Apukarípsis
2. Anujtúkma 7 apujsamu
Nayaimpiniam Yusan shiir awajénamu
4 Nu naṉkaamasmatai nayaimpiniam waiti uranniun wainkiamjai. Tura nuyá̱ kakaram untsumman antukmajai. Nuik kachuja̱i̱ métek kakaram chichartukma nu turutmiai “Ju̱i̱ yakí̱ wakata. Ukunam átatna nuna iniaktustatjame” turutmiai.
2 Nu chichamaik Yusa Wakaní̱ yapajtiuámai. Túrutamtai nayaimpinmaṉka akupin pujutai̱nium pujan wainkiamjai. 3 Nisha jaspi kayasha tura kurnarínia kayasha nuja̱i̱ métek ti wínchauyi. Akupin pujutai̱n tuntíak téntakuyi. Nusha ismirárta kayaja̱i̱ métekeyi. 4 Chíkich paintikuátru akupin pujutai̱n nu pujutai̱n téntakarun wainkiamjai. Tura paintikuátru uunt puju entsarainian tura kurin etseṉkrakainian nui̱ pujuinian wainkiamjai. 5 Akuptáiniumia̱ peemsha ipiamtasha untsummasha jíiniarmai. Tura nu pujutai̱nium naka siati shirikip kearmai. Nusha siati Yusa Wakaní̱nti. 6 Núnisaṉ nu pujutai̱nium naka nayantsa ánin ti saar amai.
Nu pujutai̱nium wakenmaani̱sha niisháa taṉku kuatru téntakar ármiayi. Ukuri̱ni̱sha tura eemsha ji̱ irunmiai. 7 Emka taṉku úunt ya̱wa̱a ániuyi. Chíkichka turu uchichia ániuyi. Tura chikicha shuara yapi̱ya ániuyi. Tura chíkichka churuwia nanamua ániuyi. 8 Nusha sais nanamtin armai. Tura ji̱sha ti irunainiak ashí wáinmarmai. Káshisha tsawai̱sha tuke iniaitsuk ju̱na tiniu armai.
“Tunaarincha tunaarincha nekas tunaarincha Úunt Yusaiti. Ashí Tujintkiachu Yúsaiti.* Tuke yaunchu pujuyayi. Núnisaṉ yamaisha pujawai. Tura ataksha ju̱ke winittiawai.”
9 Tura uunt pujutai̱nium pujana nu tuke iwiaaku pujú asamtai nu taṉku ti shiir awajsar yúmiṉkiak pujuriarmai. 10 Túruiniakui paintikuátru uunt tuke iwiaaku pujun tikishmátainiak ni etseṉkrutairi̱n naka áepruiniak jú̱nis tuíniawai
11 “Uuntá, ii Yúsri̱nme. Tuke shiir awajmáinme. Ashí naṉkaamas kakarmaitme. Amek ashí írunna nu najankaitme. Tura aya wakerakum najankamame. Ame wakerakmin irunainiawai”
tuíniawai.