Kurusenam
1 Wi Pápruitjiai. Yus wakerutak Jesukrístunun etserkat tusa akatrá akupkámuitjiai. Wisha ii yachi̱ Timiutéuja̱i̱ 2 ju̱ papí áarar nui̱ Kuruse péprunam Kristu péṉker umirkarum Yusna ajasuitrumna nu akuptaji. Ii Aparí̱ Yussha tura Jesukrístu ii úuntri̱sha atumín waitnentramainia ásar aṉkant tuke shiir pujustinian suramsarti.
Papru Yus shuaran Yusan áujtusma
3 Iisha atumín Yus áujtakur ii Uuntri̱ Jesukrístu Aparí̱ Yus ashí tsawant yúmiṉkiaji. 4 Atumsha Jesukrístu ti shiir enentáimtamusha tura ashí Yus shuar aneamusha antukji. 5 Uwempratin chicham nekasa nu antukrum atumsha nayaimpiniam atumnian Yus ti shiir ikiusman wáinkiatai tusarum nákarme. 6 Nu chicham ashí nuṉkanam pampaakui shuara enentái̱n nerea áinis nusháa ajasár yamaikia péṉker túrin áiniawai. Núnisaṉ atumíincha túrunaiti. Yus ti nekas anenkartiniaiti tu etserkamu ántakrumin nu chicham atumí enentái̱ncha nerekmiayi. 7 Nu chichaman Epapras ujatmákmarme. Nisha iiji̱a̱i̱ métek takasu asamtai ti aneamuiti. Atumniasha Kristu takatrí̱n ti shiir takartámsaiti. 8 Nisha átum Yus shuar asarum mái̱ anenai ajamun ujatmákmaji.
9 Iisha nu antukar Yus ashí tsawant áujtajrume. Yus ni wakeramun ti paant nekaprutmawarat tusar seaji. Ashí Yúsnan ni enentáimtairi̱ji̱a̱i̱ ashí Níniun paant nekaatniun Yus jintintramat tusar seaji. 10 Atumsha Krístunu ainia núnisrum péṉker takarsak tusar seaji. Tura ashí ni wakerana nu umíakrum ashí péṉker ana nu, nerektinia áintsarmek túrattarme. Núnis túrarum Yusna unuimiátki̱ wéakrum Niniu tí peṉker nekaak tusar seaji. 11 Yus ti kakaram asa ikiakátmaruk tusar seaji. Nuja̱i̱ ashí itiurchat ákuisha páchitsuk ti shiir warasrum katsuntrattarme. 12 Yus ni shuari̱n tsáapninia nui̱ ashí péṉkeran susattawai. Tura iincha nui̱ pachinkiatniun tsaṉkatramka asakrin Yus Apa yumiṉsamniaitrume. 13 Yus iwianchin nupetak íwianch akupeana nú kiritniunmaya̱ uwemtikramar ni aneamu Uchirí̱ akupeana nui̱ wearmákmiaji. 14 Ni Uchirí̱ krúsnum jaka ii tunaarí̱n nijiar tsaṉkurtamar uwemtikrampramiaji.
Kristu jakamuja̱i̱ Yusja̱i̱ nawamnaikiamu
15 Íischamnia Yusan Krístuka nakumeawai. Yus ashí najanamu ainia nuna iwia̱i̱yaiti. 16 Niji̱a̱i̱ Yus ashí nayaimpiniam írunna nunasha nuṉká írunna nunasha, ashí wáiniaj nunasha núnisaṉ wáintsuj nunasha mashi najanamiayi. Nu arantcha ashí akupin ju̱ nuṉkanam írunna nusha, nayaimpiniam írunna nusha, iwianchnium írunna nusha, ashí Niji̱a̱i̱ najanamu ásar Nin umirkarat tusa najanamu áiniawai. 17 Ashí najanamua nuna yaunchu Krístuka tuke pujuwiti. Ashí najanamu írunna nuna emestsuk wáinniuiti. 18 Ashí Yus shuar métekrak chikichik aya̱shtinia núnis enentáimkiumka nuna muuke̱ṉka Krístuiti. Tura nu aya̱shí̱n ni iwiaakmari̱ji̱a̱i̱ iwiaaku átinian súsaiti. Nisha ashí jakamunmaya̱ nantakniuja̱i̱ imiá naṉkamantuiti. Núja̱i̱ṉkia ashí enentáimpramnia írunna nunasha akupniuiti. 19 Yus ashí takamtsuk Kristui̱ shiir pujumiayi. 20 Núnisaṉ Yus Kristu krúsnum jakamuja̱i̱ ashí nayaimpinmasha tura ju̱ nuṉkanmasha írunna nuna Niji̱a̱i̱ nawamnaikiar shiir pujusárat tusa wakerukmiayi.
21 1:21-22 Atumsha nuik tunáa túrin asarum atumí enentái̱n Yusa nemasri̱ ámarme. Tuma asarum yajá wekaimiarme. Antsu Kristu, aentsu aya̱shí̱n aya̱shímiak, krúsnum wáitias jakamuja̱i̱ ii tunaarí̱ asakármatai yamaikia Yusja̱i̱ nawamnaikiar shiir pujaji. Nuja̱i̱ Kristu iin péṉker ajasuncha tunaan máatrachmancha tura sumamachuncha Yusai̱ ejetamtatji. 23 Tuma asamtai Jesukrístu shiir enentáimtusrum kakaram ajasrum katsua̱rtiniaitrume. Tura uwempratin chicham antukuitrum nuyá̱ kanakchatniuitrume. Ju̱ uwempratin chichaman ashí nuṉkanam etsernakuiti. Wisha, Papru asan etserkatniun yaimjiai.
Papru ashí Yus shuaran yaiṉma
24 Atumín wáitiaknasha ti shiir waraajai. Kristu ni shuari̱n nekas péṉker awajsat tusa wáitiana nui̱ pachinkia asan waraajai. Ashí Yus shuar Kristu aya̱shí̱ áintsaṉ áiniakui Yus shuaran yáiṉtajtsan aya̱shruja̱i̱ wáitiakun shiir enentáimjiai. 25 Atumín yaiṉkiai tusa Yus akattúr Yus Chichaman takamtsuk ujakai tusa akuptúkmai. Nuna takaakun ashí Yus shuara yáintri̱ntjiai. 26 Yámankamtaikniumia̱ nekaachman Yus yamaikia ni shuari̱n paant awajsaiti. Nu chichamnasha ujakarai tusa winia akattúr akuptúkuiti. 27 Nu chichamsha ju̱i̱ti. Kristu atumí enentái̱n pujak Niji̱a̱i̱ métek ti shíiram awajtámsattawai. Nu imiá shiir chichamnum Israer shuarchasha pachiniainian Yus ashí ni shuari̱ nekaawarat tusa wakerimiayi.
28 Iisha Kristu étsereaji. Túrar ashí enentáimtikrar péṉker nekaawarat tusar jintintiáiniaji. Nuja̱i̱ Krístuja̱i̱ tsaniṉkiar ashí péṉker tsakarartatui. 29 Tuma asamtai Kristu ni kakarmari̱n tí surakui nekas kakaram takaajai.