Túramuri̱
Papru Akripia̱i̱ chichamprumakma
26 Jistu nuna tutai Akripia Páprun chicharuk “Wats, amesha tu timi chichamprumakta” tímiayi. Tutai Papru uweje̱ takuí chichatan juármiayi. 2 16:2-3 Chichaak “Úunt akupin Akripiá, ii Israer shuarti túrutai̱ ainia nu amesha nékame. Tura ashí ii chicharnaiyajnia nusha nékame. Tuma asamtai yamái wisha ámin chichamprumaktaj tau asan shiir enentáimjiai. Israer shuar turutainia nuna mash ujaktatjame. Waitneasam péṉker anturtukta.
Papru yaunchu túrutairi̱n ujakma
4 Wi úchichik winia nuṉkarui̱ tura Jerusaréṉnumsha pujusan wi túramajna nuna ashí wí shuar Israer ainia nu nékainiawai. 5 Pariséu ajasan ni akupeamuri̱n itiurchat ai̱ṉ ashí takamtsuk tuke umirniuitjiai. Nunasha nékainiawai tura wakeruiniakka etserkamnia ainti. 6 Túrasha wikia jakamunmaya̱ nantaktin átatui tiniu asamtai wíniaka emetruawar itiariármiayi. Túrasha núnaka Yuska ii úuntri̱n yaunchu tímiayi. Yus timia nuna túrunattawai wisha tiniu asamtai itiariármiayi. 7 Tura ashí mash Israer aentsti, tuse wea mátsatka ájinia nu, ju̱ nantaktin chichaman Yus timia nuna túrunati tusar nákainiaji. Tuma asar Yus áujkuri tsawai̱sha káshisha nú enentáimtuiniaji. ¡Tura wisha nú chichamnak enentáimta asamtai wíniaka kajertuiniawai, uunt Akripia! 8 Warí, atumsha ‘Yus jakaancha iniantkímniaiti’ tátsurmek.
9 Tura wisha yáunchuka Nasarétnumia̱ Jesusnan umirkaruka kajerkatniuiti, tu enentáimniuyajai. 10 Tura Jerusaréṉnum Yus shuar armia nuna kajerkarmiajai. Yúsnan pujurniu peṉkeri̱ chichame̱ja̱i̱ untsurí aentsun Jesusnan umirkarmia nuna sepunam eṉkeamiajai. Tura nú shuaran máiniakuisha wikia péṉkeraiti tu wémiajai. 11 Tura Israer shuara iruntai̱ je̱e̱n waya̱n ti asutiármiajai, Jesusnan umirkatniun iniaisarat tusan. Tura imiá kajerkaran chíkich nuṉkanmasha achiktaj tusan pataatu wéarmiajai.
Tamasku jintianam túrunamun ujakma
(Tur. 9:1-19; 22:6-16)
12 Tura Yúsnan pujurniu uuntri̱ tsaṉkatrukmatai papin ni surusarmia nuja̱i̱ Tamaskunam wétaj tusan jiinkimiajai. 13 Tura uuntá, nantu tutupin ai̱ jintiá weai̱ newaat ajakí̱ ti tsáapin etsa̱ja̱i̱ naṉkaamas etsantrutramiayi. Tura wiji̱a̱i̱ wéarmia nunasha núnisaraṉ etsantrurarmiayi. 14 Tura túrunamtai ashí nuṉká tepetar wainkiarmiaji. Wiki Israer chichamja̱i̱ túrutun antukmajai ‘Sauru, Sauru, ¿urukamtai imiá pataaturam? Amek enentáimin yajauch awajmámsame, waaka saṉkanmiak numin ijiuma núnismek. Wí aents kajera asam túruname’ turutmai. 15 Túrutkui ‘¿Amesha yáitiam, Uuntá?’ wisha tímiajai. Tutai Uunt chichaak ‘Wikia Jesusaitjiai, ame pataaturmena núitjiai. 16 Tura nantakim wajaktia. Winia takartusminiam tusan wantintiukjame. Tura ame wainkiamna nusha etserkattame. Tura ukunam wantintiuktatjame. Wáinkiatamna nusha etserkamnium. 17 Wats yamaisha Israer shuarchanum akupkátjame. Tura Israer shuar kajertamainiakuisha tura chíkich aents kajertamainiakuisha ayamprúktatjame. 18 Péṉker jintintiata tusan akupeajme. Kame aentssha kiritniumia̱ jíinkiar tsáapninium wekasarat tusan tura iwianchi kakarmari̱ya̱ aṉkant awajsar Yusan umirkarat tusan akupeajme. Tura Winia enentáimtursarmatai Wisha ni yajauchiri̱n tsaṉkurattajai. Nuna túran Yusna ajasáru áiniana nuja̱i̱ apujsattajai.’ Nuna Jesus turutmiai.
