1 Samuir
Ana Samuiran íktustaj tusa Yusan seamu
2 2:1-11 Kame Ánaka Yusan seak
“Winia enentái̱rka Úunt Yusai̱ni̱ṉ waraawai.
Warí Amiya̱ṉka chíkichkia atsawai.
Uunt Yuska ajakrasha iwiaaku awajniuiti.
Tura Niṉkia kuítrincha awajsasha ataksha kuítrintin awajniuiti.
Nin enentáimtin ainia nuna wekaamuri̱nkia péṉker wainiui
tura Yusan umircha ainia nuka
kiritniunam amuukartatui.
Túrunawar ní kakarmari̱ji̱a̱i̱ṉ nupetmakchamnia ártatui”
tu seamiayi. Irkanaka je̱e̱n waketkimiayi tura úchikia Yúsnan pujurin Irí pujamunam Uunt Yusan takarniuyayi.
Irí uchirí̱ tura Samuira wekaamuri̱
12 2:12_17 Irí uchirí̱ armia nuka Yúsnan pujurin áiniayataṉ Yusan enentáimtichu ármiayi. Núnisaṉ Uunt Yusa nekatairi̱ncha takakcha ármiayi. Yus áestuatniun tí peṉker armia nú namaṉken níniunak achia̱rmiayi. Arantichu ásar nú natsa yajauchiri̱nkia Uunt Yus íimmianum ti uunt armai.
18 2:18-24 Antsu uchi Samuirka awaṉkéman nuntuarun ríniuja̱i̱ nukurí̱ aparamun entsaru Yúsnan pujurniuya entsarua ániun Yusan takarmiayi. Tura Yuska Anan péṉker enentáimta asa menaintiú uchin tura jimiará nawantri̱n susamiayi. Kame Irikia úuntach ajasuítiat ni uchirí̱ ashí Israer shuaran túriarmia nuna ashí antimiayi. Warí Yus Shiir Awajtai̱ Je̱a̱ wá̱i̱ti̱a̱i̱ri̱n nuwa̱ takarin armia nuja̱i̱ tsaniṉ kániarmiayi. Nuna ántak Irí uchirí̱n chicharainiak “¿Urukamtai nusha túmarum? Ántajna nusha péṉkerchaiti. 25 Áishmaṉ chíkich áishmaṉja̱i̱ yajauchin túramtaikia núnaka Yus chichamprukminiaiti tura aents Uunt Yusan yajauch túramtaisha nincha ¿yaki chichamprukaint?” tímiayi. Túrasha Yus nin ajakrartaj tusa wakera asamtai ni aparí̱ chichame̱nka anturkacharmai. 26 Nuyá̱ Samuir uchi asa tsakaki̱ wémiayi. Nuyá̱ Yussha tura aentssha nin shiir enentáimtiarmiayi.
Irí shuari̱ ukunam túrunatin ujakma
27 2:27-36 Yusna áishmaṉ Irin tarí chicharuk “Ejiptunam pujamni̱ṉ Yúsnan pujurin ai̱ tusan ashí Israernumia̱n ámin anaikiajme. Túran áestuar Yus shiir awajsatniun Israer shuar surusárman ame apa shuari̱n súsarmajai. Tura taṉkusha núnisaṉ ántar surusármasha ¿urukamtai áitkiarum? Wíniaka íktusam nekaska ame uchiram shiir awajsarmame. Túrawaram Wi shuar Israer shuar surusárma péṉkeri̱ ainia nuja̱i̱ ame uchiram unuekarume. Aya shiir awajtuinia nunak Wisha shiir awajsartatjai antsu nakitruinia núnaka Wisha núnisnak pachischartatjai. Kame nuka ju̱ja̱i̱ nekaattame. Ame uchiram jímiar ainia nuka Úpniji̱a̱i̱ Piniaska nú tsawantini̱ṉ mái̱ jakartatui. Antsu nuya̱ṉka Yúsnan pujurniun Winia Wakaniur tura Winia enentái̱r wakera nuja̱i̱ méteken chikichan anaikiattajai.”