Kurusenam

4 Úuntirmesha, atumí Uuntri̱ atumín wáiniuk nayaimpiniam pujatsuk. Tuma asamtai atumí yaintma jiatsuk péṉker iniartiniaitrume.

2 Yus áujkuram Ni yumiṉsarum asummiarum iniaitsuk áujsatarum. 3 Iincha Yus áujkartustarum. Kristu chichame̱n yaunchu nekaachman yamái étserkun sepunam pujajai. Tuma asamtai nuna shiir aṉkant etserkat tusarum áujtursatarum. 4 Tura wi paant etserkatniuitiaj núnisan etserkat tusarum áujtursatarum.

5 Yus shuarchaja̱i̱ shiir túratarum Yus Chichaman yajauch enentáimturara̱i̱ṉ. Kakaram ajasrum tsawant ántrarum iniaṉkasairap. 6 Ti shiir chichamtin átiniaitrume tura anturújamin átiniaitrume. Núnisrum chíkich chíkich Yus Chicham paant ujaktin nekaattarme.

Amikmamu

7 Ii aneamu yachi̱ Tíkikiu ashí wínian ujatmáktatrume. Nisha wiji̱a̱i̱ métek Yúsnan pimpitsuk tí peṉker takasuiti. 8 Nu asamtai ii ju̱i̱ pujajnia nuna ujatmak ikiantamprarat tusan akuptajrume. 9 Núnisaṉ ii aneamu yachi̱ Unisemu niji̱a̱i̱ winiawai. Nisha atum wéaiti, tura Yusja̱i̱ shiir wekaawai. Nu shuar ashí ju̱i̱ túrunamun ujatmáktatrume.

10 Aristárku wi sepunam tsaniṉkia pujamur amikmátmarme. Núnisaṉ Márkus, Pirnapí kaná yachi̱a nu, amikmátmawai. Nisha nui̱ jeamtai antukmarum núnisrum péṉker wáinkiatarum. 11 Justu Jesus náartin amikmátmarme. Jú̱chik áiniawai Rúmanmaya̱ Israer shuar wi Yúsnan etserkatin atutkaaru ainia nu. Túmainiak ti shiir ayamtikruiniawai. 12 Epaprassha, atum wea, Krístunun etserin asa atumín amikmátmarme. Nisha ashí tsawant Yusan áujeak Yusja̱i̱ kaka̱rum tuke shiir Yus wakera nu túrak tusa seatramprume. 13 Wisha Epapras atumín ti enentáimturman nékajai. Núnisaṉ Rautiséanmaya̱ shuarnasha tura Iarapurisnumia̱ shuarnasha ti páchiniawai. 14 Rúkas, aneamu tsuákratin, núnisaṉ Témassha amikmátmarme.

15 Tura Rautiséanam pujuinia nú Yus shuarsha amikmatruatarum. Núnisaṉ Nímpiassha tura ni je̱e̱n irunainia nú Yus shuarsha amikmatruatarum. 16 Átum ju̱ papí áujsarum umikrum Rautiséanmasha nuyá̱ Yus shuar áujsarti tusarum akupkatarum. Tura atumsha núnisaṉ Rautiséanmaya̱ papí támatai atumsha áujsatarum. 17 Tura ju̱ Arkipiu titiarum “Ii Uuntri̱ Jesus ni takatrí̱n suramsa nu péṉker umikta” tawai, titiarum.

18 Wi, Papru, winia uwejruja̱i̱ jú̱chiniak áatkun amikmajrume. Sepunam pujajna ju̱ enentáimturatarum. Yus shiir yaintmakarti.

Nuke atí.