Apukarípsis
Murikkia siati asakamun ja̱a̱rmai
6 Tura siati asakamunmaya̱ emka asakamun wísha iimiai̱ṉ Murik ja̱a̱kmai. Túramtai chikichík taṉku ipiamtaja̱i̱ métek kakantar untsumun antukmajai. “Winitiá” timiai. 2 Takui̱ kawái pújun wainkiamjai. Nui̱ ekemia nu tíshimkiun takakuyi. Awakmakmatai sútai̱sha susamuyi. Tura tuke nupetmaktinian jiinkimiai.*
3 Nuyá̱ Murikkia asakamu jímiaran já̱a̱kmatai taṉku jímiara nu “Winitiá” timiai. 4 Takui̱ chíkich kawái kapa̱a̱kun wainkiamjai. Nui̱ ekemia nuna puyá̱ úuntan susamuyi. Nusha shiir pujuscharat tusa ashí jú̱ nuṉkanmaya̱ shuaran mánaimtikiatniun akupkámuyi.
5 Nuyá̱ Murik asakamu menaintiun já̱a̱kmatai taṉku menaintiua nu “Winitiá” timiai. Takui̱ kawái mukusan wainkiamjai. Nui̱ ekemia nusha kijin nekapmatai̱n takakuyi. 6 Tura kuatru taṉku ajapénia̱ chichaamun antukmajai. “Tsawant takamtsuk takaakmesha apatkuka peṉké ishichik sumakmin átatme. Tura núnisaṉ machasha nijiamchisha amuukacharat tusam péṉker wáinkiata” timiai.
7 Nuyá̱ Murik asakamu kuátrun já̱a̱kmatai taṉku kuatrua nu “Winitiá” timiai. 8 Takui̱ kawái yaṉkun wainkiamjai. Nui̱ ekemia nusha Jákatin náartiniuyi. Tura nuna úkuri̱n Jatai̱ nemarki̱ winimiai. Nusha ashí nuṉkanmaya̱ shuar kuatru akankarmanumia̱ chikichik mátin akupkámu armai. Nisha mesetja̱i̱ tsukaja̱i̱ nuyá̱ suṉkurja̱i̱ tura yajasmaja̱i̱ nu aentsun máwarmai.
9 Nuyá̱ Murik asakamu séṉkun já̱a̱kmatai Yus sutai kuṉkuin áestutai̱ wakenmaani̱ íismajai. Túran Yus Chichaman etserainiakui máwarma wakaní̱n wainkiamjai. 10 Nusha kakantar untsumainiak tiarmai “Uuntá, tí peṉker asam támena nu umíatsmek. ¿Urutíak nuṉká pujuinia nú shuar ii mantamnamunam yapajmiátruktam?” tiarmai. 11 Tuíniakui pushí pújun súsar tiarmai “Itiur átum jakamiarum núnisaṉ atumí yachi̱sha tura Krístunun etserainiak urutmá tuke mantamnatin ártiniait nu nákakrum ishichik ayampratarum” tiarmai.
12 Nuya̱sha Murik asakamu sáisan já̱a̱kmatai ti ú̱u̱run wainkiamjai. Tsawái̱ nantusha itiurchat ajasua áintsaṉ mukusa ajasmai. Kashí nantusha numpa áintsaṉ ajasmai. 13 Tura yaasha wampú nere̱ nase umpuim ti maju̱wa áintsaṉ kákekarmai. 14 Nayaimpisha papí pénuimiu júamua áintsaṉ meṉkakamai. Tura naintcha yajá apujnasarmai. Tura nuṉkasha nayantsanam ajapén atentrainia nusha yajá apujnasarmai. 15 Tura jú̱ nuṉkanam akupin ainia nusha nainnium wéar kayá wá̱a̱nam ú̱mkarmai. Níji̱a̱i̱sha ashí shuar, uuntcha, kuítrinniusha, suntara kapitiántri̱sha, ashí kakaram ainia nusha tura takarniusha aṉkant ainia nuja̱i̱ nainnium wéarmai. 16 6:16-17 Túrawar náintniasha kayancha tiarmai “Asutniátin tsawant jeayi. ¿Yaki aun katsuntrat? Nu asamtai saanakim iin yutukratáta. Túrarum Murik ti asutiámataj nuya̱sha tura akupin pujana nuya̱sha ú̱kratkata” tiarmai.