Túramuri̱

Sauru Yus shuaran kajerkámu

8 Kame Estepaṉkan máwarmatai Sáuruka péṉkeraiti tímiayi. Nuyá̱ nú tsawantai̱ Yus shuaran Jerusaréṉnum pujuarmia nu tí apapéktin naṉkamnamiayi. Túmakui̱ Yus shuar Jerusaréṉnumia̱ pisarar Jutanam tura Samarianmasha jeawarmiayi. Jesusa akatrámuri̱ṉkia antsu Jerusaréṉnumaṉ juákarmiayi. 2 Tura áishmaṉ Yusan péṉker enentáimta armia nu Estepaṉka aya̱shi̱n iwiarsarmiayi tura aneenak tí utiarmiayi. 3 Antsu Sáuruka Yus shuaran kajerak tí pataatu wémiayi. Túmak nui̱ je̱á̱ wayá̱, nui̱ wayá̱ áishmaṉnasha nuwa̱ncha wainkiaṉka japiki̱ jukí̱ sepunam eṉkeataj tusa túrimiayi.

Samaria nuṉkanam etserkamu

4 Túrasha Jerusaréṉnumia̱ aents pisararmia nu, arant wénaksha tuke Yusa Chichame̱n etserkiní̱ yujarmiayi. 5 Tura Jirip Jerusaréṉnumia̱ we tura chíkich péprunam Samaria nuṉka amia nui̱ jeá chichaak “Yus anaikiamu ana nu Jesusaiti” tu etsermiayi. 6 Túrakui aents iruntrar chikichík enentáiji̱a̱i̱ Jirip étsereamun titiú pujusár antukarmiayi. Yusa kakarmari̱n nekaawarat tusa aentsti túrachminian túrimia nunasha wainiarmiayi. 7 Ti untsurí aents iwianchruku armia nuna Jirip nu iwianchin ji̱i̱rki̱ akuptiarmiayi. Tura íwianch jiiniainiak kakantar charáa tiar jiiniarmiayi. Tura ti untsurí emearusha shutuapsha péṉker ajasármiayi. 8 Tuma asamtai nú peprunmaya̱ṉka ashí shuar ti warasar pujuarmiayi.

9 Tura nú nuṉkanam uwishin Semuṉ pujumiayi. Nuikkia wi ímianaitjiai tusa Samarianmaya̱ aentsun anaṉniuyayi. 10 Tuma asamtai ashí aents úmamkesar uchichisha, uuntcha, nin anturiarmiayi. Tura chicharainiak “Ju̱ Semuṉsha Yusa kakarmari̱ji̱a̱i̱ áitkiawai” tiármiayi.

11 Tura ti untsurí uwí wawekratmari̱ji̱a̱i̱ anaṉkarta asamtai nu aents umirkarmiayi. 12 Túrasha Jirip Yusa akupeamuri̱n tura Jesukrístununcha shiir chichaman etserkamiayi. Tura nuna antukar nuwa̱sha áishmaṉsha umikiar imian wéarmiayi. 13 Semuṉsha imia uwishniuitiat Yus Chichaman enentáimtus imiantmiayi. Tura Jiripiji̱a̱i̱ tsaniṉ wekaimiayi. Yusa kakarmari̱n shuar nekaawarat tusa Jiripikia aentsti túrachminian túrimiayi. Nuna wainiak Semuṉ ti enentáimsamiayi.

14 Tura Jesusa akatrámuri̱sha Jerusaréṉnum pujuarmia nui̱ Samarianmaya̱ aents Yusa Chichame̱n umirainiawai táman nekaawarmiayi. Tuma asamtai Pítruncha Juáṉnasha nekáa ikiuutarum tusa akupkarmiayi.15 8:​15-16 Tura Samarianmaya̱ Yus shuarsha aya Uunt Jesusa náari̱i̱n imianiarmiayi. Yusa Wakaní̱ṉkia tárachmiayi. Tuma asamtai Pítrusha Juaṉja̱i̱ nui̱ jeawar Samarianmaya̱ Yus shuara enentái̱n Yusa Wakaní̱ pimiutkarat tusa Yusan áujtusarmiayi. 17 Tura áujsua umikiar Pítiur Juaṉja̱i̱ ni uwejé̱n nú Yus shuaran awantsarmiayi. Nuiṉkia Yusa Wakaní̱ taramiayi.

