Ipisiunam
6 Uchitirmesha, Yus shuar asarum apasha nukusha umirkatarum. Nuka ti péṉkeraiti. 2 Emka akupkámu umirkam nekas shiir átatme tana nu ju̱i̱ti. “Apasha nukusha umirkata.* 3 Túrakmeka shiir átatme tura jú̱ nuṉkanam untsurí tsawant pujustatme”* tawai.
4 Atumsha, uchirtintirmesha, atumí uchirí̱ ántrarum akajkairap. Antsu Yusan shiir enentáimtusarat tusarum tí peṉker jintinkirum tsakatmartarum.
5 Takakmautirmesha, atumí uuntri̱ ju̱ nuṉkanam pujuinia nu tí peṉker umirkatarum. Kristu umirkatniua áintsarum wishiktsuk ashamakrum tuke enentáiji̱a̱i̱ takarsatarum. 6 Aya wáitmakui shiir enentáimtursat tusarum péṉker takarsairap. Antsu Kristu takarniúri̱a núnisrum ashí ame enentáimji̱a̱i̱ Yus wakera nu túratarum. 7 Aya shuárnak yayá̱ nútiksarum takasairap. Antsu ii Uuntri̱ Kristu takarsatniua nútiksarmek ásump enentáiji̱a̱i̱ takastarum. 8 Kame chíkich chíkich ni takasmaja̱i̱ métek akinkiartatui. Ii Uuntri̱ Kristu nu shuar péṉker túramuja̱i̱ métek akiktatui.
9 Tura atumsha, iniamniutirmesha, atumí takartamu wakaní̱ mántutsuk shiir enentáiji̱a̱i̱ iniartarum. Nekas enentáimpratarum. Ii Uuntri̱ nayaimpiniam pujana nuna nisha atumji̱a̱i̱ métek umirainiawai. Tura Yuska ashí shuaran akantsuk métek iyawai.
Yusa kakarmari̱ji̱a̱i̱ íwianch taritratin
10 Wátsek, yatsuru, ii Uuntri̱ Yusja̱i̱ tsaniṉkiu asarum ni ti kakarmari̱ji̱a̱i̱ iwianchji̱a̱i̱ mánaiktin kakaram ajastarum. 11 Apach mánainiak jiru entsarua núnisrum Yus susamuja̱i̱ entsartarum. Nuja̱i̱ íwianch nupettamkui tariartatme. 12 Kame Yusna takáa asar peṉké aentsja̱i̱ mániatsji antsu yajauch wakan kakaram írunna nuja̱i̱ mániaji. Nisha ju̱ nuṉkanam kiritniunma áintsaṉ tunaanum wekainia nuna akupin áiniawai. 13 Jiru entsartinia áintsarum Yus súramna nu entsartarum. Nu entsarmaja̱i̱ itiurchat tsawant taritra nupetkarum tuke tariarum wajastatrume. 14 Wats, nekas tariartin nekas chicham emenmamatarum. Tura péṉker túratniuja̱i̱ jatairum ejaktarum.* 15 Suntar iwiarnak sapatan aweá áintsarum Yusa Uwempratin Chichame̱ kame aṉkant pujustinia nú chicham, etserkatin iwiarnartarum.* 16 Nuya̱sha ashí naṉkaamas tantar takustinia áintsaṉ Yus tuke nekas enentáimtustarum. Nuja̱i̱ íwianch eketrámkamusha ashí uwemturtatme. 17 Muukem ejaktincha* Kristu uwemtikrampramu muukmi̱i̱n etseṉkruktarum. Tura Yus Chicham puyá̱a* ántsaṉ achiktarum. Nuka nekas Yusa Wakaní̱ puya̱ri̱nti. 18 Yusa Wakaní̱ji̱a̱i̱ Yus áujeakrum tuke seatniuitrume. Tura tuke aneara pujustarum wake mesetsuk tura ashí Yus shuar ainia nusha Yus áujtustarum. 19 Núnisaṉ winiasha áujtursatarum. Wi sepunam pujayatan Yus winia chichastinian surusat tusarum seatritiarum. Tura wi chichaakun sapijmiatsuk Shiir Chichaman yaunchu nekaachma paant awajsat tusarum áujtursatarum. 20 Yus nu chichaman etserkatniun akuptúkuiti. Nuna túrakun sepunam pujajai. Sapijmiatsuk etserkat tusarum Yus áujtursatarum.
Amikmamu
21 Ii aneamu yachi̱, Tíkikiu, ashí wi túramun ujatmáktatui. Nisha Ii Uuntri̱ Krístunu etserkatniun tí peṉker yáinniuiti. 22 Tuma asamtai ii ju̱i̱ pujamun ujatmak ikiantamprarat tusan akuptajrume.
23 Yus Apasha tura ii Uuntri̱ Jesukrístusha ashí Yus shuartirmin anenmak shiir imiatkinchanum pujustinian suramsarti. Tura Nin tuke nekas enentáimtustinian suramsarti. 24 Ashí ii Uuntri̱ Jesukrístun tuke enentái̱ji̱a̱i̱ aneana nuna Yus shiir yaiṉtí.
Nuke atí.