Muisais Ujakma
32 “Nayaimpinmasha tura nuṉkasha wi chichaktataj nu anturtuktarum.
2 Wi jintíamuka yumi yáitmataik yuta áintsaiti.
Kame chichamprusha yumi ju̱yu̱í̱ ajak
arakan sa̱a̱kniasha sanamtikiana núnisaiti.
3 Áintsanak wikia Uunt Yusa náari̱n paant etserkattajai.
¡Tura atumsha ii Yusri̱ naṉkamantu awajsatarum!
4 Niṉkia kátsuram Káyaiti, Israeran ayampri̱niaiti.
Ni túramuri̱ṉkia ashí péṉkeraiti
kame ashí túrana nuka nékaskete.
Niṉkia nekas umin Yus asa yajauchiji̱a̱i̱ peṉké páchitkiachuiti
antsu Niṉkia aya péṉkerkete.
5 Kame Israer shuarcha tunáa túrawar
nékachu netse ajasáru ásar Ni uchirí̱nchua áinkiaruiti.
Tura nékachu enentáimcha aentsua ánin ajasár
Yusa naari̱ yajauch awajsaruiti.
6 ¿Átumka waurka ántichu aentsua ánin ajasrumek
Uunt Yus shiir enentáimtikniuram?
¿Kame atumí aparí̱ṉkia Yúschakait?
¿Najatma kakarmarmincha núnisaṉ pujustinniasha
ashí iwiarak amasua nuka
tura yámankamtaik atumín najatmaka Níchukait?
7 Yaunchu túrunamia nui̱ ataksha enentáimsakua.
Ti yaunchu aents matsamsar naṉkaamasaru ainia nui̱ enentáimsatarum.
Atumí aparí̱ anintramka niṉki ujatmákartatui.
Núnisrumek atumí úuntri̱sha anintruiniamka nisha núnisaṉ turamartatui.
8 Ashí Naṉkamantu Yus uunt matsamkamun aentsun nuṉkan susamiania
nui̱sha aentsnasha akantrámiayi.
Nui̱ aentssha tui̱ matsamsartata nunasha
Israer shuarja̱i̱ métek nekapmar nuṉkan tesaráwarmiayi.
9 Warí Uunt Yusna tesamuka ní shuarchakait.
Tuma asa níniua nuka Jakup shuaraiti.
10 Núnaka kampuntin atsunum nase túpututu ajamunam
tura wariṉkísh atsamunam niṉki pujan wainkiamiayi.
Tura miniakas tí peṉker jintintiá ti shiir wainkiamiayi.
11 Churuwia uchirí̱ nanaakarat tusa pasuṉke̱n umuchiana
tura nanamainiakuisha nui̱ṉ tenté ajateak akaikí̱ iniainiakuisha
nanape̱n yapantar weantuk awaṉ júana núnis
12 Uunt Yusak Niṉki nemaras tí peṉker júkiarmiayi.
Kame Níya̱ṉka najankamu yuska peṉké atsuarmiayi.
13 Tura náintiaani̱ iwiakar kampunniunmaya̱ yuraṉnasha
nuyá̱ kayarkámunmayan asuitincha ayurawar
núnisaṉ kátsuram kayanmaya̱ chinincha amuknawarmiayi.
14 Waaka muntsurí̱ kuntutisha tura murikiu muntsurí̱sha
núnisrumek murik yamatskamchi macharí̱sha
nuyá̱ Pasannumia̱ muriksha tura chipiu áishmaṉka namaṉké̱sha
núnisaṉ tí peṉker trikiu nere̱sha yuámiarme.
Tura tí peṉker uwa ásar yumiri̱sha numpa tímianu kapantin umarmiarme.
15 Tura Jesurún ti nuer machar sáṉkanmia sáṉkanmia ajak
nin najana nú Yusnaka páchitsuk iniaisámiayi.
Núnisaṉ ni uwemtai̱ Kayasha ikiukmiayi.
16 Nuyá̱ Israer shuarka najankamu yus mui̱jmiainia nuna tikishmátainiakui
Yus nin akasak ti kajektatna nuna e̱a̱karmiayi.
17 Nisha nékainiachiat yamaram yusan
tura ni aparí̱sha ashamkacharma nú yusan shiir awajsarmiayi.