Papru mesekran ujakma
19 Tuma asamtai uunt Akripia, Uunt Jesus nayaimpinmaya̱ wantintiurak turutmia nuna umirkataj tusan pujajai. 20 Kame ené enentáimia ajasár nekas enentáiji̱a̱i̱ Yusna ajastinian emka Tamaskunam pujuarmia nuna ujakármiajai. Tura nuya̱sha Jerusaréṉnumia̱n, Jutanmaya̱ncha tura nútiksanak Israer shuarchancha nuna ujakármiajai. Tura ujainiakun ‘Yus shuar ajasmarum paant ajasat tusarum péṉker túratarum’ tímiajai ashí shuaran. 21 Tura wi Yusa Uunt Je̱e̱n pujái̱ Israer shuar achirkar emetruawar mantuatai tukamá tujintrukarmiayi, Yus winia yaintiu asamtai. 22 Yus winia yaintiu asamtai iniaitsuk tuke Yus Chichaman ujainiajai. Uunt ainia nunasha tura péejchach ainia nunasha ujainiajai. Tura Muisaissha, Yúsnan etserniusha tiarmia nunak étsereajai. Nú arantka tátsujai. 23 Krístuka wáitsatniuyayi tura jakasha émak nantaktiniuyayi, ii uuntri̱ tiniu ármiayi. Tura Krístuka nantaki̱ Yusa Chichame̱n íi aentsun tura Israer shuarchancha nútiksaṉ ujaktiniuyayi. Nuna tu tiármiayi. Tura núnaka wisha tu ujainiajai” tímiayi Papru.
Papru Akripian Yusna ajasti tu enentáimmia
24 Tura nuna takui̱ Jistu kakantar chichaak “Maaj, Papru, waurme. Imiá unuimiatu asam wáurkame” 25 tutai Papru chichaak “Atsá uunt Jistu, wáurtsujai. Antsu wi tájana nuka ti nekasaiti. 26 Wi tájana nuna uunt Akripia ju̱i̱ pujana nuka nékawai. Tuma asamtai arantutsuk nin chichareajai. Kame ju̱ túrunamu ti paant asamtai nisha nékawai, tajai” tímiayi.
27 Nuyá̱ Akripian chicharuk “Yaunchu Yúsnan etserin áarmari̱ nekasapitia tátsumek uunt Akripia. Wikia nékajme. Nekasaiti, tame” tímiayi. 28 Takui̱ Akripia chichaak “Maaj, ishichik awajtame Papru, Yus shuar ajastin” tímiayi. 29 Tutai Papru chichaak “Tura ishichik chichamja̱i̱sha untsurí chichamja̱i̱sha amesha uunt Akripia tura ashí winia anturtukurmena nu, wiji̱a̱i̱ métek ajasúk tusan wakerajai. Tura antsu wía núnisaṉ jiṉkiamua núnaka wakeratsjai” tímiayi.
30 Papru nuna tuasua amikmatai úunt akupniusha nuyá̱ uunt anaikiamuncha, Pirinísesha tura nui̱ ashí pujuarmia nu wajakiarmiayi. 31 Tura arant wéar túrunamun chichasarmiayi. Tura chicharainiak “Jú̱ aishmaṉ mantamnamnian tunaamkachuiti tura peṉkesha sepunmasha eṉkeachminiaiti” tiármiayi.
32 Tura Akripia Jístun tímiayi “Ju̱ áishmaṉ ‘akupin Sésar nekarati’ tíchaitkuiṉkia akupmai makuitji” tímiayi.