18 Jesusa akatrámuri̱ uweje̱ awa̱smanum Yusa Wakaní̱ taramtai, Semuṉsha nuna wainiak, kuitji̱a̱i̱ nu kakarman sumaktaj, tímiayi. 19 Tura Jesusa akatrámuri̱n chicharuk tímiayi “Winiasha kuitji̱a̱i̱ surustarum nu kakaram. Wisha nútiksanak náṉkamas aentsnum winia uwejur awantsam Yusa Wakaní̱ tarurat tusan tajai” tímiayi. 20 Tutai Pítiur Semuṉkan chicharuk “Ámeka kuítrumja̱i̱ métek meṉkakatniuitme. Warí, Yus amaana nu ¿kuitji̱a̱i̱ sumaktinkiait? 21 Yus esetram enentáimtachu asam nu túramu pachistincha peṉké tujintiame. 22 Enentáimprata. Túram Yus seatá. Enentáimtamna nuna Yus tsaṉkurtámprashtimpiash. 23 Nékajme, tsaaṉkea áintsaṉ yapá enentáimin pimiutramkaiti. Tura tunaarumiin jiṉkiamua núniniaitme” tímiayi.

24 Tutai Semuṉ chichaak “Uunt Yus áujtursatarum. Túrutrumna nuna túrunawa̱i̱j tusan tajai” tímiayi. 25 Nuya̱sha Jesusa akatrámuri̱ Jesusa túramuri̱n nú aentsun ujakármiayi. Tura wésar Samarianam pepru ámanumka Yus Chichaman nui̱ etserkiar nui̱ etserkiar Jerusaréṉnum waketkiarmiayi.

Jirip Yus Chichaman etserkamu

26 Tura Yus ni suntari̱n nayaimpinmaya̱n Jiripincha akuptúkmiayi. Nisha chicharuk “Wátskea. Ju̱yá̱ jiinkim Jerusaréṉnumia̱ jintia Kaasa péprunam wea nuní̱ weme anaraani̱ wetá. Nú jintiaka atsamu nuṉkanam naṉkamawai” tímiayi. 27 Tutai Jiripsha wémiayi. Jintiá wesa Itiupíanmaya̱ áishmaṉkan wainkiamiayi. Nú aishmaṉsha Itiupía nuṉka akupniúri̱n, ni naari̱ Kantasen takarniuyayi. Kantaseka núwa̱uyayi. Tura nú aishmaṉ ti neka asa nuna kuítri̱n íirniuyayi. Nú aishmaṉsha Yusan áujsataj tusa Jerusaréṉnum wéu wáketmiayi. 28 Karetanam eṉkemár wesa Yúsnan etserin Isayas aarmia nuna aujki̱ wémiayi. 29 Wats, Jirip nú jintianam wéakui Yusa Wakaní̱ nin chichaak “Nú kareta amayá̱ṉta” tímiayi. 30 Tura Jiripsha amayá̱ṉ Yusna etserin Isayasa áarmari̱n áujun antuk chicharuk “¿Áujeamna nu nékamek?” tímiayi. 31 Tutai nú aishmaṉ chicharuk “¿Itiurak nekaataj? ¿Yaki jintintruat?” tímiayi. Tura antsu iiji̱a̱i̱ wetái tusa, Jiripincha karetanam eṉker jukimiayi. 32 Nu papí áarman aujmia nu jú̱yayi.

34 Kantase takarniúri̱ Jiripin aníak “Waitneasam turuttia, tu aarma ana nusha ¿yana taa Yúsnan etserin níṉkik túmama? ¿Chikichnash taa?” tímiayi. 35 Nuyá̱ Jirip nu áarman áujtus “Ju̱ka Jesusnan tawai” tímiayi. Tura nú arantcha Yus Chichaman ujakmiayi.

36 Nuyá̱ entsa ámanum naṉkaamak áishmaṉ Jiripin chicharuk “Iisiá, entsá jeaji. Wikia ju̱i̱ imianchamniakaitiaj” tímiayi. 37 Tutai Jiripsha chicharuk “Tuke enentáimji̱a̱i̱ Jesus nekas enentáimtakminkia túramniaitjiame” tutai áishmaṉ chichaak “Ee nekasaiti, Jesukrístuka Yusa Uchirí̱nti tajai” tímiayi. 38 Tura karetan awajás mai̱ jíinkiar entsá wéarmiayi. Nui̱ Jiripikia Kantase takarniúri̱n imiaimiayi.

39 Tura kukar jíinkiarmatai Uunt Yusa Wakaní̱ Jiripinkia jukimiayi. Tuma asamtai Kantase takarniúri̱sha Jiripin wáinkiachmiayi. Túrasha niṉkia waras wémiayi. 40 Jiripsha jeachat Asutu péprunam wantinkiamiayi. Tura nuyá̱ jiinkí̱ péprunam nuí̱ wayá̱, nuí̱ wayá̱ Yus Chichaman etserki̱ we Sesarianam jeamiayi.