Apukarípsis
Yusai̱ya̱ etserin jímiar akupkámu
11 Nuyá̱ karis nekapkan surus turutiarmai “Weme Yusa Uunt Je̱e̱ nekapmarta. Túram taṉku maar Yus sútai̱sha nekapmarta. Tura nui̱ Yusan shiir awajena nusha nekapmarta. 2 Antsu je̱a̱ á̱a̱ri̱ṉkia yajaya̱ shuar susamu asamtai nekapmatsuk ikiuktia. Nu shuar ti shiir péprun Jerusaréṉkan kuaraintitús nantu nui̱ akupénak mash yajauch awajsártatui. 3 Túruiniakui Wikia Wi shuaran jímiaran akatran akupkáttajai. Nusha mir tusiantu sasaintia tsawant pujusár Winian etserkartatui. Nuka menaintiú uwí naṉkaamasaiti. Útkur entsatái̱ pushin entsaru ártatui” turutiarmai.
4 Nu jímiar shuarsha nayaimpiniam nakumkamu áiniawai. Uriwiu numisha jímiar tura shirikip ekemátaisha jímiar nayaimpiniam awai. Nusha ju̱ nuṉká Uuntri̱ Yusai̱ wajainiak jímiar akatrámua nú shuaran nakumainiawai. 5 Shuar nin yajauch awajsataj tutai ni wene̱nia̱ jinia ji̱i̱ki̱ nemasri̱ ashí áesatniuiti. Núnisaṉ nin yajauch awajsatniun wakera nuka jákartatui. 6 Nu aentska Yúsnan áujmatainiak yumi yutukaip títinian kakarman takakainiawai. Núnisaṉ entsancha numpa awajsatniun kakarman takakainiawai. Tura ashí yajauchia nuja̱i̱ aentsun wáitkiastinian takakainiawai. Nuna ashí ni wakeruinia nui̱ páchitsuk túramin áiniawai. 7 Tura ni takatrí̱n umikiarmatai Ti Kajen Yajasma náṉkatkachu wa̱a̱nmaya̱ jiinia nu mesetan najata nupetak máwartatui. 8 Tura iwiarnatsuk ni aya̱shi̱ uunt pepru jinti̱i̱n ajapén tepeartatui. Nu péprunmasha ii Uuntri̱ Jesukrístuncha máwarmiayi. Nu péprunmaya̱ shuar tuke yajauchin túrin ásarmatai Ejiptu tuíniak tura núnisaṉ Sutuma tuíniak nu péprun páchiniawai. 9 Tura menaintiú tsawant nuyá̱ naṉkaamas ashí nuṉkanmaya̱ aents jaka tepan iisar iwiarnascharti tiártatui. 10 Nu jákarmatai ashí nuṉkanam pujuinia nú shuar ni jakamun ti wararainiak mái̱ sunai ajartatui. Kame nu jimiará aents Yúsnan áujmatenak ashí aentsun wáitkiasaru ásarmatai ti warasarmai. 11 Nuyá̱ menaintiú tsawant nuyá̱ naṉkaamas jaka tepesarmatai Yus ataksha iwiaaku awajsarmai. Tura nantakiarmatai nuyá̱ aents nin wáinkiar ti ashamkarmai.
12 Nuyá̱ nu nantakiaru nayaimpinmaya̱ kakaram untsumman antukarmai “Ju̱i̱ yakí̱ wakatarum” untsummiai. Tutai ashí ni nemasri̱ iimiainiai̱ṉ yuraṉkim amuam nayaimpiniam wákarmai. 13 Túmainiai̱ ti ú̱u̱rkamtai tias nakakam jeá pepru sa̱a̱nakmiai. Tura siati mir aents jákarmai nu u̱u̱ja̱i̱. Chíkichkia sapijmiainiak Yus nayaimpiniam pujana nuna shiir awajsarmai.
14 Jímiar wáitsatin naṉkaamasai. Chikichik ajasua nu túrunatin ishichik ajasái.
Suntar siatia nu kachun umpuararma
15 Nuyá̱ suntar siatia nu, kachun umpuarmatai chícham kakaram chichainia nayaimpinmaya̱ antunkamai. Jú̱nis tiarmai
“Yamaikia ii Uuntri̱ Yus tura ni Anaikiamu Kristu ashí shuaran akupin ajasárai. Nisha tuke amutsuk akupkartatui.”
16 Nuyá̱ paintikuátru uuntka akupin pujutai̱nium Yusai̱ naka pujuarmia nu piniakum tepersar Yusan shiir awajénak tiarmai
17 “Uunt Yusá, ti kakaram asam Ámiji̱a̱i̱ tujintkiatin atsawai. Yáunchusha, yamaisha tura tuke amuutsuk iwiaaku pujuwitme. Ame ti kakarmarmiji̱a̱i̱ nekas akupkatin yamaikia juarme. Tuma asakmin yumiṉsajme, tiarmai. 18 Ashí aents kajertámkarmai. Tuma asamtai yamaikia ame kajerkatin tsawantrum jeayi. Jákarusha iniantkim ni túramuri̱ íisartatme. Túram amé shuarka shiir etserturmakua nusha tura Aminiak enentáimturmasarua nusha tura Ámin shiir awajtámsarua nusha ashí mash ti shiira nu súakum akiktatme. Antsu ju̱ nuṉkan emesniuka ashí emesratniunam akupkáttame” tiarmai.
19 Tuíniakui Yusa Uunt Je̱e̱ nayaimpiniam ana nu uranmiatai wakenmaani̱ Yus Aentsja̱i̱ Chícham Najanamu Eṉketai̱ paant amai. Túrunamtai peemsha, ipiamtasha, cháarpisha, u̱u̱sha armai tura michasha tí kakekamai.