Taniar
Taniar ímiaja̱i̱k kuatru yajasma wainma
7 Kame Pirsasár Papirúnianam úunt akupin ajasmia nú uwitin Taniarka peakri̱n enentáimiá tepes mesekranmasha tura ímiaja̱i̱ksha wáinkiarman wárik áararmia nuka jú̱nisaiti. 2 Taniar chichaak “Nayaimpinmaya̱ nase nuṉká kuatru yantaméya̱ uunt nayantsanam iniar umuchian kashi ímiaja̱i̱k wáinmiajai. 3 Nui̱ kuatru uunt yajasma niisháa niisháa iira nayantsanmaya̱ jíintrarmai. 4 Kame emka yajasmaka úunt ya̱wa̱ ániuitiat churuwia nanape̱n nanapruruyi. Tura nuna ii wajái̱ nanape̱nka akaarar nuṉkaya̱ṉka takuiniar aentsua núnis jimiará náwe̱ntin ajasmai. Túrunamtai aentsua núnis enentáimin awajnásmai. 5 Tura chíkich yajasmasha, chai̱ya núni̱ṉ, ayaam wajamai. Nusha menaintiú paen esái apaakuyi tura ‘Weme núkap namaṉ yuátá’ tímiauyi. 6 Nuna iisan iniaṉkasu ai̱ chíkich yajasmasha yumpinkia ya̱wa̱ya ánin kuatru nanapruruyi tura nu yajasmasha kuatru múuktinian wainkiamjai. Tuma asa kakaram akupin átin sunasmai. 7 Nu arant kashi ímiaja̱i̱k wáinmiaj nusha nekaska iniaṉnamu yajasma tí tsuumai̱ ashamái̱ tí kakarmauyi tura nuna nai̱sha namincha jiru uunt armai. Kame nusha yukartua amukratuk achia̱rar ampirmancha najatmiai. Nu yajasmasha emka yajasman waintramaj núja̱i̱sha niisháa íirkan tias kachurtinian wainkiamjai. 8 Tura nu kachun ii wajái̱ nui̱ṉ chíkich kachu uchich jiini̱ chíkich ainia nuja̱i̱ métek ajastaj tusa tsakamai. Nu túmakui̱ emka arma nu kachusha menaint akararmai. Tura nu kachu jiinmia nuka aentsu ji̱n íirkauyi. Tura chichaak naṉkamantua núnis kakaram chichaakuyi.
Kuatru yajasma sumamtikiamu
9 Kame nui̱ imiá wajai̱ṉ
untsurí akupin pujuiniamunam akupin pujutai̱niam
Tuke Tsawant Pujuwa nu pujusmai.
Ni entsarmari̱sha micha timianú puju núnisaṉ intiashí̱sha uruchia timianú puju armai.
Tura akupkur pujutái̱ri̱ṉkia ji keá tímianuyi nuyá̱ pujutái̱ri̱ nawé̱ téter wetairi̱ṉkia ji keemai.
10 Nui̱ Niya̱ entsa keá jiinmiai.
Tura nui̱sha naṉkaamas nekapmarchamnia nayaimpinmaya̱ aents Nin takariarmai.
Tura nú naṉkaamas nekapmarar amuchat nayaimpinmaya̱ aents Niin naka wajarmai.
Nuya̱ṉka sumamtikiattsa juarmia nui̱ papisha urantrarmai.
11 Nuya̱ṉka kachu uchich jiinmia nu naṉkamantu kakaram chichaakui ii wajái̱ uunt yajasmancha máwarmai tura ni aya̱shí̱ncha asa̱a̱rar áesnati tusa jinium akupnakmai. 12 Núnisaṉ chíkich uunt yajasma akupeamuri̱sha atannarmai túrasha tsawantri̱ tesamu jeamam ni iwiaakmari̱nkia éketnakmai.
Aentsu Uchirí̱ Úunt Akupin anaikiamu
13 Kame wi kashi ímiaja̱i̱k imiá pujusan
nayaimpinmaya̱ yuraṉminiam páchitkia
aentsu uchirí̱ya núnin táarun wainkiamjai.
Tura Tuke Tsawant Pujuwa nui̱ itiariarmai. *
14 Nuya̱ṉka akupkatin tura naṉkamantu ajastin
núnisaṉ akupin átincha sunasmai.
Tuma asamtai ashí aents tura mátsatkamu uunt nuṉka ainia nuya̱sha
núnisaṉ chíkich chíkich chichamtin ainia nusha
Nin shiir enentáimtuiniak umiriarmai.
