Jusuí

Jusuí ni úuntri̱n chicharkarma

23 Tura Israer shuar mesetnum matsatainian Uunt Yus aṉkant awajsarmia nuyá̱ núkap tsawant naṉkaamasu ai̱ Jusuisha tí uuntach ajasu asa 2 Israer shuarnumia̱n úuntri̱ncha tura chichamprinniasha chichama iwiarniuncha nuyá̱ suntara úuntri̱ncha ashí untsuk irur chicharuk “Wikia yamaikia weámsájai. 3 Tura atumí nemasri̱ itit awajtámin armia nu nupetkatniun Uunt Yus tí yaintmakmarme tura nú yaintmakmaja̱i̱ ni kakarmari̱ wáinkiaitrume. 4 Tura Yusa wakeramuri̱ji̱a̱i̱ métek ju̱ nuṉkan aṉkant aṉkant atumín wi amasuítjiarme. Tura Jurtan entsa ímianai núnisaṉ etsa̱ akatainmaani̱ uunt nayantsa tímianai ashí nu nuṉkanmaya̱ nupetkaitrumna tura nupetkachuitrumna nunasha amasuítjiarme. 5 Kame Uunt Yus átum íimmianum juákaru ainia núnaka ji̱i̱r akuprattawai. Tura ii Uunt Yusri̱ atumín turammiarumna tímiatrusaṉ nu nuṉkanmaya̱ aents ji̱i̱ki̱ akupratniun yaintmakmatai atumsha nu nuṉka nérentin ajastatrume.

6 Núnisaṉ Muisais úunt akupkámu chichaman aarmia nu patatcha patatsuk tura ementash ementsuk kakaram ajasrum ishichkisha kajinmáttsuk ashí aarma nu tímiatrusrumek umiktarum. 7 Túrakrum chíkich aents atumji̱a̱i̱ matsatainia nuja̱i̱ peṉké pachimnairairap. Tura ni najankamu yusri̱ enentáimtuinia nusha enentáimtusairap. Núnisaṉ ishichkisha peṉké umirkairap. Nuyá̱ nuna naari̱ pachisrum ‘Nekas umiktatjai’ tiirap. Tura peṉké ishichkisha enentáimtusairap. 8 Antsu Uunt Yus nekas umirkamarum tímiatrusrumek umirki̱ wetarum. 9 Kame untsurí nuṉkanmaya̱ uunt pepru kakaram áiniancha Uunt Yus atumíya̱n ji̱i̱ki̱ akupkaiti. Wats, yamaiya̱ ju̱i̱sha yaaksha uwemprachuiti. 10 Ni tiniu asa atumí Uunt Yusri̱ mánitramuk yamaikia atumíya̱ṉka chikichkitiat mir aentsun nupetkamniaiti. 11 Nu asamtai anearum atumí enentái̱ péṉker íimiasrum atumí Uunt Yusri̱ aneatarum. 12 Tura atumsha Yusai̱ya̱ kanakrum nu nuṉkanmaya̱ juákarua nuja̱i̱ pachimnairarum nuya̱ja̱i̱ nuatnaiyakrumka 13 nekas ju̱sha enentáimpratarum. Atumí Uunt Yusri̱ nu nuṉkanmaya̱ aentsun tuke juákarua nuna ji̱i̱ki̱ akupkatniun peṉké yaintmakchattarme. Antsu íksaṉ nu aentsnak atumín itiurchat awajtámkarat tusa tsaṉkampramkattarme. Nuyá̱ numiji̱a̱i̱ asutiá nútikias tura jaṉkiji̱a̱i̱ ji̱ íjiutniua núnisaṉ atumí Uunt Yusri̱ tí peṉker nuṉkan amasuítrumna nui̱ṉkia chikichkiksha juákchattawai.

14 Kame wikia jakattajai. Tuma asamtai nekas enentáimji̱a̱i̱sha wakanmiji̱a̱i̱sha ju̱ nekaatarum tusan wakerajrume. Uunt Yus timiá shíiran tsaṉkatramkamarum núnaka tímiatrusaṉ umikiuiti. Ni timianka chikichkiṉkisha umitskeka iniaisachuiti. 15 Tura atumí Úunt Yusri̱ṉkia chichaakka mash umin asa ti shiir chichartamas matsatmasuitiat íksaṉ yajauchiniam yumiṉkramar péṉker nuṉkanmaya̱ṉka amutmaktatrume. 16 Nuyá̱ atumí Uunt Yusri̱ Israer shuarja̱i̱ chícham najanamu umirtsuk kanakrum najankamu yus tikishmátki̱ wéakrumni̱ṉkia Uunt Yus ti kajertamkattarme. Túrutma ju̱ péṉker nuṉkanmaya̱ṉka tí warik amutmaktatrume” Jusuí tímiayi.