1 Timiutéun
Yus shuarja̱i̱ itiurkatniuit
5 Uuntá nu kakantraip. Antsu nekas ame apa nútiksamek chicharkata. Natsasha nekas ame yátsumea nútiksamek shiir awajsarta. 2 Nuwa̱ úuntchisha nekas ame nukua nútiksamek shiir awajsarta. Nuwa̱ natsasha nekas ame umai̱mia nútiksam shiir enentáimji̱a̱i̱ péṉker awajsarta.
3 Waje̱ nekas atsumin ainia nusha yaiṉkiarta. 4 Tura waje̱ uchirtin tura tiraṉkrinniuitkiuisha, nu shuar waje̱n wáinkiarti. Emka ni shuari̱n péṉker wáinkiatniun unuimiárarti. Ni aparí̱ anemia núnisaṉ awajénak shiir wáinkiarti. Kame núnaka Yus ti shiir enentáimtawai. 5 Nekas waje̱ niṉki pujana nu Yusan enentáimtak tsawai̱sha káshisha iniaitsuk Yusan áujeawai. 6 Antsu aya wárastiniak wakera nuka iwiaakiat jaka áintsaṉkete. 7 Tura waje̱nka ni shuari̱ wáinkiarti. Yus shuaran yajauch chicharnáktin atsutí tusam wi tájamna nu ashí Yus shuar ujakárta. 8 Shuar ni je̱e̱n pujuinia nuna nekaska wáinkiatniuiti. Tura nuyá̱ chíkich shuarnasha yáiṉtiniaiti. Túrachkuṉka Yus tana nuna umíatsui tura Yus shuarcha nuja̱i̱ naṉkaamas yajauchiti.
9 Yusa kuítri̱ji̱a̱i̱ yáiṉtiniaitkiuiṉkia waje̱ sasaintia uwí naṉkaamas takustiniaiti. Tura chikichik áishri̱niak takusu átiniaiti. 10 Ti paant péṉker túrin átiniaiti. Ni uchirí̱n péṉker tsakatmashit, iraran péṉker taatá tíniuashit, nekasmiancha enentáimtumar Yus shuaran yáiniashit, wáitiainia nuna waitnenniuashit tura chikichnasha péṉker túriniaitkiuṉka maak.
11 Tura sasaintia uwí takakchaka chíkich waje̱ja̱i̱ iruraip. Ni aya̱shi̱ wakeramuri̱ Krístui̱ya̱ kanamtikiainiawai tura ataksha nuatnaikiatniun wakeruiniawai. 12 Tura emka enentáimtiarmia nuna iniaisar sumamainiawai. 13 Nu arantcha nakimiainiak ántar irauwear chikicha itiurchatri̱n áujmatsachminia nunasha áujmatin áiniawai. 14 Nu asamtai waje̱ úchipiak ainia nuka niniurtukar uchin takusarti. Tura nuwa̱ nuatkamu takastinia nuna túrawarti. Tura ni túrunamuri̱ji̱a̱i̱ iin kajertamainiaj nú shuar yajauch enentáimturmarcharti. 15 Kame nuik chíkich chíkich waje̱ Krístui̱ya̱ kanakiar iwianchin nemarsaru ásarmatai nuna tajai.
16 Áishmaṉsha nuwa̱sha Yus shuar ainia nu ni shuari̱i̱n waje̱ ákuiṉkia Yusa kuítri̱n seatsuk ni yaiṉtí. Nuja̱i̱ chíkich waje̱n nekas atsumainia nuna Yusa kuitri̱ yáiṉtatui.
17 Yus shuara uuntri̱ Yus shuaran péṉker wáinkiarua nu, nekas shiir enentáimtustin áiniawai. Tura akinkiámniasha áiniawai. Nekaska Yus Chichaman etserkatniuncha tura unuiniartinniasha tuke takaaka imiá shiir enentáimtustinaiti. 18 Yus Papiniumsha núnisaṉ áarmaiti “Jiṉkiaiya saepe̱n pakartaj tusa turu takaak nája̱kui ni nují̱ jiṉkiatáshtiniaiti. Antsu ni wakerak yuatí.”* Tura nu arantcha áarmaiti “Takakmasua nu nekas akinkiatniuiti.”*
19 Chikichik shuarak Yus shuara uuntri̱ tunaari̱n etsertukmataiṉkia anturkaip. Antsu jímiarsha menaintiusha tsanumtsuk métek tuíniakui anturkata. 20 Chíkich shuarsha ni tunaari̱n ikiuktinian nakitiáinia nu, ashí iruntramunam chicharkarta. Chikitcha nuna iisar ashamkarti. 21 Yussha ii Uuntri̱ Jesukrístusha tura nayaimpinmaya̱ suntarsha iimiainiamunam “túrata” tájame. Ashí shuarja̱i̱ niisháa enentáimtutsuk métekrak túrata. 22 Yus shuara uuntri̱ atí tusam wárik anaikiaip. Wárik túramka chikicha tunaarí̱n sumamattame. Ashí tunaanum peṉké pachinkiaip.
23 Wakemja̱i̱ jaa asam aya éntsak úmutsuk karía ishichik pachimsam umarta.
24 Chíkich shuara tunaarí̱ wáitsatin imiá paant áiniawai wáitsatin tsawant jeatsa̱i̱ṉ. Tura chíkich shuara tunaari̱ṉkia paantcha áiniawai antsu ukunam paant nekanawartatui. 25 Núnisaṉ péṉker túramusha ti paant áiniawai. Tura yamái páantchaitiat tuke paantcha áchamniaiti. Páchitsuk nekanattawai.