Nuna túruiniak iwianchin taṉkun mantuá áestuiniak Yúsnaka pachikcharmiayi.
18 Nuyá̱ atumí najatma nú kátsuram Kayasha ikiukniuitrume.
Nu túrakrum Yuska najatma iwiaakmancha amasu auk kajinmátkintrume.
19 Ni uchirí̱ tura nawantri̱sha Nin nakitraram
Uunt Yus nuna wainiak ti kajerkarmiayi.
20 Nuya̱sha Uunt Yus chichaak ‘Wats yamaikia íischartatjai.
Warí urukawartiṉ tusan pachischartatjai.
Ti nekas yajauch shuar áiniawai.
Yajauch uchi péṉker umichua ánin áiniawai.
21 Núnisaṉ niṉkia naṉkamantu enentáimtuma ásar
nekas Yuscha nuna enentáimtuiniak akajtukarmai.
Tuma asamtai wisha yamaikia áitkiasnak
náṉkamas aentsja̱i̱ netse ainia núja̱i̱sha akasmamtikian akajiartatjai.*
22 Warí Winia kajetáirui̱ya̱ jiya núnis keekái.
Túmak initcha Seura tímianaisha jeattawai.
Tura nuṉkancha nuyá̱ nui̱ yuraṉ írununcha mash amuktatui.
Núnisaṉ naintia táritramuri̱sha keekartatui.
23 Tura niṉkia ashí yajauchiji̱a̱i̱ wáitkiasartatjai.
Tura naṉkirun eketran amukártatjai.
24 Núnisaṉ tsukaja̱i̱sha tsuemuja̱i̱sha
tura ti najamin suṉkurja̱i̱sha amukártatui.
Nuyá̱ kampunniunmaya̱ yajasman kajenan
tura najamin tséasri̱ntin napin nuṉká japinias yujá ainia nuna akuptúkartatjai.
25 Nuyá̱ á̱a̱ni̱ṉkia puya̱ja̱i̱ maamu ártatui.
Antsu jeaṉka uchi áishmaṉ natsasha, nuwa̱ch natsachisha
tura uchi muntsúakusha úuntchisha aya sápijmiamuja̱i̱ṉ amukártatui.
26 Kame yajá tsakiṉmaktatjai túram amuukarmatai
ashí aents kajinmatkiarti tu enentáimsamjai Wikia.
27 Túrasha atumí nemasri̱ naṉkamantu enentáimtumasar
“Uunt Yuska áitkiachai antsu iik áitkiaji”
tu enentáimtumasara̱i̱ṉ tusan túrachuitjiai.’
28 Warí nu aentska chicharmasha peṉké ántichu
núnisaṉ peṉké enentáimcha áiniawai.
29 Maa, neka áiniaka ju̱nasha antukarainti núnisaraṉ amuwamunam
warí urukawartata nunasha nekaawarka maak árainti.
30 Kame ni kátsuram Kayari̱ surukchaitkiuiṉkia
tura Uunt Yussha iniaisachuitkiuiṉkia chikichkitiatcha
¿itiurak mírnasha étsekeararat
tura jímiarchikitiatcha itiurak tias mírnasha ipiskarat?
31 Warí ní kayari̱ṉkia íi uunt Kayarí̱ya núnischaiti.
Núnaka ii nemasri̱sha nékainiawai.
32 Túrasha ni úwari̱ṉkia Sutuma
tura Kumuranmaya̱ uwa áiniawai.
Tura nuka tséas uwa
nuyá̱ nere̱ṉka yapá áiniawai.
33 Ni wíniuri̱sha najamín napi makanchi̱ tséasri̱ya núnisaiti.
34 ‘Jú̱naka mash Wiki neka asan kuítrua nútiksan
Winí̱ ú̱kan péṉker ikiusuitjiai.
35 Wikia yapajkiattajai tura akikmaktatjai.
Nisha wárik atajkintrartatui.
Warí ni wáitsatniuri̱ tsawant ishichik ajasmatai
niniu iwiarturma nu wárik jeartemayi’ Uunt Yus tímiayi.
