamniait? 23 Tura Yus núnisaṉ ni winchari̱ tí peṉkera nuna tura tí nukap ana nunasha iniakmastinian wakerak waitnenkarturtinia nuna Ni yaunchu iwiararmai. 24 Tura iincha Israer shuarnumia̱sha Israer shuarchanumia̱sha ni shuari̱ ajasat tusa achirmákmiaji. 25 Núnisaṉ yaunchu Yúsnan etserin Useas Yus Papinium tawai
“Wí shuarchan Wí shuar awajsattajai.
Aneachmancha aneamu awajsattajai.*
26 Tura Yus ‘Wí shuarchaitrume’ timia nú shuaran ‘Nekas iwiaaku Yusa uchirí̱niuitrume’ ukunam títiatui.”*
27 Antsu Isayas Israer shuaran pachis tímiayi “Israer wea ti naṉkaamas untsurí áiniayat peṉké ishichik uwemprartatui. 28 Kame Yus yajauchin akupkataj timia nuna takamtsuk wárik umiktatui.”* 29 Núnisaṉ Isayas ataksha tawai
“Ashí akupeana nú Yus iin waitnentramachkurni̱ṉkia Sutuma péprusha Kumura péprusha takamtsuk amuukarmia núnisaṉ jáka̱a̱ji.”*
Israerka Yusan enentáimtachuk tujintkiamu
30 Wátsek, Israer shuarcha Yus “péṉkera” tumamtinian e̱a̱kcharmai. Túmainiayataṉ Yusan enentáimtuiniak núnaka wáinkiarmai. 31 Antsu Israer shuarka péṉker akupkámun umiktaj táyataṉ tujintiainiak nuja̱i̱ péṉker ajastinian jeacharmai. 32 ¿Urukamtai tujintkiarma? Yusan enentáimtutsuk aya ni péṉker túramuja̱i̱ péṉker ajastinian enentáimtuiniak tujintkiarmiayi. Krístun enentáimtustinian nakitiáiniak shuar kaṉkapen awaṉkemtuktinia núnisaṉ iniararmai. 33 Tura kaya tukumkar iniarchamniakait. Nu asamtai Yus Papinium Krístun pachis tímiayi
“Seun péprunam kayan ikiuajai, tawai Yus. Nu kayanam Israer shuar tukumkar iniarartatui.
Antsu Niin shiir enentáimtuinia nú shuar natsa̱a̱rchartatui” tawai.*