Matéu

Chíkich sumamtikiawairap

(Ruk. 6:37-38, 41-42)

7 Chikicha yajauchiri̱ ti enentáimtusairap. Núnisaṉ Yus atumí yajauchiri̱n iirtamsashtatui. 2 Chíkich wárik makutin enentáimkiumni̱ṉkia Yus núnisaṉ sumamtikramattawai. Tura ame chikicha túramuri̱ nekapmarmena nú nekapkaja̱i̱ṉ amincha nekapmarmattawai. 3 Tuma asamtai ¿itiurtsuk atumí ji̱i̱n numi eṉketna nuke íitskesha atumí yachí̱ ji̱i̱n tsuat eṉketusha wáintrum? 4 Ame ji̱miin numi tuke eṉketai̱sha ¿itiurtsuk ame yatsumi ji̱ya̱ tsuátan jurustájme tame? 5 Ántar shuará, ame yáiṉtaj tákumka emka ame ji̱miin numi eṉketna nu jusata. Nuyá̱ paant íistatme yatsumi ji̱n tsuat eṉketna nu jurustin.

6 Ti shiira nuka ya̱wá̱ súsashtiniaiti. Nuna nakitrar amincha esatmichartimpiash. Kuítrumsha kuchi súsashtiniaiti. Aya najatrachartatuak.

Yus seakmin suramsattawai

(Ruk. 11:9-13)

7 Yus seakrumin suramsattawai. E̱a̱krumka wainkiattarme. ‘Winiajai’ tákurmin awa̱intiámattarme. 8 Seana núnaka suíniawai. E̱a̱na nuka wainiui. ‘Winiajai’ tuinia núnaka awa̱iniawai.

9 Ame uchiram apatkun seatmakui ¿kayash súsaintiam? 10 Tura namakan seatmakui ¿napíash súsaintiam? 11 Nuikia átum yajauchitirmesha atumí uchirí̱ péṉker ana nu tuke súuchakaitrum. Nuna naṉkaamas nuikia seakrumni̱ṉkia atumí Aparí̱ nayaimpiniam pujana nu péṉker ana nuna suramsashtatuak.

12 Jú̱naka Muisaissha Yúsnan etserniusha akupénawai. ‘Chíkich ámin túrutati tusa wakerakmeka amesha núnismek túrata.’ Tu akupénawai.

Waṉkaram jintiasha tura tsérerach jintiasha

(Ruk. 13:24)

13 7:​13-14 Waṉkaram jintia awai. Waya̱tniusha yúpichuchiti. Nui̱sha untsurí wáiniawai. Tura nusha meṉkakatniunam jeawai. Túrasha chíkich jintia awai. Nusha tsérerach asa itiurchataiti. Waya̱tniuri̱sha yupipitchiti. Nui̱ ishichik wáiniawai. Tura nusha iwiaaku pujustinnium jeawai. Tuma asamtai tuke iwiaaku pujustaj tákurmeka tsérerach jintianmaani̱ wetarum.

Nere̱ja̱i̱ numi nekaatainti

(Ruk. 6:43-44)

15 Aneartarum. Wáitruiniak ‘Wi Yúsnan étserjai’ tuinia nu írunui. Pátatek murikiua áinis yúpichuch áiniawai tura ni enentái̱n nekas úunt ya̱wa̱ áinis áiniawai. Pátatek shiir chichainiawai tura ni enentái̱n yajauch piákuiti. 16 Atumsha túramuja̱i̱ nin nekaatniuitrume. Naranmaya̱ shui̱ya júukchamniaiti. ¿Tsachiksha kushiṉkiapen nerektatuak? 17 Núnisaṉ péṉker numia nu tuke péṉkeran nereatsuk. Tura yajauch numia nu yajauchin nereatsuk. 18 Péṉker numi yajauchin nereatsui. Núnisaṉ yajauch numi péṉkeran nereatsui. 19 Yajauch numi ajakar tsupirar jinium apeashtinkiait. 20 Tuma asamtai wáitrin ainia nuka túramuja̱i̱ nekanattawai.

Ashikia Yus akupeana nui̱ jeachartatui

(Ruk. 13:25-27)

21 Aya winia Apar nayaimpiniam pujana nuna wakeramuri̱n umirin ainia nuke Yus akupeamunam pachinkiartatui. Antsu chíkichka ‘Uuntá, Uuntá’ turutainiayat nayaimpiniam jeachartatui. 22 Amuukatin tsawant jeamtai untsurí turutiartatui ‘Uuntá, Uuntá, ame náaram pachisar ashí nuṉkanam etserkachmakajⁱ. Ame náarmesha pachisar yajauch wakancha ji̱i̱ki̱ akupkámji. Núnisaṉ ame náaram pachisar aentsti tujintiamu túramji’ turutiartatui. 23 Nui̱ chichainiakui ‘Peṉké nékachuitjiarme. Werumtárum. Aya yajauchitrume’ títiatjai.*

Péṉker ukurma tura yajauch ukurma

(Ruk. 6:47-49; Mar. 1:22)

24 Shuar winia chichamprun antuk umirkaṉka nu shuar tí peṉker enentáimniuiti. Nisha ju̱ shuarja̱i̱ métekete. Je̱a̱ je̱a̱muk kayanam ukurmai. 25 Tura yumi ti yutuk entsa nujaṉkruamai tura nase ti kakaram umpuimiai. Túmai̱ṉ pukukachmai ni ukurmari̱ kayanam ukuamu asamtai. 26 Tura shuar winia chichamprun antuk umirtukchaṉka ju̱ shuara núnisaṉ enentáimchaiti. Je̱a̱ je̱a̱muk náikminiam ukurmai. 27 Tura yumi yutuk entsa nujaṉkruamai tura nase ti kakaram umpuimiai. Túmakui̱ je̱a̱ mash sa̱a̱naki̱ iniaamai” tímiayi Jesus.

28 Jesus nuna tinia amukmatai ashí shuar ti enentáimprarmiayi. 29 “Yusa kakarmari̱ji̱a̱i̱ unuitiamtsujik. Israer shuara jintinniuri̱nkia núnis unuiniainiatsui” tiármiayi.