Warí, ni akupkatniuri̱ṉkia náṉkatkachu amuukashtin
tura peṉké emesnarchatniuiti.
Kuatru yajasmasha warinia nakumena
15 Kame wi Taniar nu túman ímiaja̱i̱k wainkian winia wakantruja̱i̱sha ti enentáimtusan nuna naṉkaamas ti sapijmiakmajai. 16 Túran nui̱ wajarma nuna chikichkiniak weantukan anintrakun ashí wainkiajna ju̱sha nekassha ¿warinia nakumea? Tutai núnaka mash paant jintintrurmai. 17 Tura chichartak ‘Ju̱ kuatru uunt yajasmaka ju̱ nuṉkanam kuatru akupin akupkartatna nuna nakumui. 18 Túrasha nu naṉkaamasmatai̱ṉkia Ashí Naṉkamantu Yusna ajasár tunaarincha áiniana nu ni akupeamuri̱n akintrukartatui. Tura nu akupeamuka peṉké iniaṉnatsuk tuke niniu átatui’ turutmiai.
19 Nuyá̱ nekaska iniaṉnamu yajasma niisháa iirkau nu yajasmancha nekaataj tusan wakerimjiai. Nu yajasmaka tí tsuumai̱ tura ashamái̱ kakarmauyi. Tura nuna nai̱sha namincha jíruyi tura nanchikí̱ṉkia yaṉkú jíruyi. Kame nusha yukartua amukratuk achia̱rar ampirmancha najatmiai. 20 Núnisnak yajasma tias kachura nunasha nuyá̱ chíkich kachu uchich jiinkiui menaint akararmai. Nu kachu uchich jí̱ntin tura wénuntin asa chichaak naṉkamantua núnis kakaram chichaku tura ni tsaníakmari̱ji̱a̱i̱sha ti kakaram ajasu asamtai nekas péṉker nekaattsan wakerakun anintrúsmajai. 21 Kame nú kachusha Yusna ainia nuna mesetan najata nupetainian wáinmiajai. 22 Núnaka Tuke Tsawant Pujuwa nu táamam túriarmai. Tura Ashí Naṉkamantu Yusna ainia nuna ayamprúkmai. Nuya̱ṉka tsawant jeamtai Yusna tunaarincha awajsarua nuka akupeamun nupetmatkar atantiarmai.
23 Nuyá̱ wiji̱a̱i̱ chichasua nu atak chichartak ‘Tura kuatru yajasmanumia̱ iniaṉnamua nuka kuatru akupeamunmaya̱ amúamu akupeamu átatna nuna nakumui. Kame nuka chíkich akupeamu ainia núja̱i̱sha naṉkaamas kakaram átatui. Tuma asa ashí nuṉkanmaya̱n yuá amuk najá najá awajsattawai. 24 Nuyá̱ tias kachuri̱ ainia nuka nú nuṉkanmaya̱ tias akupin jíintrattana nuna nakumui. Núnisaṉ nuna uku chíkich akupin átatui, nusha emka akupin arma núja̱i̱sha naṉkaamas kakaram asa menaintiú akupniun nupetkattawai. 25 Túmak Ashí Naṉkamantu Yusan yajauch chichartiatui tura Yusna ajasár tunaarincha ainia nunasha wáitkiasartatui. Ántsaṉ nampernasha nuyá̱ akupkámu chichamnasha yapaji̱áttsa wakerittiawai. Kame menaintiú uwí nuyá̱ sais nantu Yusna nu tsaṉkatkamu ártatui.* 26 Túrasha uunt sumamtikin irunar pujusár nu akupeamunka ataṉkiar emestukar peṉké amukártatui. 27 Nuya̱ṉka tunaarincha ainia nuna Ashí Tujintkiachu Yusa akupeamuri̱ aents ásarmatai ashí ju̱ nuṉkanam akupeamu ainia nuna peṉkeri̱n tura kakarmari̱ncha nuyá̱ páantniuri̱ncha nu akupeamun súsartatui. Warí, nu akupeamuri̱ṉkia peṉké naṉkankashtin asamtai ashí nuṉka akupeamunam ainia nusha Yusan shiir awajainiak umirkartatui.’ 28 Kame ímiaja̱i̱k wáinmiaj nuka ju̱i̱ amúawai. Túrunamtai wi Taniar páchim ti enentáimpran putsú putsú ajasmajai. Túrasha wainkiamaj núnaka kajinmáttsuk tuke enentáimmiajai” tímiayi.