1 Kurintiunam
Papru Apurusja̱i̱ Yusa takatrí̱n métek takarma
3 Tura wikia yatsuru, nuik ai̱ atumji̱a̱i̱ pujakun Yusa Wakaní̱n umirniun chichastinia áintsanak atumji̱a̱i̱ chichastinian tujintkiamjai. Antsu aya̱sh wakeramu umirin asakrumin Krístunam katsua̱rcharuja̱i̱ chichastinia áintsanak atumji̱a̱i̱ chichasmajai. 2 Uchi kuírach namaṉ ayurachminiaiti antsu aya umuntsatniuiti. Núnisaṉ aya yúpichuchin ujakmajrume itiurchat ana nu tujintiakrumin. Tura yamaisha itiurchat ana nu tuke tujintiarme. 3 Aya̱sh wakeramu tuke umirniuitrume. Yajauch enentáimtunaiyakrum tura katsumnaiyakrum akantrámuitrume. Nuja̱i̱ páantaiti átum aya̱sh wakeramu umirniuitrume. Yúsnan enentáimtuscharuja̱i̱ métek wekainiaitrume. 4 Atumíinkia shuar “wi Páprunuitjiai” tuíniatsuk. Chikitcha “wi Apurusnaitjiai” tuíniatsuk. Tu chichaakrum aya̱sh wakeramu umirniuitrume. 5 Wátsek. Wi Papru ti péṉkeraashitiaj. Apurussha ti péṉkeraashit. Antsu iisha aya Yusa takarniúri̱ntji. Yus Chicham étserkurin ii Uuntri̱ enentáimtuschamkuram. Ii Uuntri̱ takatan chíkich chíkich suramsamajnia nuke takasmaji. 6 Wi Yus Chichaman étserkun arakan araktinia áinis takasmajai. Apurussha entsan ukatramai. Tura Yus nu arakan tsakatmarmai. 7 Arakan araana nusha entsan ukatna nusha ántrachukait. Antsu Yusak arakan tsakatmaru asa ashí túrachukait. 8 Arakan araana nusha entsan ukatna nusha métek áiniawai. Túmaitkiuisha takasmaja̱i̱ métek Yus akiktatui. Péṉker takasmataiṉkia péṉker akiktatui. 9 Wisha tura Apurussha Yusa takatri̱ mái̱ tsanintkiar takaaji. Tura Yus atumí enentái̱n takaakui atumsha Yusa núṉke̱ya áintsaitrume.
Je̱a̱sha enentáimpramniaiti. Yus atumji̱a̱i̱ takaak je̱á̱ je̱a̱mtinia áintsaṉ takaawai. 10 3:10-11 Je̱a̱ je̱a̱mainiak emka uunt kaya nuṉká init ikiursar kaki awajsatin áiniawai. Tura nuya̱ṉka nu kayanam ekeniar júkitniuiti je̱a̱ wewe atí tusa. Wikia je̱á̱ je̱a̱min ti unuimiárua áintsanak uunt kaya nuṉká emka ikiustinian neka núnisnak Jesukrístunun emka ujakmajrume. Tura Jesukrístu uunt kaya kaki ikiusma áinis asa Níṉkiti nui̱ je̱a̱ ekenkatin. Iis, ashí enentáimtustinji̱a̱i̱ naṉkaamas Jesukrístu enentáimtustiniaiti. Nu asamtai Jesukrístunun emka ujakmajrume. Yus nuna etserkatniun tsaṉkatrukuiti. Wi emka uunt kaya ikiursatniua áintsaṉ Jesukrístunun ujakmajrume. Tura nuya̱ṉka chíkich shuar ekeniar je̱a̱min áiniawai. Tura péṉker je̱a̱mtinian anearti. 12 Tura je̱a̱ je̱a̱mainiak ni wakerak péṉkera nuja̱i̱ je̱a̱miniaiti. Kame ni péṉker je̱a̱mtinian wakerakka kuriji̱a̱i̱sha, kuítji̱a̱i̱sha, shíirmach kayaja̱i̱sha je̱a̱miniaiti. Chíkich je̱a̱mkuka numiji̱a̱i̱sha keṉkuja̱i̱sha tura nukaja̱i̱sha je̱a̱miniaiti. Núnisaṉ shuar Yúsnan takaak péṉker takasminiaiti túrasha náṉkamas takasminiaiti. 13 Tura amuukatin tsawant jeakui ashí ni takatri̱ paant átatui. Nu tsawantai̱sha Yusai̱ya̱ ji átatui tura nu jisha ni takatri̱ péṉkera nunasha tura yajauchia nunasha nekapsattawai. 14 Tura shiir je̱a̱muka tura nu je̱a̱sha esaachmataiṉkia shiir akinkiáttawai. 15 Antsu náṉkamas je̱a̱muka ímia niṉki̱ jiniumia̱ uwemprattawai, tura ni je̱a̱mma esáa peṉké atsuttawai.
16 Enentáimpratarum. Yusa Wakaní̱ atumíin pujá asamtai Yusa Je̱e̱ ajasuram nu nékatsrumek. 17 Shuar Yusa Je̱e̱n émeseakuiṉkia Yus nu shuaran emesrattawai. Yusa Je̱e̱ṉka timiá shiir asamtai túrattawai. Nu Je̱a̱ atumketrume.
18 Ju̱ nuṉkanmaya̱n unuimiárua núnisrum “ti nékaitjiai” tu enentáimtumasrum anaṉmamawairap. Antsu ju̱ nuṉkanmaya̱n nékachua áinis ajas Yúsnan ti shiir unuimiártiniaiti. 19 Ju̱ nuṉkanmaya̱ aents nékainia nuna Yus “ántraiti” tawai. Yus Papinium áarmaiti “Ju̱ nuṉkanmaya̱n unuimiárun ni enentáimmiaja̱i̱ṉ Yus sumamtikiattawai.”* 20 Tura nu arantcha áarmaiti “Uunt Yuska ‘unuimiáru enentáimmiancha peṉké ántraiti’ tawai.”* 21 Tuma asamtai “Páprunuitjiai” tárumna nusha “Apurusnaitjiai” tura “Pítrunuitjiai” tárumna nusha ántar enentáimprume, ni aya aents ásarmatai. Tu enentáimprarum warasairap. Antsu nekaatarum. Ashí írunna nu atumín yaintmaktiniaiti. 22 Páprusha, Apurussha, Pítrusha, ju̱ nuṉkanmaya̱sha, iwiaakmasha, jákatniusha, yamái írunna nusha, ukunam átatna nusha, mash atumniaiti shiir yaintmaktin. 23 Atumsha Krístunuitrume tura Krístusha Yúsnaiti.