36 Kame Uunt Yus ni shuari̱ túramuja̱i̱ iirsar nekarawartatui
tura ni shuari̱n amuikiarmataisha ántsaṉ emetamusha
núnisaṉ aṉkant pujuiniasha juákcharmatai
nuna wainiak waitnentrar ayamprúkartatui.
37 Nuyá̱ Ni chicharainiak ‘Atumí najankamu yusri̱ kátsuram kaya núnis
iin ayamprutmaji tímiarum nusha ¿tui̱ pujuinia?
38 Tura taṉkú maa aestua súam macharí̱n yuíniak
núnisaṉ winiu súam úmiarmania
nu nantakiar yáintmak ayamprutmakarti.
39 Wats yamaikia nekaatarum. Wikia Wíkitjiai.
Wini̱ya̱ṉka chíkich yuska peṉké atsawai.
Tuma asan iwiaaku awajsancha ataksha Wiki iwiaakmari̱n juriniaitjiai
tura suṉkurmamtikiancha Wiki tsuáwitjiai.
Tuma asamtai Wini̱ya̱ṉka chíkichkia uwemtikrachminiaiti.
40 Tura Wikia uwejrun nayaimpinmaani̱ takuin
chichaakun “Wikia tuke pujuwitjiai” títiatjai.
41 Núnisnak Winia puya̱r wínchaya ju̱na atsakan
winia nemasrun sumamtikiun yapajkiartatjai.
Nuní̱ túrakun Winia nakitruinianka amukártatjai.
42 Winia naṉkirka jákarun
tura achikia yaruakarma numpeja̱i̱ númpak ajasártatui.
Tura puya̱ka winia nemasru peṉkeri̱ intiash ajakin ainia nuna
namaṉké̱ncha yuá amukártatui’ tímiayi Yus.
43 Niṉkia Ni takarniúri̱ jákaru ainia nuna nemasri̱ncha yapajmiátkattawai.
Tura Ni shuari̱ yajauch túramuri̱n tsaṉkurar nincha núṉke̱ntuk ti shiir awajsártatui.
Tuma asamtai ashí nuṉkanmaya̱ aentstiram Ní shuari̱ji̱a̱i̱ iruntrarum warastarum” tímiayi Muisais.
Muisais umíak chicharkarma
44 Nuyá̱ Muisais Nuuna uchirí̱ Jusuiji̱a̱i̱ Israer shuar ántuiniamunam kantamma chichamnaka mash ujakmiayi. 45 Tura Muisais ashí Israer shuaran nú kantan tinia amuk 46 chicharainiak “Ashí ju̱ akupkámu chicham umiktinian jintintiájrumna nu péṉker unuimiátrarum atumí uchirí̱sha nekas enentáiji̱a̱i̱ ashí umikiarat tusarum péṉker jintintiátniuitrume. 47 Tura ju̱ akupkámu chichamka ántar chichamchaiti. Kame nuja̱i̱ nekas iwiaaku átatrume. Tura ju̱ péṉker umíakrumka Jurtan entsa amaini̱ katiṉkrum pujustatrumna nui̱sha núkap tsawant iwiaaku pujustatrume” tímiayi Muisais.
Yus Muisaisan yamaram nuṉkan iniaktusma
48 Tura nu tsawantai̱k Uunt Yus Muisaisan chicharuk 49 “Awarím nainnium Nepu naintia nui̱ wakam Muap aentsu nuṉké̱ Jirikiú íṉkiuasmakea nui̱ Kanaan nuṉkan wi Israer shuaran niniu átinian súsartatjana nui̱ wakam iistá. 50 Tura ámeka wakattamna nú nainniumaṉ jakam ame yátsum Araun Jur nainnium jakamiayi. Tura ni uuntri̱ jákaar ayamainiamunam ayamumnia núnismek amesha ayamuttame. 51 Warí átum Israer shuarja̱i̱ wekaimiarum nui̱ umirtutsuk mái̱ metek yajauch túrachmakuram. Kame Miripiakátes entsanmasha nuyá̱ kampuntin atsú nuṉka Sénnumsha Israer shuar iimiainiamunam péṉker enentáimtursachmarme. 52 Tuma asamtai Israer shuaran nuṉkan súsartatjana nuna iniaktustatjame. Nuka árantiaṉ mash wainkiattame túrasha ámeka nú nuṉkaka jearchattame” tímiayi Yus Muisaisan.