Sántiak

1 Wi Sántiak Yusan tura núnisaṉ ii Uuntri̱ Jesukrístun takarin asan ju̱ papin aajai. Ashí Yus shuartirmin ashí nuṉkanam tsakiṉmakarum matsatrumna nuna amikmajrume.

Nekatai̱ṉkia Yusai̱ya̱iti

2 Yatsuru, ashí itiurchat wáinkiurmesha tuke warastarum. 3 Iis, itiurchatnum pujakrum nekas Yus enentáimtaitkiurmeka katsuntratin unuimiártatrume. 4 Tura tuke páchiachkuram tuke katsunteakrum nuikia Yusja̱i̱ tí peṉker katsua̱rtatrume. Peṉké atsumashtatrume.

5 Átum náṉkamsarmek nekaatin tujintiakrumka Yusa nekatairi̱ seatá. Shuar seakui Yuska kajetsuk tura ementutsuk antsu patatas suawai. Tuma asamtai seakminkia suramsattawai. 6 Túrasha Yus nekas enentáimtusam seatá. Nekas enentáimtsuk “cha, surustimpiash” tútsuk seatá. Tu seakmeka nayantsa tsukatskari̱ ja̱wa̱t ukatak waketki̱ ajana amesha núniame. 7 Enentáimiin núnisaitkuiṉkia seamna nuna Yus peṉké amaschattawai. 8 Shuar jimiará enentáimna nuka shiir wekasatniun tujintiawai.

9 Yus shuar, ju̱ nuṉkanam kuítrincha ainia nu, Yus shiir awajsamua nuja̱i̱ warasti. 10 Tura Yus shuar kuítrinniuitkiusha péejchach enentáimtikramsha warasti. Iis, nupa̱ kuáṉkam tura nantu ti sukuam kaar miniatsuk. 11 Etsa̱ sukúam nupa̱ ka̱a̱wai tura kuku̱jísha iniaawai. Nuyá̱ shíirmach íiramuri̱ nui̱ amúawai. Núnisaṉ kuítrinniuka súrutnak pujurkusha itiurchat wainiak wárik amuukattawai.

Ii itiurchatri̱

12 Shíiraiti shuar ni itiurchatri̱i̱n nekas katsunteana nuka. Nekapsam jíinkiuṉka akinkiatniun wainkiattawai. Iwiaaku átinian, tawasap achiktinia núnisaṉ wainkiattawai Yus ni aneam tsaṉkatka nuna. 13 Shuar tunáa túramnia nekapeakka “Yus nuna útsutrutui” tu enentáimprashtiniaiti. Yuska yajauch túramnia enentáimtsui túrasha Nisha peṉké chikichkinkesha tunaanum útsuchuiti. 14 Antsu ni wakeramuri̱ji̱a̱i̱ṉ aents tunaan niṉki ikiatmamkaiti yajauch túratniun. Núja̱i̱ṉkia tunaanum útsukmaiti. 15 Nu yajauch wakeramunmaya̱ tunáa akiiniui. Tura nu tunáa mash amukámtai jákatin akiiniui.

16 Yatsuru, aneakun tájarme, anaṉmamawairap. 17 Ashí péṉker ana nu, ashí shiir ana nusha nayaimpinmaya̱ Yusak amasuiti. Yus ashí tsáapninia nuna najanaiti. Tura Nin kiritin atsa̱i̱ṉ yapají̱tsuk tuke tsáapniti. 18 Ni wakera asa ni nekas chichame̱a nuja̱i̱ ni uchirí̱ najatmamji. Tura ashí ukunam átatna nuja̱i̱ ii émkaitji.

Yus nekas shiir awajsatin

19 Tuma asamtai aneamu yatsuru, wárik chichakaip antsu antúu ajata. Núnisaṉ wárik kajekaip. 20 Kame kajena nuka Yus péṉker wakeramun túratsui. 21 Nu asamtai ashí péṉkercha nu tura ashí yajauch írunna nusha iniaisata. Tura tuke enentáiji̱a̱i̱ Yus Chicham ame enentáimin araamu anturkata. Tura nu chicham kakarmaiti uwemtikrampratniun.

22 Yus Chicham umikta. Aya ántukaip. Aya ántakmeka amek anaṉmamattame. 23 1:​23-24 Shuar íspikia íimiak ni yapi̱n wapikian wainiak tura nuyá̱ jáupmitsuk we, ni urukuit nuna wárik kajinmátkishtimpiash. Shuar Yus Chicham umitsuk aya ántana nuka nuja̱i̱ métekete. 25 Yus tana nuja̱i̱ aṉkant ajasminiaiti. Shuar íspikia imia áintsaṉ nekas Yus péṉker táman tuke iniaitsuk enentáimtus, nu shuar kajinmáttsuk aya antukchattawai antsu tuke umiktatui. Tura ni tura nuja̱i̱ ti shiir enentáimsamniaitrume.

26 “Nekas Yusan shiir umirjai” tana nu tura eseer chichaachkuṉka imia niṉki anaṉmamui tura “Yusan shiir umirjai” tana nuna ántar tawai. 27 Nekas Yus Apa awajitsuk shiir umirkatin ju̱i̱ti, mitiaikiasha waje̱sha itiurchatnum pujuiniakuisha yáiṉtiniaiti tura ju̱ nuṉkanam ashí tunáa ana núja̱i̱sha máatrashtiniaiti.