1 Kurintiunam

Najankamu yus susamu

8 Ayu. Yamaikia yurumkasha namaṉsha najankamu yus susamun áujmatsattajai. Ju̱ja̱i̱ túratniua nuka mash nékaji. Tura shuar “tí nekaitjiai” enentáimkiuṉka núja̱i̱ṉkia “neka asan naṉkamantuitjiai” tu enentáimiui. Antsu shuar chíkich shuaran aneakka nin péṉker atí tusa yaya̱wai. 2 Shuar ti nékaitjiai tákuṉka nekas nekaatniua núnaka unuimiárchaiti. 3 Tura Yusan aneana núnaka Yus péṉker nékawai.

4 Wátsek najankamu yus susamu yúatin jú̱nis enentáimpratniuiti. Yuska aya chikichkiti. Tura chíkich Yus atsakui 5 aentsu yusri̱ nayaimpinmasha nuṉkasha írunna nuka peṉké ántar áiniawai. Kame aentsu yusri̱sha tura úuntri̱sha ti írunui. 6 Tura iikia nékaji aya chikichik Yus awai nusha ii Aparí̱nti. Ashí írunna nuna najanaiti tura ni wakera nuna umikiat tusa iin najatmamji. Ii Úuntri̱sha chikichkiti Jesukrístu. Níji̱a̱i̱ṉkia ashí najanamuiti. Tura iisha ni kakarmari̱ji̱a̱i̱ iwiaaku pujaji.

7 Tuma asamtai najankamu yus susamu yuámniaiti tura Yus shuar awai ju̱na nékainiatsna nu. Nu shuar najankamu yusan yaunchu tikishmátraru ásar nú yusan susamun yúawarka itiurchat enentáimprar enentái̱rui̱ yajauch ajasjai tiártatui. 8 Wátsek, yuámuja̱i̱ Yus iin shiir enentáimtikrampratniun jeatsui. Yuarkia nuja̱i̱ péṉker áchattaji tura yúachrikia yajauch áchattaji. 9 Kame aṉkantaitjiai tusarum túrarmena nuja̱i̱ kakarmachu ainia nuna yajauchiniam aju̱a̱ra̱i̱j tu enentáimsarum émamkesrum íimiastarum. 10 Iistá. Ámeka neka asam najankamu yusa je̱e̱n waya̱m tura nui̱ yúakminkia ame yátsum nui̱ waitmakchanpiash. Tura nisha itiurchat enentáimiar najankamu yus susamun yúashtimpiash. 11 Núja̱i̱ṉkia ame nékamuja̱i̱ ame yátsum Kristu jaka uwemtikramia nuka yajauch ajastatui. 12 Túramtai ame yátsum itiurchat enentáimna nu yajauch awajeakum Krístunmasha yajauch túraitme. 13 Nu asamtai winia yatsurun wi yuajna nuja̱i̱ yajauch awajeaknaka namaṉnaka peṉké yúashtatjai ni yajauch ajasá̱i̱ṉ tusan.