Jusuí
Akan yajauch túramu
7 Akanka Karmi uchirí̱yayi. Tura Karmi aparí̱ṉkia Sapti, ni aparí̱sha Tsera, nuka Jutá weauyayi. Kame Akan yajauchiji̱a̱i̱ yumiṉkramun jukin asamtai Uunt Yus ashí Israer shuaran ti kajerkarmiayi.* 10 Uunt Yus Jusuin chicharuk “¿Warí tsuntsumpramsha pujuram? Wárik wajaktia. 11 Kame Israer shuar Wiji̱a̱i̱ chícham najanamun umitsuk yajauchiji̱a̱i̱ yumiṉkramua nuka mash amuktárum tímiaj nuna waitruawar kasamkar nuyá̱ ú̱kar nérentin ajasáru asar nuja̱i̱ yajauchin túrawarai. 12 Nu tura asarum Israer shuartiram atumí nemasri̱ji̱a̱i̱ mániktin tujintkiarum pisaakrum atumek emestumaktatrume. Tura atumín yajauchiji̱a̱i̱ yumiṉkramua nu amúachkurmiṉkia Wikia atumji̱a̱i̱ṉkia pujuschattajai. 13 Tuma asamtai Israer shuar werim yamaikia imiatkímprachu awajsaram ujakárta Israer shuara Uunt Yusri̱ jú̱nis chichaak ‘Israerá, atumín yajauchiji̱a̱i̱ yumiṉkramua nu awai. Nú asamtai yajauchinmaya̱ kanaachkurmeka atumí nemasri̱ peṉké nupetkashtatrume. Uunt Yus nuna tiniu asamtai kashinkia imiatkímprachu ajastarum’ titiá. 14 Tura kashin ashí wea ju̱i̱ káunkartatui tura Uunt Yus wean achikma nu akankarma weantúkartatui. Tura nuyá̱ chikichik akankámun Uunt Yus achikma nu weantúktatui. Nuikia nu akankámunmaya̱ ní shuari̱ṉ ní shuari̱ṉ ashí weantúkartatui. Nuya̱ncha Uunt Yus achikiua nú shuar weantúktatui. Nuyá̱ nú shuarnumia̱ áishmaṉkak áishmaṉkak weantúkartatui. 15 Tura yajauchiji̱a̱i̱ yumiṉkramun júkiniana nu nekanaṉka Uunt Yus Israer shuarja̱i̱ chícham najanamu umitsuk yajauchin tura asa ashí ní shuari̱ntiuk tura wariri̱ntiuk áesnattawai” tímiayi Uunt Yus.
Akan asutiámu
16 Nuyá̱ Jusuí kashin káshik ashí Israer shuaran nuamtak weanak irurarmiayi. Túramtai Uunt Yus Jutá weanmaya̱n iwiainiakmiayi. 17 Tura Jusuí Jutá weanmaya̱n Tsera shuari̱ya̱nak iwiainiakmiayi. Túram Sapti Tsera shuarai̱ya̱ makunmiayi. 18 Tura Sapti shuar chikichkimias iniakmamki̱ wésar Akan Karmi uchirí̱ makunmiayi. Kame Akanka Jutá weanmaya̱ Tsera tura Tseranmaya̱ Sapti shuarauyayi. 19 Nuyá̱ Jusuí Akanan chicharuk “Uchiru, Israer shuara Uunt Yusri̱ nekas enentáimtusam shiir awajeakum ame itiurkaitiam nu ú̱rtutsuk ujatkata” tímiayi. 20 Nu tutai Akan Jusuin aya̱k “Nekasaiti Israer shuara Uunt Yusri̱n yajauchin túramjai, wi túramaj nuka ju̱i̱ti. 21 Jirikiúnam ashí amuktin timian Papirúnianmaya̱ tarachin tí peṉkeran tura tusiantu kuítniasha núnisnak kuri seṉkuintia kuit jean ti wakerukan jukimjiai. Tura itian winia je̱a̱ru wáamtakri̱n ú̱kmajai nuyá̱ kuítniasha nui̱ṉ ipiuknámjai” tímiayi. 22 Nuiṉkia nuna takui̱ Jusuí Akana nuap je̱e̱n chichama etserniun akupkarmiayi. Tura nui̱ ashí ú̱kmancha nuyá̱ kuit init ikiusmancha wáinkiarmiayi. 23 Nuna júkiar Jusuin tura ashí Israer shuarnumsha itiarmiayi. Túrawar Uunt Yusai̱ naka áepsarmiayi. 24 Nuya̱ṉka Tserá uchirí̱ Akanan achikiar kuítniasha péṉker pushin nuyá̱ kurin tura ni uchirí̱ncha nawantri̱ncha waakarí̱ncha kawairi̱ncha murikrí̱ncha tura ni je̱e̱ncha ashí niniu armia nuwi̱m Akura pakari̱n júkiarmiayi. 25 Tura Jusuí Akanan chicharuk “¿Ju̱sha urukamtaiya iincha makukratam? Yamaikia ju̱ tsawant Uunt Yus ámin mantamattawai” tímiayi. Takui̱ ashí Israer shuar kayan achik tukurar máwarmiayi túrawar ashí níniurtiuk tura wariri̱ntiuk irurar ashí áesawarmiayi. 26 Nuya̱ṉka Akan áesamunam kayá ikianak irutrarmiayi. Kame nu tuma asamtai yamaiya̱ ju̱i̱sha nu kaya irumpramuka ímiatrusaṉ áiniawai. Nuní̱ tura Uunt Yus suir kaje̱ntkamun tsaṉkurmiayi. Tuma asamtai yamaiya̱ ju̱i̱sha nú nuṉka náari̱nkia Akura Pakarí̱ tuíniawai.*