Apukarípsis
Kristu mir uwí jú̱ nuṉkanam akupma
20 Nuyá̱ nayaimpinmaya̱ suntar táarun wainkiamjai. Nusha náṉkatkachu wa̱a̱ yawiri̱n tura jiṉkiatai jirun kampurman takakuyi. 2 Nu suntarsha Ti Kajen Yajasman jiru kampurmaja̱i̱ jiṉkiamai. Nu Yajasma iwianchi uuntri̱ Satanás tutainti. Nisha Yáunchuya̱ napiti. Tura nu iwianchin jiṉkiá mir uwí pujusat tusa 3 náṉkatkachu wá̱a̱nam epenmiai. Tura waiti uraichminian anujtúkmai. Mir uwí naṉkamatsa̱i̱ṉ ashí nuṉkanmaya̱ shuaran anaṉkawara̱i̱ṉ tusa túramai. Antsu mir uwí naṉkaamasmatai ishichik tsawant aṉkant akupnáktiniaiti.
4 20:4-5 Nuyá̱ akupin pujutai̱nium pujuinian wainkiamjai. Tura shuara túramuri̱n íirsarat tusa kakaram sunasarmai. Tura núnisaṉ muuke̱ tsupirka maamu wakaní̱ncha wainkiamjai. Nusha Yusa Chichame̱n etserainiak tura Kristu Chichame̱ncha etserin ásar maamu armai. Nisha Entsaya̱ Yajasmancha ni nakumkamuri̱ncha tikishmátracharu armai. Núnisaṉ náari̱ncha nijia̱i̱niumsha tura uwejnumsha anujmamprakcharu armai. Nu shuar ataksha nantakiar emka nantaktin tsawantnum pachinkiarmai. Túmainiak Krístuja̱i̱ métek mir uwí akupeamun wainkiamjai. Antsu chíkich jákaruka mir uwí naṉkamatsa̱i̱ṉ nantakcharmai. 6 Antsu emka nantaktin tsawantnum pachinkiarua nú shuar tí peṉker áimiak ti shiir warasmin áiniawai. Nu shuarka jimiará jákatniunam pachintsuk Yusna tuke takarin tura núnisaṉ Krístunu tuke takarin ártatui. Tura Krístuja̱i̱ métek mir uwí akupkartatui.
7 Tura mir uwí naṉkaamasmatai iwianchi uuntri̱ epenmianumia̱ urani̱ akupnáktatui. 8 Túram ashí nuṉkanmaya̱ aentsu anaṉkawartaj tusa jiinkittiawai. Kuk nuṉkanmasha tura Makuk nuṉkanmasha ashí pujuinia nuna anaṉkawartatui. Tura mesetan najanataj tusa ni suntari̱n nekapmarchamnia ti untsurí irurtatui. 9 Tura ashí nuṉkan enetak Yus shuar matsamtai̱ncha tura Yus ti aneamu pépruncha mash éṉkekarmai. Túramtai Yus nayaimpinmaya̱ jinia akuptuk mash áesawarmai. 10 Tura iwianchi úuntri̱n nin anaṉkawarmia nu asupriji̱a̱i̱ keá ji antumiaṉ kuamunam aju̱a̱mai. Nú yaunchusha Entsaya̱ Yajasmasha tura Kukaria̱ Yajasmasha peṉké ántar yúsnan etserniua nu, nui̱ aju̱a̱warmai. Nui̱sha tsawai̱sha káshisha iniaṉnatsuk ti wáitsartatui.
Amúamunam sumamtikiatin tsawant
11 Nuyá̱ akupin pujutai̱n úuntan tura tí pújun wainkiamjai. Tura nui̱ pujancha wainkiamjai. Nisha ti kakaram asamtai nuṉkasha nayaimpisha aya meṉkarar tuke atsúarmai. 12 20:12-13 Tura túrunatsa̱i̱ṉ nayantsanam jákarua nusha jíinkiarmai. Núnisaṉ iwiarsamunam jaka pujuinia nusha jíinkiarmai. Tura jákaruncha, naṉkamantu arma nunasha tura peṉké shuar arma nunasha ashí wainkiamjai. Tura Yusai̱ naka wajaarmai. Nuyá̱ ashí shuar túramu aakma papí urantrarmai. Tura nu papinium aarma nuja̱i̱ métek ashí ni túramuri̱ paant nékaneakui súmamtiknawarmai. Tura chíkich papisha tuke iwiaaku pujustin papí urankamai. 14 Nuyá̱ jákatin amuukati tusa ti keá nu ji antumiaṉ kuamunam aju̱a̱mai. Nu ji antumiaṉ kuamunam wétinkia jimiará jákatin tutainti. 15 Tura ashí shuar tuke iwiaaku pujustin papinium ni naari̱ áatrachma asa wainniakchama nusha ti keá nu ji antumiaṉ kuamunam aju̱a̱warmai.